AI Image
ബൈക്കില് പോയ കര്ഷകനെ തടഞ്ഞു നിര്ത്തി കണ്ണില് മുളകുപൊടി എറിഞ്ഞ് 25 ലക്ഷം രൂപ കവര്ന്നു. മധ്യപ്രദേശിലെ അശോക്നഗറിലാണ് സംഭവം. തമോയ ചക് ഗ്രാമവാസിയായ ലഖ്വിന്ദറാണ് കൊള്ളസംഘത്തിന്റെ ആക്രമണത്തിന് ഇരയായത്. ബന്ധുവിന് നല്കുന്നതിനായി 25 ലക്ഷം രൂപ ബാഗിലാക്കിക്കൊണ്ട് പോവുകയായിരുന്നു ലഖ്വിന്ദര്. യാത്രയ്ക്കിടെ രണ്ടുപേര് ബൈക്ക് കൈകാണിച്ച് നിര്ത്തി.സംസാരിക്കാന് തുടങ്ങിയതിന് പിന്നാലെ കണ്ണില് മുളക് പൊടി എറിയുകയും പിന്നാലെ ബാഗ് തട്ടിപ്പറിച്ചോടുകയുമായിരുന്നു.
കണ്ണീനീറി അലറിക്കരഞ്ഞ ലഖ്വിന്ദര് സഹായത്തിനായി പരക്കം പാഞ്ഞു. വഴിയേ എത്തിയ ഗ്രാമീണരാണ് വിവരം വീട്ടുകാരെ അറിയിച്ചതും ആശുപത്രിയിലേക്ക് കൊണ്ടുപോയതും. ബന്ധുവിന്റെ പക്കല് നിന്ന് കടം വാങ്ങിയ പണം തിരികെ നല്കാന് കൊണ്ടുപോയതാണെന്ന് ലഖ്വിന്ദര് പൊലീസില് നല്കിയ പരാതിയില് പറയുന്നു. പൊലീസ് അന്വേഷണം ആരംഭിച്ചു.
ഈ മാസം ആദ്യം സദോരയില്വച്ചും മാസ്ക് ധരിച്ച രണ്ടുപേര് മറ്റൊരു കര്ഷകനില് നിന്ന് 20 ലക്ഷം കവര്ന്നിരുന്നു. ബാങ്കില് നിന്ന് പിന്വലിച്ച പണവുമായി യാത്ര ചെയ്യുന്നതിനിടെ അശോക്നഗറിനും സദോരയ്ക്കും ഇടയില് വച്ചാണ് അന്ന് ആക്രമണം ഉണ്ടായത്.