ഒരു രൂപയ്ക്ക് ഷൂ ഓഫര്‍; കോഴിക്കോട്ട് സംഘർഷം, പൊലീസ് ലാത്തി വീശി, കടയുടമകൾ കസ്റ്റഡിയിൽ

കോഴിക്കോട്  മാനാഞ്ചിറയില്‍ ഒരു രൂപ നോട്ടിന് ഒരു ഷൂ  ഓഫര്‍ ചെയ്ത കട ഉദ്ഘാടനത്തില്‍ സംഘര്‍ഷം. ഷൂ വാങ്ങാന്‍ രാവിലെ മുതല്‍ ജനം തിക്കിത്തിരക്കി എത്തിയതാണ് സംഘര്‍ഷത്തില്‍ കലാശിച്ചത്. കട ഉടമകളെ പൊലീസ് കസ്റ്റഡിയിലെടുത്തു. ആദ്യത്തെ നൂറുപേര്‍ക്ക് ഒരു രൂപയ്ക്ക് ഷൂ നല്‍കുമെന്ന് ഓഫര്‍ നല്‍കി പറ്റിച്ചെന്നാണ് ആരോപണം.

സോഷ്യൽ മീഡിയയിലൂടെ പ്രചരിച്ച ആകർഷകമായ പരസ്യം കണ്ടാണ് പുലർച്ചെ മുതൽ നൂറുകണക്കിന് ആളുകൾ കടയുടെ മുന്നിൽ തടിച്ചുകൂടിയത്. സമയം ചെല്ലുന്തോറും തിരക്ക് നിയന്ത്രണാതീതമാവുകയും തിക്കും തിരക്കും വർധിക്കുകയും ചെയ്തതോടെ പൊലീസിന് ഇടപെടേണ്ടി വന്നു. സ്ഥിതിഗതികൾ ശാന്തമാക്കാൻ പൊലീസ് ലാത്തി വീശിയതോടെ പ്രദേശം സംഘർഷഭരിതമായി.

മതിയായ സുരക്ഷാ ക്രമീകരണങ്ങളില്ലാതെ ഇത്തരം ഓഫറുകൾ നൽകി ജനങ്ങളെ അപകടത്തിലാക്കിയതിനെ തുടർന്നാണ് കടയുടമകളെ പൊലീസ് കസ്റ്റഡിയിലെടുത്തത്. ഒരു രൂപയ്ക്ക് ഷൂ ലഭിക്കുമെന്ന പ്രതീക്ഷയിൽ ദൂരെ സ്ഥലങ്ങളിൽ നിന്നുപോലും എത്തിയവർ ഒടുവിൽ നിരാശയോടെയും പൊലീസിന്റെ നടപടിയെത്തുടർന്നുണ്ടായ പരിഭ്രാന്തിയിലും മടങ്ങി.