15 സീറ്റ് ആവശ്യപ്പെട്ട് യൂത്ത് കോണ്‍ഗ്രസ്; പട്ടിക ചുരുക്കണമെന്ന് സംസ്ഥാന നേതൃത്വം

 

നിയമസഭാ തിരഞ്ഞെടുപ്പിൽ 15 പേർക്ക് സീറ്റ് ആവശ്യപ്പെട്ട് പട്ടിക കൈമാറി യൂത്ത് കോൺഗ്രസ്. സ്ക്രീനിങ് കമ്മിറ്റി അധ്യക്ഷൻ മധുസൂദൻ മിസ്ത്രിക്കാണ് പട്ടിക കൈമാറിയത്. സംസ്ഥാന പ്രസിഡന്റ് ഒ.ജെ.ജനീഷിനെ കൊടുങ്ങല്ലൂരും വർക്കിങ് പ്രസിഡന്റ് ബിനു ചുള്ളിയിലിനെ ചെങ്ങന്നൂരും മൽസരിപ്പിക്കണമെന്നാണ് കത്തിലെ ആവശ്യം. 

 

ദേശീയ സെക്രട്ടറിമാരായ അബിൻ വർക്കിയെ ആറൻമുളയിലും ശ്രീലാൽ ശ്രീധറിനെ ചേലക്കരയിലും കെ.എം. അഭിജിത്തിനെ കൊയിലാണ്ടിയിലോ നാദാപുരത്തോ മൽസരിപ്പിക്കണമെന്നുമാണ്  ആവശ്യം. അതേസമയം, പട്ടിക ചുരുക്കാൻ യൂത്ത് കോൺഗ്രസിനോട് സംസ്ഥാന കോൺഗ്രസ് നേതൃത്വം ആവശ്യപ്പെട്ടു. 

 

കെപിസിസി നേതൃത്വം ഔദ്യോഗികമായി ആദ്യഘട്ട പട്ടിക അടുത്താഴ്ച സ്ക്രീനിങ് കമ്മിറ്റിക്ക് നൽകും. തുടർന്ന് കെപിസിസി അധ്യക്ഷനും പ്രതിപക്ഷ നേതാവും ഡൽഹിയിൽ നടത്തുന്ന ചർച്ചകൾക്ക് ശേഷം ആദ്യ പട്ടിക പ്രഖ്യാപിക്കും.