ദിവസങ്ങള്‍ പെട്ടന്ന് തീരുന്നതായി തോന്നാറുണ്ടോ? അറിയാം ഭൂമിയുടെ ഭ്രമണ വേഗതയിലെ മാറ്റം

ദിവസങ്ങള്‍ പെട്ടന്ന് തീരുന്നതായി തോന്നുന്നില്ലേ. പകലും രാത്രിയും എത്ര പെട്ടന്നാണ് പൊയ്ക്കൊണ്ടിരിക്കുന്നത്.. പല കാര്യങ്ങള്‍ ചെയ്തു തീര്‍ക്കാന്‍ പോലും സമയം കിട്ടുന്നില്ല. ചില ദിവസങ്ങളില്‍ ഉറങ്ങാന്‍ പോലും സമയം തികയാതെ വരുന്നു. ദിവസങ്ങളിങ്ങനെ അതി വേഗം സഞ്ചരിച്ചു കൊണ്ടേയിരിക്കുന്നു. കോവിഡ് സമയവും അന്നത്തെ ലോക്ക്ഡൗണ്‍ കാലവും കഴിഞ്ഞിട്ട് വര്‍ഷം അഞ്ചാകാന്‍ പോകുന്നു.

എന്നാല്‍  നമ്മളില്‍ പലര്‍ക്കും 2020 ല്‍ നിന്ന് 2025 ലേക്കുള്ള കാലയളവ് കണ്ണടച്ച് തുറക്കുന്നത് പോലെയാകും തോന്നുക. എന്തിന് ഈ കാലത്തിന് അനുസരിച്ച് പ്രായം കൂടുന്നത് പോലും നമ്മളില്‍ പലരും അറിയുന്നില്ല എന്നതാണ് വാസ്തവം. വര്‍ഷങ്ങളെല്ലാം മാസങ്ങളുടെ ദൈര്‍ഘ്യത്തിലാണ് ഇപ്പോള്‍ കടന്നുപൊയ്കൊണ്ടിരിക്കുന്നത്. 

എന്നാല്‍ ഇതൊരു തോന്നലാണെന്ന് കരുതുന്നവർക്ക് തെറ്റി. ശാസ്ത്രലോകത്തിന്റെ പുതിയ കണ്ടെത്തലുകൾ അനുസരിച്ച്, ഭൂമിയുടെ ഭ്രമണ വേഗത വർദ്ധിച്ചിരിക്കുകയാണ്. അതായത്, ഭൂമി പഴയതിനേക്കാൾ വേഗത്തിൽ കറങ്ങുന്നു. ഇത് നമ്മുടെ ദിവസങ്ങളുടെ ദൈർഘ്യം മില്ലിസെക്കൻഡുകൾ കുറയ്ക്കാൻ ഇടയാക്കുന്നു. കേൾക്കുമ്പോൾ നിസ്സാരമെന്ന് തോന്നാമെങ്കിലും, ആഗോള സമയ സൂചികയിൽ  ഇത് വലിയ മാറ്റങ്ങൾക്ക് കാരണമാകും.

2020 മുതൽ ഭൂമിയുടെ കറക്കത്തിലെ ഈ വേഗത വർദ്ധനവ് ശാസ്ത്രലോകത്തിന്റെ ശ്രദ്ധയിൽപ്പെട്ടിരുന്നു. അതായത്, ഭ്രമണ വേഗതയിലെ ഈ മാറ്റം പുതിയതല്ല. ഈ പ്രവണത തുടരുകയാണെങ്കിൽ, 2029 ഓടെ നമ്മുടെ ക്ലോക്കുകളിൽ നിന്ന് ഒരു ലീപ്പ് സെക്കൻഡ് പോലും നീക്കം ചെയ്യേണ്ടി വന്നേക്കാം. സാധാരണയായി, ലീപ്പ് സെക്കൻഡുകൾ ക്ലോക്കുകളിലേക്ക് ചേർക്കുകയാണ് പതിവ്, ഭൂമിയുടെ കറക്കം മന്ദഗതിയിലാകുമ്പോൾ സമയത്തെ ക്രമീകരിക്കാൻ ഇത് സഹായിക്കും. എന്നാൽ, ഇപ്പോൾ കറക്കം വേഗത്തിലായതിനാൽ, ഒരു സെക്കൻഡ് കുറയ്ക്കേണ്ടി വരുന്നാല്‍ അത് ചരിത്രത്തിൽ തന്നെ ആദ്യമായിരിക്കും.

