ഭൂമിയിലെ മൃഗങ്ങളില് ഇണചേരല് സമയങ്ങള് തികച്ചും വ്യത്യസ്തമാണ്. പല ജീവികളും വർഷത്തിൽ ഒരു പ്രത്യേക സമയത്ത് മാത്രം ഇണചേരുമ്പോൾ, മറ്റു ചിലവ വർഷം മുഴുവനും പ്രത്യുൽപ്പാദനം നടത്താൻ കഴിവുള്ളവയാണ്. മൃഗങ്ങളില് സാധാരണ മൂന്ന് തരത്തിലുള്ള പ്രജനന രീതികളാണ് കാണപ്പെടുന്നത്. വർഷത്തില് ഒരു പ്രത്യേക കാലയളവിൽ മാത്രം ഇണചേരുന്ന സീസണൽ ബ്രീഡേഴ്സ് (ആട്, മാൻ, കുതിര, ചിലയിനം പക്ഷികൾ തുടങ്ങിയവ), വർഷത്തിൽ ഏതുസമയത്തും ഇണചേരാനും പ്രജനനം നടത്താനും സാധിക്കുന്ന കണ്ടിന്യൂവസ് ബ്രീഡേഴ്സ് (മനുഷ്യർ, ചിമ്പൻസികൾ, മുയലുകൾ, എലികൾ തുടങ്ങിയവ), അനുകൂല സാഹചര്യങ്ങളില് മാത്രം ഇണചേരുന്ന ഓപ്പർച്യൂണിസ്റ്റിക് ബ്രീഡേഴ്സ് (മരുഭൂമിയിലെ ചില പക്ഷികളും തവളകളും) എന്നിവയാണ് ഈ മൂന്നുവിഭാഗങ്ങള്. സന്താനങ്ങളുടെ അതിജീവനം ഉറപ്പാക്കുന്നതിന് വേണ്ടിയാണ് മിക്ക മൃഗങ്ങൾക്കും ഇണചേരൽ സീസണുകൾ ഉള്ളത്. പക്ഷേ എന്തുകൊണ്ടാണ് മനുഷ്യരില് ഇതില്ലാത്തത്?
മറ്റു പല ജീവികളെയും പോലെ മനുഷ്യർക്ക് പ്രത്യേക ഇണചേരൽ സീസൺ ഇല്ലാത്തതിന് പിന്നിൽ പരിണാമപരമായ (Evolutionary) കാരണങ്ങളുണ്ട്. അനുകൂലമായ ചുറ്റുപാടുകളാണ് അതില് ആദ്യത്തേത്. സന്താനങ്ങള് ജനിക്കുന്ന സമയത്ത് ആവശ്യത്തിന് ഭക്ഷണവും നല്ല കാലാവസ്ഥയും ഉറപ്പാക്കാന് കഴിയും വിധമാണ് മൃഗങ്ങള് ഇണചേരുന്നത്. എന്നാൽ മനുഷ്യർ ഉഷ്ണമേഖലാ പ്രദേശങ്ങളിൽ (Tropical regions) നിന്ന് പരിണമിച്ചു വന്നവരായതിനാൽ അവിടെ വർഷം മുഴുവനും ഭക്ഷണവും അനുകൂല കാലാവസ്ഥയും ലഭ്യമായിരുന്നു. കൃഷി, വസ്ത്രം, പാർപ്പിടം തുടങ്ങി സാങ്കേതിക വിദ്യകൾ വികസിപ്പിച്ചതോടെ ഏത് കാലാവസ്ഥയേയും പ്രതികൂല സാഹചര്യത്തെയും അതിജീവിക്കാനുള്ള ശേഷി മനുഷ്യര് കൈവരിക്കുകയും ചെയ്തു.
മറഞ്ഞിരിക്കുന്ന അണ്ഡോത്പാദനം (Concealed Ovulation) ആണ് മറ്റൊന്ന്. പല മൃഗങ്ങളിലും പെൺവർഗ്ഗം ഗർഭധാരണത്തിന് തയ്യാറാകുമ്പോൾ ശരീരത്തിൽ പ്രകടമായ മാറ്റങ്ങൾ (ഉദാഹരണത്തിന് നിറം മാറ്റം അല്ലെങ്കിൽ പ്രത്യേക ഗന്ധം) ഉണ്ടാകാറുണ്ട്. എന്നാൽ മനുഷ്യരില് ഇത്തരം പുറമെ കാണാവുന്ന മാറ്റങ്ങൾ ഇല്ല. ഇതുമൂലം മനുഷ്യരില് മറ്റുജീവികളിലേതുപോലെ പ്രജനന കാലത്തിനായുള്ള കാത്തിരിപ്പും ഗര്ഭധാരണത്തിന് തയ്യാറാണെന്ന് തിരിച്ചറിയുമ്പോള് മല്സരിച്ചുള്ള ഇണ ചേരലുമില്ല. ഏത് സമയവും ഇണചേരലും പ്രത്യുല്പാദനവും നടക്കും എന്നതിനാല് സീസണല് പ്രജനനത്തില് ഉണ്ടാകാറുള്ള സമ്മര്ദ്ദം മനുഷ്യര്ക്ക് നേരിടേണ്ടിവരുന്നില്ല.
