മുൻഭാര്യയുടെ പുതിയ ബന്ധത്തിൽ അസൂയ മൂത്ത് വീട്ടിൽ കയറി മൂക്ക് അരിഞ്ഞ് മുൻഭർത്താവ്. ബറെയ്‌ലിയിലാണ് സംഭവം. മുൻഭാര്യയ്ക്ക് മറ്റൊരാളുമായുള്ള അടുപ്പം ഇഷ്ട്ടപ്പെടാതിരുന്നതിനാലാണ് മുൻ ഭർത്താവിന്റെ പ്രതികാര നടപടി.
നാലു വർഷം മുൻപാണ് മുഹമ്മദ് സജാദ് വിവാഹിതനായത്. സജാദിന്റെ സംശയരോഗം മൂലം, ആറുമാസം മുൻപ് ഇവർ വിവാഹമോചിതരായി. നിയമനടപടികളെല്ലാം സമാധാപൂർവ്വം തന്നെ അവസാനിച്ചു. എന്നാൽ മുൻഭാര്യയെ സംശയപൂർവ്വം നിരീക്ഷിക്കുന്നത് ഇയാൾ തുടർന്നു. ഇരുവരും അയൽവാസികളായിരുന്നതിനാൽ സ്ഥിരമായി കാണാനുള്ള അവസരവും ഉണ്ടായിരുന്നു.
ഭാര്യയോട് തിരികെ വീട്ടിലേക്ക് മടങ്ങിവരാൻ സജാദ് പലതവണ അപേക്ഷിച്ചിരുന്നു. അവർ അതിന് തയാറായിരുന്നില്ല. ഏതാനും മാസങ്ങളായി മറ്റൊരാളുമായി മുൻഭാര്യ പ്രണയത്തിലാകുകയും ചെയ്തതോടെ സജാദിന്റെ പക ഇരട്ടിച്ചു. ഇവരുടെ ബന്ധം ഇല്ലാത്താക്കാനും വിവാഹം മുടക്കാനും വേണ്ടിയാണ് സജാദ് ഏതാനും സുഹൃത്തുകൾക്കൊപ്പം വീട്ടിൽ കയറി മൂക്ക് അരിഞ്ഞത്.
യുവതി ശക്തമായി ചെറുത്ത് നിന്നതുകൊണ്ടാണ് ജീവൻ നഷ്ടപ്പെടാതിരുന്നത്. എന്തുതന്നെ വന്നാലും ഇനി സജാദിനൊപ്പമൊരു ജീവിതം പറ്റില്ലെന്ന നിലപാടിലാണ് യുവതി. സജാദിനെതിരെ കൊലപാതകശ്രമത്തിന് പൊലീസ് കേസെടുത്തിട്ടുണ്ട്.