കോടിക്കണക്കിന് വർഷങ്ങളായി ഭൂമിയുടെ ഭ്രമണം ക്രമേണ മാറിക്കൊണ്ടിരിക്കുന്നുണ്ട്. വെങ്കലയുഗത്തിൽ, ഓരോ ദിവസവും ഇപ്പോഴുള്ളതിനേക്കാൾ അര സെക്കൻഡ് കുറവായിരുന്നു എന്നാണ് ശാസ്ത്രജ്ഞർ പറയുന്നത്. ഭൂമിക്ക് ഒരു പൂർണ്ണ ഭ്രമണം പൂർത്തിയാക്കാൻ ഏകദേശം 86,400 സെക്കൻഡുകൾ ആവശ്യമാണ്. എന്നാൽ ഈ സംഖ്യ കൃത്യമല്ല. ഭൂകമ്പങ്ങൾ, സമുദ്രത്തിലെ വേലിയേറ്റം, അഗ്നിപർവത പ്രവർത്തനങ്ങൾ, ഉപരിതലത്തിനടിയിലെ മാറ്റങ്ങൾ തുടങ്ങി നിരവധി ഘടകങ്ങൾ ഭൂമിയുടെ ഭ്രമണ വേഗതയെ സ്വാധീനിക്കുന്നുണ്ട്.

ഇന്റര്‍നാഷണൽ എർത്ത് റൊട്ടേഷൻ ആൻഡ് റഫറൻസ് സിസ്റ്റംസ് സർവീസ്  പറയുന്നതനുസരിച്ച്, 2020 മുതൽ ഭൂമിയുടെ ഭ്രമണ വേഗം കൂടിയിട്ടുണ്ട്. ഈ വർഷം ജൂലൈ 9, ജൂലൈ 22, ഓഗസ്റ്റ് 5 എന്നീ തീയതികളാണ് ഏറ്റവും കുറഞ്ഞ ദൈർഘ്യമുള്ള ദിവസങ്ങളായി രേഖപ്പെടുത്തിയത്.

എന്നിരുന്നാലും, ഈ അസാധാരണ വേഗതയ്ക്ക് പിന്നിലെ കൃത്യമായ കാരണം ഇപ്പോഴും വ്യക്തമല്ല. ഈ പ്രതിഭാസത്തെക്കുറിച്ച് പഠനങ്ങൾ ഇപ്പോഴും നടന്നുകൊണ്ടിരിക്കുകയാണ്. സമുദ്രങ്ങളിലോ അന്തരീക്ഷത്തിലോ ഉണ്ടാകുന്ന മാറ്റങ്ങൾ ഇത്ര പെട്ടെന്നുള്ള വർദ്ധനവിന് കാരണമാകാൻ തക്ക ശക്തമല്ലെന്നാണ് നിലവിലുള്ള വിലയിരുത്തൽ. കൂടുതൽ പഠനങ്ങളിലൂടെ മാത്രമേ ഇതിന്റെ യഥാർഥ കാരണം കണ്ടെത്താനാകൂ.

ഈ മാറ്റങ്ങൾ നമ്മുടെ ദൈനംദിന ജീവിതത്തെ എങ്ങനെ ബാധിക്കുമെന്നും ആഗോള സമയക്രമീകരണത്തിൽ ഇത് എന്ത് പ്രത്യാഘാതങ്ങൾ ഉണ്ടാക്കുമെന്നും കാത്തിരുന്ന് കാണേണ്ടതുണ്ട്. ഒരു ലീപ്പ് സെക്കൻഡ് ഒഴിവാക്കുന്നത് ഇന്റർനെറ്റ് സെർവറുകൾ, സാറ്റലൈറ്റ് നാവിഗേഷൻ സിസ്റ്റങ്ങൾ, മറ്റ് സാങ്കേതികവിദ്യകൾ എന്നിവയിൽ വലിയ സ്വാധീനം ചെലുത്തിയേക്കാം.‌