സാമൂഹിക ബന്ധങ്ങളാണ് മൂന്നാമത്തെ ഘടകം. മനുഷ്യരിൽ ലൈംഗികത പ്രജനനത്തിന് മാത്രമല്ല. ദമ്പതികൾ തമ്മിലുള്ള ബന്ധം ദൃഢമാക്കാനും ഒന്നിച്ച് കുഞ്ഞുങ്ങളെ വളർത്താനും സഹായിക്കുന്നു. കുതിരകളെയും ആനകളെയും പോലെ ജനിച്ച ഉടനെ നടക്കാൻ ശേഷിയുള്ളവരല്ല മനുഷ്യക്കുഞ്ഞുങ്ങള്. അവര് ദീർഘകാലം മാതാപിതാക്കളുടെ സംരക്ഷണം ആവശ്യപ്പെടുന്നവരാണ്. വർഷം മുഴുവനും ഇണചേരാന് കഴിയും എന്നത് ഇത്തരം സമ്മര്ദങ്ങളെയും ലഘൂകരിക്കും. മനുഷ്യരില് ലൈംഗികത എന്നത് പ്രത്യുത്പാദനത്തിന് പുറമെ സാമൂഹിക ബന്ധങ്ങൾ ദൃഢമാക്കാനും പിരിമുറുക്കം കുറയ്ക്കാനുമുള്ള മാർഗ്ഗമായും പരിണമിച്ചു കഴിഞ്ഞു.
ജീവശാസ്ത്രപരമായ കഴിവുകളാണ് പ്രത്യുത്പാദനത്തിന് ആധാരമെങ്കിലും, അത് എപ്പോൾ സംഭവിക്കണമെന്ന് തീരുമാനിക്കുന്നത് ജീവിക്കുന്ന ചുറ്റുപാടുകളും സാചചര്യങ്ങളുമാണ്. അതേസമയം മനുഷ്യർക്കിടയിൽ ചില പ്രത്യേക സമയങ്ങളിൽ ജനനനിരക്ക് കൂടുന്നതായി കണക്കുകൾ സൂചിപ്പിക്കുന്നു. ഉദാഹരണത്തിന്, ക്രിസ്മസ്, പുതുവത്സരം തുടങ്ങി അവധി ദിനങ്ങൾക്ക് ഒൻപത് മാസങ്ങൾക്ക് ശേഷം ജനനനിരക്കിൽ വലിയ വർദ്ധനവ് രേഖപ്പെടുത്താറുണ്ട്. അവധി ദിനങ്ങളില് ദമ്പതികൾക്ക് ഒരുമിച്ച് കൂടുതൽ സമയം ചെലവഴിക്കാനും സാഹചര്യങ്ങളുടെ സമ്മര്ദമില്ലാതെ ഇണചേരാന് സാധിക്കുന്നതും കൊണ്ടാണ് ഈ 'ക്ലസ്റ്റർ ബർത്ത്' (Cluster Births) സംഭവിക്കുന്നത്.
ചുരുക്കത്തിൽ, മനുഷ്യരിലെ ഗർഭധാരണം എന്നത് കേവലം ജൈവികമായ പ്രക്രിയ മാത്രമല്ല. മറിച്ച് നമ്മുടെ സാമൂഹിക ജീവിതത്തിന്റെ പ്രതിഫലനം കൂടിയാണ്. എന്നാല് ഇക്കാര്യത്തില് മനുഷ്യര് തനിച്ചല്ല. ബൊനോബോകൾ, ചിമ്പാൻസികൾ തുടങ്ങിയ കുരങ്ങുകളിലും ഇണചേരൽ സീസണുകൾ ഇല്ല. നമ്മളെപ്പോലെ, അവ വർഷം മുഴുവനും ഇണ ചേരുകയും പ്രത്യുൽപാദനം നടത്തുകയും പരസ്പര സഹകരണത്തോടെ ജീവിക്കുകയും ചെയ്യുന്നു.
അമേരിക്കൻ ജീവശാസ്ത്രജ്ഞനനായ സ്കോട്ട് ട്രാവേഴ്സ് ഫോബ്സില് പ്രസിദ്ധീകരിച്ച ലേഖനത്തില് നിന്നും...