TAGS

  • കേന്ദ്ര ആഭ്യന്തരമന്ത്രി അമിത് ഷായ്ക്കും സംഘപരിവാറിനുമെതിരായ പ്രതിഷേധമെന്ന പേരിൽ യൂത്ത് കോൺഗ്രസ് നടത്തിയ പന്തംകൊളുത്തി പ്രകടനത്തിന്റെ യഥാർഥ ലക്ഷ്യം യൂണിവേഴ്സിറ്റി ഹോസ്റ്റലും എസ്എഫ്ഐയുമായിരുന്നു എന്ന് പ്രതിപക്ഷ നേതാവ് പിണറായി വിജയൻ

കേന്ദ്ര ആഭ്യന്തരമന്ത്രി അമിത് ഷായ്ക്കും സംഘപരിവാറിനുമെതിരായ പ്രതിഷേധമെന്ന പേരിൽ യൂത്ത് കോൺഗ്രസ് നടത്തിയ പന്തംകൊളുത്തി പ്രകടനത്തിന്റെ യഥാർഥ ലക്ഷ്യം യൂണിവേഴ്സിറ്റി ഹോസ്റ്റലും എസ്എഫ്ഐയുമായിരുന്നു എന്ന് പ്രതിപക്ഷ നേതാവ് പിണറായി വിജയൻ ആരോപിച്ചു. സംസ്ഥാന സർക്കാരിന്റെ ഭരണപരാജയങ്ങളിൽ നിന്ന് ജനശ്രദ്ധ തിരിക്കാനും സംഘപരിവാറിനെ പ്രീതിപ്പെടുത്താനുമാണ് ആക്രമണം ആസൂത്രണം ചെയ്തതെന്നും അദ്ദേഹം പറഞ്ഞു. Also Read: ‘യുഡിഎഫിലെ പല കാര്യങ്ങളും ഞാനറിയുന്നില്ല’; മുഖ്യമന്ത്രിക്കെതിരെ തുറന്നടിച്ച് അടൂര്‍ പ്രകാശ്

 

സംസ്ഥാനത്തെ വൈദ്യുതി പ്രതിസന്ധി, ആശുപത്രികളിലെ മരുന്ന് ക്ഷാമം, സ്പോൺസർഷിപ്പ് യാത്രകളുമായി ബന്ധപ്പെട്ട വിവാദങ്ങൾ, വിദ്യാഭ്യാസ മേഖലയിലെ കാവിവൽക്കരണം, പ്രളയദുരിതാശ്വാസം തുടങ്ങിയ വിഷയങ്ങളിൽ സർക്കാരിന് മറുപടി പറയാനില്ലെന്നും പിണറായി ആരോപിച്ചു. ഈ വിഷയങ്ങളിൽനിന്ന് ശ്രദ്ധ തിരിക്കാനാണ് യൂണിവേഴ്സിറ്റി ഹോസ്റ്റലിൽ അക്രമം നടത്തിയതെന്നും അദ്ദേഹം പറഞ്ഞു.

യൂത്ത് കോൺഗ്രസ് പ്രകടനം ആരംഭിക്കുന്ന സമയത്താണ് പ്രദേശത്ത് വൈദ്യുതി പോയതെന്നും ഇതിനെതിരെ ഹോസ്റ്റൽ വിദ്യാർഥികൾ പ്രതിഷേധിക്കുകയായിരുന്നുവെന്നും പിണറായി പറഞ്ഞു. വൈദ്യുതി നിയന്ത്രണത്തിനെതിരെ പ്രതിഷേധിച്ച വിദ്യാർഥികളെ കായികമായി നേരിടുന്നത് അംഗീകരിക്കാനാകില്ലെന്നും അദ്ദേഹം വ്യക്തമാക്കി.

മുഖ്യ തെരഞ്ഞെടുപ്പ് കമ്മിഷണർക്കും എസ്‌ഐആർ നടപടിക്കുമെതിരായ രാജ്യവ്യാപക പ്രതിഷേധങ്ങളിൽ എസ്എഫ്ഐ സജീവമായി പങ്കെടുക്കുന്ന സാഹചര്യത്തിൽ, ആ പ്രതിഷേധം ഉപേക്ഷിച്ച് എസ്എഫ്ഐ പ്രവർത്തകരെ ആക്രമിച്ചത് സംഘപരിവാറിനെതിരായ നിലപാടല്ലെന്നും പിണറായി ആരോപിച്ചു. യൂണിവേഴ്സിറ്റി ഹോസ്റ്റലിലേക്ക് തീപ്പന്തങ്ങൾ വലിച്ചെറിഞ്ഞതും വിദ്യാർഥികളെ ആക്രമിച്ചതും ഗുരുതരമായ നടപടികളാണെന്നും അദ്ദേഹം പറഞ്ഞു.

പോലീസിനെതിരെയും പിണറായി ശക്തമായ ആരോപണങ്ങൾ ഉന്നയിച്ചു. യൂത്ത് കോൺഗ്രസ് പ്രവർത്തകർ അക്രമം നടത്തിയപ്പോൾ പോലീസ് കാഴ്ചക്കാരായി നിന്നെന്നും പിന്നീട് ഹോസ്റ്റലിനുള്ളിൽ പ്രവേശിച്ച് വിദ്യാർഥികളെ മർദിച്ചെന്നും അദ്ദേഹം ആരോപിച്ചു. പ്രശ്നപരിഹാരത്തിനായി എത്തിയ എസ്എഫ്ഐ സംസ്ഥാന സെക്രട്ടറിയെയും പോലീസ് മർദിച്ചുവെന്നും അദ്ദേഹം പറഞ്ഞു.

യൂത്ത് കോൺഗ്രസ് പ്രവർത്തകരുടെ ആക്രമണത്തിനും പോലീസിന്റെ നടപടികൾക്കും മുഖ്യമന്ത്രി വി.ഡി.സതീശനും ആഭ്യന്തരമന്ത്രി രമേശ് ചെന്നിത്തലയും മറുപടി പറയണമെന്ന് പിണറായി ആവശ്യപ്പെട്ടു. ക്യാംപസുകളിലെ വിദ്യാർഥികളുടെ ജനാധിപത്യ അവകാശങ്ങൾ സംരക്ഷിക്കണമെന്നും അക്രമത്തിന് നേതൃത്വം നൽകിയ പോലീസ് ഉദ്യോഗസ്ഥർക്കെതിരെ, പ്രത്യേകിച്ച് കന്റോൺമെന്റ് സി.ഐ, എസ്.ഐ എന്നിവർക്കെതിരെ കർശന നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.

ENGLISH SUMMARY:

Leader of Opposition Pinarayi Vijayan alleged that the Youth Congress protest in Thiruvananthapuram, held against Union Home Minister Amit Shah and the Sangh Parivar, was actually aimed at the University hostel and SFI activists. He accused the protesters of deliberately creating violence to divert public attention from the state government’s alleged failures, including the power crisis, medicine shortages and other public issues. Vijayan also alleged that police personnel used excessive force against students and demanded strict action against the officers involved. He called for protection of students’ democratic rights on campuses and sought answers from the Chief Minister and Home Minister over the violence.