കഴിഞ്ഞ ദിവസമുണ്ടായ അപ്രതീക്ഷിത മലവെള്ളപ്പാച്ചിലിൽ കുരുത്തിച്ചാലിലെ പാറയിൽ മൂന്ന് സന്ദർശകർ കുടുങ്ങി. കുരുത്തിച്ചാലിലെ പാറയിൽ കയറി കാഴ്ചകൾ കണ്ടുനിന്നവരാണ് പാറയിൽ കുടുങ്ങിയത്. പെട്ടെന്ന് വെള്ളം ഉയർന്നതോടെ പാറയിൽ അകപ്പെടുകയായിരുന്നു.
കരയിലേക്ക് വരാൻ കഴിയാതെ പാറയിൽ കുടുങ്ങിയവർ മറുകരയിലേക്ക് നീന്തിക്കയറിയാണ് രക്ഷപ്പെട്ടത്. കുരുത്തിച്ചാലിൽ മഴയില്ലെങ്കിലും മലയിൽ മഴ പെയ്താൽ പെട്ടെന്ന് ജലപ്രവാഹം ഉണ്ടാവും. ഇത് വൻ അപകടത്തിന് വഴിയൊരുക്കാറുണ്ട്. പെട്ടന്നുണ്ടായ മലവെള്ളപ്പാച്ചിലിൽ പെട്ട് മരണം വരെ സംഭവിച്ചിട്ടുണ്ട്. മഴക്കാലത്ത് കുരുത്തിച്ചാലിലെത്തുന്നവർ ജാഗ്രത പാലിക്കണമെന്ന് നാട്ടുകാർ പറഞ്ഞു.