നിലപാട് വ്യക്തമാക്കുമോ, വഴുതി മാറുമോ; യുവതീപ്രവേശനത്തില്‍ പ്രതിരോധത്തിലോ സര്‍ക്കാര്‍?

ശബരിമലയുവതീ പ്രവേശനത്തില്‍ ഇപ്പോഴത്തെ നിലപാടെന്താണ് സര്‍ക്കാരെ ? 2018 ലെ പോലെ പൊലീസ് സംരക്ഷണത്തില്‍ സുപ്രീംകോടതി വിധി നടപ്പാക്കാന്‍ ഇറങ്ങി പുറപ്പെടലും നവോഥാന മതിലുതീര്‍ക്കലും പോന്ന ആവേശം ഇപ്പോഴില്ലെന്ന് അറിയാം. അതിനര്‍ഥം എന്താണ് ? യുവതി പ്രവേശനത്തിനായി പല്ലുംനഖവും സമര്‍പ്പിച്ച് പോരാടിയതില്‍ നിന്ന് സമ്പൂര്‍ണ യൂ–ടേണ്‍ എടുത്തു എന്നാണോ ? ശബരിമലയില്‍ ആചാര സംരക്ഷണമാണ് വേണ്ടത് എന്ന നിലപാടിലേക്ക് സര്‍ക്കാര്‍ മാറിയിരിക്കുന്നു എന്നാണോ ? – വ്യക്തത വേണ്ടതുണ്ട്. അതിപ്രധാന വിഷയത്തില്‍ വ്യക്ത വരുത്താതെ ഇക്കാലമത്രയും വഴുതിക്കളിച്ച സര്‍ക്കാരിന് ഈ തിരഞ്ഞെടുപ്പ് കാലത്ത് ഒരു നിലപാട് പറയേണ്ട അവസ്ഥ രൂപപ്പെടുകാണ്. ശബരിമല യുവതി പ്രവേശന പുനപരിശോധന ഹര്‍ജികള്‍  നാളെ സുപ്രീംകോടതിയുടെ മൂന്നംഗ ബഞ്ച് പരിഗണിക്കും. അപ്പോള്‍ സര്‍ക്കാര്‍ എന്ത് നിലപാട് പറയും ? അതെങ്ങനെ തിരഞ്ഞെടുപ്പിനെ ബാധിക്കും ?