രാജഗിരിയിൽ എഐ അധിഷ്ഠിത റെറ്റിന പരിശോധന; 100 പ്രമേഹരോഗികൾക്ക് സൗജന്യ സേവനം

കൊച്ചി രാജഗിരി ആശുപത്രിയിൽ എഐ സാങ്കേതിക വിദ്യയുടെ സഹായത്തോടെയുള്ള നൂതന റെറ്റിന പരിശോധന ക്യാംപിന് തുടക്കമായി. ആശുപത്രിയിൽ നടന്ന ചടങ്ങിൽ എച്ച്.ആർ ഡയറക്ടർ ഫാ. ജിജോ കടവൻ ക്യാംപ് ഉദ്ഘാടനം ചെയ്തു. കാഴ്ച നഷ്ടപ്പെടാൻ ഇടയാക്കുന്ന നേത്രരോഗങ്ങൾ പ്രാരംഭ ഘട്ടത്തിൽ തന്നെ കണ്ടെത്തി പ്രതിരോധിക്കാൻ പുതിയ സംവിധാനത്തിലൂടെ സാധിക്കും. 

പൂർണമായും വേദനരഹിതവും ലളിതവുമായ ഈ പരിശോധനയ്ക്ക് കൃഷ്ണമണി വികസിപ്പിക്കുന്നതിനുള്ള തുള്ളിമരുന്നുകളുടെ ആവശ്യമില്ലെന്നതാണ് മറ്റൊരു പ്രത്യേകത. ജൂലൈ 29 മുതൽ ഓഗസ്റ്റ് 1 വരെ നടക്കുന്ന പ്രത്യേക പരിശോധന ക്യാംപിൽ രജിസ്റ്റർ ചെയ്യുന്ന 100 പ്രമേഹ രോഗികൾക്ക് ഈ സേവനം സൗജന്യമായി പ്രയോജനപ്പെടുത്താം. കൂടുതൽ വിവരങ്ങൾക്ക് 0484-2905000 എന്ന നമ്പറിൽ ബന്ധപ്പെടാവുന്നതാണ്.