സൗന്ദര്യവര്‍ധക ക്രീമുകള്‍ അപടകാരികളോ?; വൃക്കകളെയും കരളിനെയും നാഡീവ്യൂഹത്തെയും തകരാറിലാക്കുമെന്ന് മുന്നറിയിപ്പ്

വെളുത്ത ചര്‍മം,തിളക്കമുള്ള ചര്‍മം, സുന്ദരമായ മുഖം അങ്ങനെ സൗന്ദര്യത്തിന്‍റെ പേരില്‍ പല കച്ചവട വാഗ്ദാനങ്ങളും സുലഭമാണ്. ഇവയിലൊക്കെ നമ്മളില്‍ പലരും ആകൃഷ്ടരാകാറുമുണ്ട്. എന്നാല്‍ ഇത്തരം ഉൽപ്പന്നങ്ങളുടെ പിന്നിലെ അപകടകരമായ സത്യം പലരും തിരിച്ചറിയുന്നില്ലെന്നതാണ് വാസ്തവം. നിറം വര്‍ധിപ്പിക്കാൻ ഉപയോഗിക്കുന്ന ചില സൗന്ദര്യവർദ്ധക ക്രീമുകൾ ജീവൻ വരെ അപകടത്തിലാക്കാം എന്ന മുന്നറിയിപ്പുമായി മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA) രംഗത്തെത്തിയിരിക്കുകയാണ്.

നിരോധിക്കപ്പെട്ട ഉൽപ്പന്നങ്ങൾ

കഠിനമായ ലബോറട്ടറി പരിശോധനകൾക്കൊടുവിൽ, അപകടകരമായ അളവിൽ മെർക്കുറി (രസം), ലെഡ് (ഈയം) എന്നിവ അടങ്ങിയ മൂന്ന് ജനപ്രിയ സൗന്ദര്യവർദ്ധക ക്രീമുകൾക്ക് മഹാരാഷ്ട്ര FDA നിരോധനം ഏർപ്പെടുത്തി. ഗോറി ബ്യൂട്ടി ക്രീം, ഫേസ് ഫ്രഷ് ഗോൾഡ് ബ്യൂട്ടി ക്രീം & സിറം, ഗോൾഡൻ സ്റ്റാർ ബ്യൂട്ടി ക്രീം എന്നവയാണ് ആ ഉത്പ്പന്നങ്ങള്‍. നാഗ്പൂരിലെ മെഡിക്കൽ വിദഗ്ധർ നടത്തിയ പഠനത്തിൽ വിശദീകരിക്കാനാവാത്ത വൃക്ക സംബന്ധമായ അസുഖങ്ങൾ ബാധിച്ച 18 സ്ത്രീകളെ കണ്ടെത്തുകയുണ്ടായി. ഇവർ എല്ലാവരും സ്ഥിരമായി ഗോറി ബ്യൂട്ടി ക്രീം ഉപയോഗിക്കുന്നവരായിരുന്നു. ഈ ഉൽപ്പന്നങ്ങളിൽ അനുവദനീയമായ അളവിനേക്കാൾ 752 മടങ്ങ് അധികം മെർക്കുറി അടങ്ങിയിട്ടുള്ളതായി പരിശോധനയിൽ തെളിഞ്ഞു.

ശരീരത്തെ എങ്ങനെ ബാധിക്കുന്നു?

ചർമ്മത്തിന് നിറം നൽകുന്ന മെലാനിൻ ഉൽപ്പാദിപ്പിക്കുന്ന എൻസൈമുകളെ മെർക്കുറി തടയുന്നു. ഇത് ചർമ്മത്തെ പെട്ടെന്ന് വെളുത്തതാക്കുന്നുണ്ടെങ്കിലും യഥാർത്ഥത്തിൽ ചർമ്മത്തിന് ഏൽക്കുന്ന ഒരു രാസപ്രഹരമാണ്.ചർമ്മം ഒരു സ്പോഞ്ച് പോലെ ഈ വിഷാംശങ്ങളെ ആഗിരണം ചെയ്യുകയും രക്തത്തിലൂടെ വൃക്കകളിലെത്തിക്കുകയും ചെയ്യുന്നു. വൃക്കകളുടെ പ്രവർത്തനം തകരാറിലാകാനും ഇത് സ്ഥിരമായ അവയവ തകരാറുകൾക്കും കാരണമാകുന്നു. ഈ വിഷാംശം രക്തത്തിലൂടെ തലച്ചോറിലെത്തുകയും ഓർമ്മശക്തി കുറയുക, വിറയൽ, ഉത്കണ്ഠ, ഉറക്കമില്ലായ്മ, നാഡീസംബന്ധമായ തളർച്ച എന്നിവ ഉണ്ടാക്കുകയും ചെയ്യുന്നു. മെർക്കുറി അടങ്ങിയ ക്രീമുകൾ ഉപയോഗിക്കുന്നത് ഉപയോക്താവിനെ മാത്രമല്ല വീട്ടിലുള്ള കുട്ടികളെയും കുടുംബാംഗങ്ങളെയും പരോക്ഷമായി ബാധിക്കുന്നു. ഇത് വായുവിലൂടെ പടരാൻ സാധ്യതയുണ്ട്.

ശ്രദ്ധിക്കേണ്ട കാര്യങ്ങൾ

രണ്ടാഴ്ചയ്ക്കുള്ളിൽ ചർമ്മം വെളുക്കുമെന്ന് വാഗ്ദാനം ചെയ്യുന്ന ഉൽപ്പന്നങ്ങളെ സൂക്ഷിക്കുക. ഉൽപ്പന്നത്തിന്റെ പാക്കറ്റിൽ നിർമാതാവിന്റെ വിലാസം, ബാച്ച് നമ്പർ, നിർമ്മിച്ച തീയതി, എക്സ്പയറി തീയതി എന്നിവ കൃത്യമായി രേഖപ്പെടുത്തിയിട്ടുണ്ടോ എന്ന് പരിശോധിക്കുക. അംഗീകൃത ഫാർമസികളിൽ നിന്നല്ലാതെ സോഷ്യൽ മീഡിയ വഴി വിൽക്കുന്ന അവിശ്വസനീയമായ സൗന്ദര്യവർദ്ധക ഉൽപ്പന്നങ്ങൾ വാങ്ങാതിരിക്കുക. ചുരുക്കിപ്പറഞ്ഞാല്‍ സൗന്ദര്യത്തേക്കാൾ ഉപരിയായി നിങ്ങളുടെ ആരോഗ്യത്തിനാണ് മുൻഗണന നൽകേണ്ടതെന്നാണ് ആരോഗ്യവിദഗ്ധർ ഓർമ്മിപ്പിക്കുന്നത്. അതിനാല്‍ വിശ്വാസയോഗ്യമല്ലാത്ത സൗന്ദര്യവര്‍ധക ഉത്പ്പന്നങ്ങള്‍ കയ്യിലുണ്ടെങ്കില്‍ ഉടന്‍ തന്നെ ഒഴിവാക്കുക.