യുഡിഎഫിലേക്ക് ഇല്ലെന്ന് പ്രഖ്യാപിച്ച ജോസ് കെ.മാണി ഇടതുമുന്നണിയുടെ മധ്യമേഖല ജാഥയുടെ ചുമതലയേറ്റെടുത്തു. കോട്ടയത്ത് എല്ഡിഎഫ് ജില്ലാ നേതാക്കളുമായി ആദ്യ യോഗം ചേര്ന്ന് ജാഥയുടെ ക്രമീകരണം വിലയിരുത്തി. പത്തനംതിട്ട മുതല് എറണാകുളം വരെയാണ് ജോസ് കെ.മാണി വികസന മുന്നേറ്റ ജാഥ നയിക്കുന്നത്.
എല്ഡിഎഫ് വിടുമോ, കേരള കോണ്ഗ്രസ് എം പിളരുമോയെന്ന ചര്ച്ചകളില്ല. എല്ഡിഎഫിനൊപ്പമാണെന്ന് ആവര്ത്തിച്ച് വ്യക്തമാക്കിയ ജോസ് കെ.മാണി എല്ഡിഎഫ് ഏല്പ്പിച്ച ചുമതലയേറ്റെടുത്ത് മുന്നോട്ടുപോവുകയാണ്. വികസനമുന്നേറ്റ ജാഥയുടെ മധ്യമേഖല ക്യാപ്റ്റനാണ് ജോസ് കെ മാണി. കോട്ടയത്തെ കേരള കോണ്ഗ്രസ് എം സംസ്ഥാന കമ്മിറ്റി ഓഫിസില് സിപിഎം, സിപി ഐ ജില്ലാ സെക്രട്ടറിമാരുമായും മറ്റ് ഘടകകക്ഷി പ്രതിനിധികളുമായും ജോസ് കെ.മാണി ജാഥയുടെ ക്രമീകരണം ചര്ച്ച ചെയ്തു . ഫെബ്രുവരി ആറിന് തുടങ്ങി പതിമൂന്നുവരെയാണ് മധ്യമേഖല ജാഥ.
കേരള കോണ്ഗ്രസ് എമ്മിനെതിരെ നടന്നത് തെറ്റായ പ്രചാരണങ്ങളാണെന്ന് സിപിഎം സംസ്ഥാന കമ്മിറ്റി അംഗം കെ. അനില്കുമാര് പറഞ്ഞു.
പാര്ട്ടി ചെയര്മാനെ മധ്യമേഖല ജാഥയുടെ ക്യാപ്റ്റനാക്കിയത് എല്ഡിഎഫ് അര്ഹമായ പരിഗണന നല്കുന്നതിന്റെ തെളിവാണെന്ന് കേരള കോണ്ഗ്രസ് എം നേതാക്കള് ചൂണ്ടിക്കാട്ടുന്നു.