പി.പി. ദിവ്യക്കെതിരായ ബെനാമി ആരോപണം: തെളിയിച്ചാൽ ഒരു കോടി! വെല്ലുവിളിയുമായി കാർട്ടൺ ഇന്ത്യ എം.ഡി

സി.പി.എം നേതാവ് പി.പി. ദിവ്യക്കെതിരായ ബെനാമി ഇടപാട് ആരോപണത്തിൽ വെല്ലുവിളിയും വാക്പോരും ശക്തമാകുന്നു. ആരോപണം തെളിയിച്ചാൽ പരാതിക്കാരനായ കെ.എസ്.യു നേതാവ് മുഹമ്മദ് ഷമ്മാസിന് ഒരു കോടി രൂപ നൽകാമെന്ന് ആരോപണവിധേയമായ കാർട്ടൺ ഇന്ത്യ കമ്പനിയുടെ മാനേജിങ് ഡയറക്ടർ മുഹമ്മദ് ആസിഫ് വെല്ലുവിളിച്ചു. എന്നാൽ, ഇടപാടുമായി ബന്ധപ്പെട്ട്  തെളിവുകളുണ്ടെന്നും ആരോപണത്തിൽ ഉറച്ചുനിൽക്കുകയാണെന്നും ഷമ്മാസ് മറുപടി നൽകി. ഇതിനിടെ, ദിവ്യയ്ക്ക് വിജിലൻസ് ക്ലീൻ ചിറ്റ് നൽകിയതുമായി ബന്ധപ്പെട്ട് ബെനാമി ആരോപണം അന്വേഷിച്ചിരുന്നില്ലെന്ന് വ്യക്തമാക്കുന്ന രേഖകൾ മനോരമ ന്യൂസിന് ലഭിച്ചു. Also Read: ‘കേരളം അപകടത്തില്‍, രക്ഷിക്കൂ’; വര്‍ഗീയവിഷം വിതറി യൂട്യൂബര്‍; പിന്തുണച്ച ദിയ കൃഷ്ണ എയറില്‍!

കണ്ണൂർ ജില്ലാ പഞ്ചായത്ത് പ്രസിഡന്റായിരുന്ന കാലത്ത് പി.പി. ദിവ്യയുടെ നേതൃത്വത്തിൽ കാർട്ടൺ ഇന്ത്യ കമ്പനിക്ക് 12 കോടി രൂപയുടെ നിർമാണ കരാർ നൽകിയിരുന്നു. കമ്പനി ദിവ്യയുടെ ബെനാമി സ്ഥാപനമാണെന്ന ആരോപണമാണ് വിജിലൻസ് അന്വേഷണത്തിന് ആധാരമായ പരാതിയുടെ പ്രധാന ഉള്ളടക്കം.

എന്നാൽ, ആരോപണങ്ങൾ നിഷേധിച്ച കമ്പനി എം.ഡി മുഹമ്മദ് ആസിഫ്, അവ തെളിയിക്കാൻ ഷമ്മാസിനെ വെല്ലുവിളിച്ചു. പരാതി പിൻവലിക്കുന്നതിന് ഷമ്മാസ് പണം ആവശ്യപ്പെട്ടുവെന്നും ആസിഫ് ആരോപിച്ചു. ഇതിന് മറുപടിയായി, ഒത്തുതീർപ്പിന് ശ്രമിച്ചെന്ന ആരോപണവുമായി ബന്ധപ്പെട്ട തെളിവുകൾ പുറത്തുവിടാൻ ഷമ്മാസ് കമ്പനി എം.ഡിയെ വെല്ലുവിളിച്ചു.

അതേസമയം, എൽ.ഡി.എഫ് സർക്കാരിന്‍റെ കാലത്ത് നടന്ന വിജിലൻസ് അന്വേഷണം അപൂർണമായിരുന്നുവെന്ന രേഖകൾ പുറത്തുവന്നു. കാർട്ടൺ ഇന്ത്യയ്ക്ക് നിർമാണ കരാർ നൽകിയതിൽ ക്രമക്കേടുണ്ടോയെന്ന കാര്യം മാത്രമാണ് വിജിലൻസ് പരിശോധിച്ചതെന്നും ബെനാമി ഇടപാട് ആരോപണം വിശദമായി അന്വേഷിച്ചില്ലെന്നുമാണ് പ്രധാന കണ്ടെത്തൽ. ഹൈക്കോടതിയിൽ സമർപ്പിച്ച റിപ്പോർട്ടിലും ബെനാമി ആരോപണം പരാമർശിച്ചിട്ടില്ല. ഇതോടെ പി.പി. ദിവ്യക്കെതിരായ ആരോപണങ്ങളും വിജിലൻസ് അന്വേഷണത്തിന്റെ പരിധിയും സംബന്ധിച്ച വിവാദം വീണ്ടും ശക്തമായിരിക്കുകയാണ്.