മോഷണത്തിൽ പൊലീസ് അന്വേഷണം വൈകി; സുഹൃത്തുക്കൾക്കൊപ്പം ഇറങ്ങി പ്രതികളെ കണ്ടെത്തി വീട്ടുടമ

വീട്ടിൽ മോഷണം നടന്നാൽ പൊലീസിൽ പരാതി നൽകി അന്വേഷണത്തിനായി കാത്തിരിക്കുകയാണ് പതിവ്. എന്നാൽ തൃശൂർ തൃത്തല്ലൂർ സ്വദേശി ഗിരീഷ് അതിൽ നിന്ന് വ്യത്യസ്തമായി മോഷ്ടാക്കളെ സ്വയം കണ്ടെത്തി പൊലീസിന് കൈമാറി.

ഈ മാസം അഞ്ചിനാണ് ഗിരീഷിന്റെ വീട്ടിൽ മോഷണം നടന്നത്. വീട്ടിൽ ആരുമില്ലാത്ത സമയം നോക്കി ടെറസിലൂടെ അകത്തുകടന്ന മോഷ്ടാക്കൾ തലമുറകളായി സൂക്ഷിച്ചിരുന്ന ചെമ്പുപാത്രങ്ങളും സി.സി.ടി.വി ഉപകരണങ്ങളും കവർന്ന് പിക്കപ്പ് ഓട്ടോറിക്ഷയിൽ കടന്നുകളയുകയായിരുന്നു.

വീട്ടിലെ സി.സി.ടി.വി ക്യാമറയിൽ മോഷണത്തിന്റെ ദൃശ്യങ്ങൾ പതിഞ്ഞിരുന്നു. തുടർന്ന് ഗിരീഷ് പൊലീസിൽ പരാതി നൽകി. എന്നാൽ പ്രതികളെ കണ്ടെത്തുന്നതിൽ കാലതാമസം നേരിട്ടതിനെ തുടർന്നാണ് സുഹൃത്തുക്കളുടെ സഹായത്തോടെ ഗിരീഷ് അന്വേഷണം ആരംഭിച്ചത്.

Read more: പുറക്കാട് കുടുംബാരോഗ്യകേന്ദ്രത്തിൽ 10 രൂപയ്ക്ക് ചായയും ലഘുഭക്ഷണവും ...

ഒരാഴ്ച നീണ്ട അന്വേഷണത്തിനൊടുവിൽ മോഷ്ടാക്കളെയും വാഹനത്തെയും കണ്ടെത്തി. തമിഴ്നാട് സ്വദേശികളായ മൂന്ന് സ്ത്രീകളാണ് മോഷണത്തിന് പിന്നിലെന്നും സമീപത്തെ ആക്രിക്കടയുമായി ബന്ധപ്പെട്ട വാഹനത്തിലാണ് മോഷണസാധനങ്ങൾ കൊണ്ടുപോയതെന്നും സി.സി.ടി.വി ദൃശ്യങ്ങളിൽ നിന്ന് വ്യക്തമായതായി ഗിരീഷ് പറയുന്നു.

സി.സി.ടി.വി ദൃശ്യങ്ങൾ ഉൾപ്പെടെയുള്ള തെളിവുകൾ കൈമാറിയിട്ടും മതിയായ രേഖകളില്ലെന്ന് പറഞ്ഞ് പൊലീസ് കേസ് രജിസ്റ്റർ ചെയ്തില്ലെന്നാണ് ഗിരീഷിന്റെ ആരോപണം. ഒടുവിൽ ആക്രിക്കട ഉടമയിൽ നിന്ന് നഷ്ടപ്പെട്ട സാധനങ്ങളുടെ വിലയായി ലഭിച്ച തുക കൊണ്ട് തൃപ്തിപ്പെടേണ്ടിവന്നുവെന്നും മോഷ്ടിക്കപ്പെട്ട സാധനങ്ങൾ തിരികെ ലഭിച്ചില്ലെന്നും ഗിരീഷ് പറയുന്നു.

സംഭവത്തിൽ പൊലീസ് അന്വേഷണം എങ്ങോട്ടെത്തുമെന്നതും മോഷ്ടിക്കപ്പെട്ട വസ്തുക്കൾ കണ്ടെത്തുമോയെന്നതുമാണ് ഇനി അറിയാനുള്ളത്.