ഏകദിനക്രിക്കറ്റിൽ ക്യാപ്റ്റൻ സ്ഥാനം വിരാട് കോഹ്‌ലിക്ക് വിട്ടുനൽകാനുള്ള കാരണം വ്യക്തമാക്കി മഹേന്ദ്രസിങ് ധോണി. ടീമിന്റെ ഭാവി കണക്കിലെടുത്തായിരുന്നു ആ തീരുമാനമെന്ന് ധോണി പറഞ്ഞു.
''2019 ക്രിക്കറ്റ് ലോകകപ്പിന് മുന്നോടിയായി പുതിയ ക്യാപ്റ്റന്(വിരാട് കോഹ്‍ലി) തയ്യാറെടുക്കാൻ മതിയായ സമയം ലഭിക്കണമെന്ന് ആഗ്രഹമുണ്ടായിരുന്നു. അതുകൊണ്ടാണ് ക്യാപ്റ്റൻ സ്ഥാനം ഒഴിഞ്ഞത്'', ധോണി പറഞ്ഞു.
സമയം വളരെ പ്രധാനമാണ്. ശക്തമായ ഒരു ടീമുണ്ടെന്ന് പറഞ്ഞിട്ട് കാര്യമില്ല. പുതിയ ക്യാപ്റ്റന് മുന്നൊരുക്കങ്ങൾക്കും തയ്യാറെടുപ്പുകൾക്കും മതിയായ സമയം കിട്ടാതെ നല്ലൊരു ടീമുണ്ടാകില്ല. ഉചിതമായ സമയത്താണ് ക്യാപ്റ്റൻ സ്ഥാനം ഒഴിഞ്ഞതെന്നും ധോണി പറഞ്ഞു.
ഇംഗ്ലണ്ടിനെതിരായ ഇന്ത്യൻ ടീമിന്റെ തോൽവിയെക്കുറിച്ച് പ്രതികരണം ഇങ്ങനെ; ഇതെല്ലാം കളിയുടെ ഭാഗമാണ്. ടെസ്റ്റ് ക്രിക്കറ്റിൽ ഇപ്പോഴും ഇന്ത്യ തന്നെയാണ് ഒന്നാമത് എന്ന കാര്യം മറക്കരുത്.
ടെസ്റ്റ് പരമ്പരയിൽ 1-4 നായിരുന്നു ഇന്ത്യയുടെ തോൽവി.
യുഎഇയിൽ ഈ മാസം പതിനഞ്ചിന് ആരംഭിക്കുന്ന ഏഷ്യാ കപ്പിനുള്ള തയ്യാറെടുപ്പിലാണ് കോഹ്‌ലിയും സംഘവും.