വിവാദങ്ങളിൽ നിറയുകയാണ് പാലാരിവട്ടം പാലം. ഉദ്ഘാടനം കഴിഞ്ഞ് രണ്ട് വർഷം കൊണ്ട് ഗതാഗത യോഗ്യമല്ലാതായതോടെയാണ് എറണാകുളത്തെ പാലാരിവട്ടം മേൽപ്പാലം വാർത്തകളിൽ ഇടം നേടിയത്. പാലാരിവട്ടം പാലം പഞ്ചവടിപാലമാവുമോ എന്ന് ഹൈക്കോടതി പോലും ചോദിച്ചിരിക്കുകയാണ്.
പാലത്തെ കുറിച്ച് ഇതിനോടകം നിരവധി ട്രോളുകളും ഇറങ്ങിക്കഴിഞ്ഞിട്ടുണ്ട്. എന്നാൽ പൊളിച്ച് പണിയാൻ തീരുമാനിച്ച പാലത്തെ പരസ്യത്തിനായി ഉപയോഗിച്ചാലോ. ഭക്ഷണത്തിന് പ്രസിദ്ധമായ തലശ്ശേരിയിലാണ് പാലാരിവട്ടം പാലം പരസ്യത്തിന് ഉപയോഗിക്കുന്നത്. അതും മലയാളികളുടെ പ്രിയപ്പെട്ട ഭക്ഷണമായ പുട്ടിന് വേണ്ടി.
തൊട്ടാല്‍ പൊളിയുന്ന കൺസ്ട്രക്ഷൻ, പാലാരിവട്ടം പുട്ട്. എന്നാണ് തലശ്ശേരിയിലെ ലാഫെയർ എന്ന ഹോട്ടൽ തങ്ങളുടെ പുട്ടിന് നൽകുന്ന വിശേഷണം. പാലാരിട്ടം ഫ്ലൈഓവറിന്റെ അത്രയും സോഫ്റ്റാണ് തങ്ങളുടെ പുട്ടെന്നാണ് ഹോട്ടൽ അവകാശപ്പെടുന്നത്.
പാലാരിവട്ടം പുട്ട് മാത്രമല്ല ലാഫെയറിലെ സ്പെഷ്യൽ. മരട് നെയ്റോസ്റ്റും ഉണ്ട് കൂട്ടിന്. പൊളിക്കാനായി പണിഞ്ഞത്; പൊളി ബ്രേക്ക് ഫാസ്റ്റ് എന്ന ടാഗ്‍ലൈനോടെയാണ് അവതരിപ്പിച്ചിരിക്കുന്നത്. കായൽ കയ്യേറി അനധികൃതമായി പണിതതിന്റെ പേരിലാണ് മരടിലെ ഫ്ലാറ്റുകൾ പൊളിച്ചു നീക്കാൻ ഉത്തരവ്. ഇതിന്റെ പേരിൽ ഫ്ലാറ്റ് ഉടമകളും ഉദ്യേഗസ്ഥരും തമ്മിലുള്ള തർക്കങ്ങളും സമരവും തുടരുകയാണ്.
പരസ്യങ്ങൾ ഇതിനോടകം മലയാളി സോഷ്യൽ മീഡിയ ഫീഡുകളിൽ വൈറലായിട്ടുണ്ട്. നിരവധി കമന്റുകളാണ് പരസ്യത്തിന് ലഭിക്കുന്നത്. പരസ്യ വാചകങ്ങൾക്ക് പിന്നിൽ കോഴിക്കോടുള്ള പരസ്യ ഏജൻസിയാണ്. മനു ഗോപാലാണ് ഇത് എഴുതിയിരിക്കുന്നത്.