‘തൊഴിലാളിയുടെ ഉപജീവനമാര്‍ഗം ആക്രമിക്കപ്പെട്ടതില്‍ ഖേദം’; നഷ്ടം നികത്തുമെന്ന് എ.എ റഹീം

പ്രതിപക്ഷ നേതാവ് പിണറായി വിജയന്റെ വസതിയിൽ എൻഫോഴ്‌സ്‌മെന്റ് ഡയറക്ടറേറ്റ് (ED) നടത്തിയ റെയ്ഡിനെ തുടർന്നുണ്ടായ സി.പി.എം പ്രവർത്തകരുടെ പ്രതിഷേധത്തിനിടെ ഇ.ഡി ഉദ്യോഗസ്ഥർ സഞ്ചരിച്ച വാഹനം തകർത്ത സംഭവത്തിൽ ഖേദം പ്രകടിപ്പിച്ച് എ.എ റഹീം. ഇ.ഡിയെ മുൻനിർത്തി സംഘപരിവാർ നടത്തുന്ന ആസൂത്രിത നീക്കങ്ങൾക്കെതിരെ പ്രവർത്തകരുടെ ഭാഗത്തുനിന്നുണ്ടായ രോഷപ്രകടനത്തിനിടയിലാണ് വാഹനം ആക്രമിക്കപ്പെട്ടതെന്ന് റഹീം പറഞ്ഞു.

പ്രതിഷേധത്തിനിടെ തകർന്ന കാറിന്റെ ഡ്രൈവർ ശ്യാമിന് പരുക്കേൽക്കുകയും അദ്ദേഹത്തിന്റെ ഉപജീവനമാർഗ്ഗം തടസ്സപ്പെടുകയും ചെയ്ത സാഹചര്യത്തിലാണ് ഖേദപ്രകടനവുമായി രംഗത്തെത്തിയത്. സംഭവത്തിൽ ഡ്രൈവർക്കുണ്ടായ നഷ്ടം നികത്താൻ ആവശ്യമായ നടപടികൾ സ്വീകരിക്കുമെന്ന് എ.എ റഹീം എം.പി വ്യക്തമാക്കി.

"ഒരു തൊഴിലാളിയുടെ ഉപജീവനമാർഗ്ഗം ആക്രമിക്കപ്പെട്ടു എന്നതിൽ പാർട്ടിക്ക് കൃത്യമായ ഖേദമുണ്ട്. ആ നഷ്ടം പരിഹരിക്കുന്നതിൽ പാർട്ടിക്ക് ധാർമികതയുണ്ട്. ഡ്രൈവർ ശ്യാമുമായി പാർട്ടി നേതാക്കൾ നേരിട്ട് സംസാരിച്ചിട്ടുണ്ട്. അദ്ദേഹത്തിന്റെ ആശങ്കകൾ പൂർണ്ണമായും നീക്കാനുള്ള കാര്യങ്ങൾ പാർട്ടിയുടെ ഭാഗത്തുനിന്നുണ്ടാകും." - എ.എ റഹീം

വാഹന യൂണിയനുമായി ബന്ധപ്പെട്ട് ഇനിയുള്ള കാര്യങ്ങൾ പരിശോധിക്കുമെന്ന് കടകംപള്ളി സുരേന്ദ്രൻ പറഞ്ഞു. പ്രതിഷേധവുമായി ബന്ധപ്പെട്ട് നിലവിൽ രജിസ്റ്റർ ചെയ്യപ്പെട്ടിട്ടുള്ള കേസ് അതിന്റെ നിയമപരമായ വഴിക്ക് നീങ്ങുമെന്നും അദ്ദേഹം കൂട്ടിച്ചേർത്തു.