ബിയർ, വൈൻ പാർലറുകൾക്ക് ബാർ ലൈസൻസ് പുതുക്കി നൽകിയതിൽ കോഴ ഇടപാട് നടന്നെന്ന വിവരം എക്സൈസ് മന്ത്രിക്ക് ലഭിച്ചു. സംഭവത്തിൽ വിജിലൻസ് അന്വേഷണം ആവശ്യപ്പെടും. വിഷയത്തിൽ എക്സൈസ് മന്ത്രി എം. ലിജുവും എക്സൈസ് കമ്മിഷണർ എസ്. സാംബശിവ റാവുവും തമ്മിലുള്ള ഭിന്നത രൂക്ഷമായിരിക്കെയാണ് പുതിയ നീക്കം. Also Read: ‘അവന്‍ മരിക്കാന്‍ സാധ്യതയുണ്ട്, നന്നായി നോക്കണം’; മാതാപിതാക്കളുടെ കത്തിലെ വിവരങ്ങള്‍ പുറത്ത്
മൂന്ന് ബിയർ, വൈൻ പാർലറുകൾക്ക് ബാർ ലൈസൻസ് പുതുക്കി നൽകിയതിൽ അസ്വാഭാവികതയുണ്ടെന്ന് മന്ത്രി എം. ലിജു വ്യക്തമാക്കി. സർക്കാർ നയം അട്ടിമറിക്കാൻ അനുവദിക്കില്ലെന്നും സർക്കാരിന്റെ അറിവോ അനുമതിയോ ഇല്ലാതെ ലൈസൻസ് അനുവദിച്ചത് അംഗീകരിക്കാനാകില്ലെന്നും മന്ത്രി പറഞ്ഞു. ലൈസൻസ് പുതുക്കി നൽകിയത് തിടുക്കത്തിലുള്ള നടപടിയായിരുന്നുവെന്നും ഡൽഹിയിൽ മാധ്യമങ്ങളോട് സംസാരിക്കവെ അദ്ദേഹം വ്യക്തമാക്കി.
എറണാകുളം, കോട്ടയം ജില്ലകളിലെ മൂന്ന് ബിയർ, വൈൻ പാർലറുകൾക്ക് ബാർ ലൈസൻസ് പുതുക്കി നൽകിയതിൽ എക്സൈസ് ഡെപ്യൂട്ടി കമ്മിഷണർമാർക്ക് വീഴ്ച സംഭവിച്ചെന്ന മന്ത്രിയുടെ വാദം എക്സൈസ് കമ്മിഷണർ എസ്. സാംബശിവ റാവു തള്ളിയിരുന്നു. ഇതുസംബന്ധിച്ച് കഴിഞ്ഞ ദിവസം നികുതി വകുപ്പ് അഡീഷണൽ ചീഫ് സെക്രട്ടറിക്ക് കമ്മിഷണർ റിപ്പോർട്ട് സമർപ്പിക്കുകയും ചെയ്തു.
എക്സൈസ് കമ്മിഷണറുടെ റിപ്പോർട്ടിന്റെ അടിസ്ഥാനത്തിലാണ് എറണാകുളം, കോട്ടയം ജില്ലകളിലെ ഡെപ്യൂട്ടി കമ്മിഷണർമാരെ സസ്പെൻഡ് ചെയ്തതെന്നായിരുന്നു മന്ത്രിയുടെ വിശദീകരണം. എന്നാൽ, ഉദ്യോഗസ്ഥരുടെ ഭാഗത്തുനിന്ന് വീഴ്ചയുണ്ടായെന്ന വാദം കമ്മിഷണറുടെ റിപ്പോർട്ട് തള്ളിയതോടെ വകുപ്പിനുള്ളിലെ അഭിപ്രായവ്യത്യാസം കൂടുതൽ രൂക്ഷമായി.
2014ൽ യു.ഡി.എഫ് സർക്കാർ കൊണ്ടുവന്ന നയപ്രകാരം ടു സ്റ്റാർ ഹോട്ടലുകൾക്ക് ബാർ ലൈസൻസ് അനുവദിക്കില്ലെന്ന തീരുമാനത്തിന്റെ അടിസ്ഥാനത്തിലായിരുന്നു മൂവാറ്റുപുഴ, എറണാകുളം, പാലാ എന്നിവിടങ്ങളിലെ മൂന്ന് ഹോട്ടലുകളുടെ മദ്യവിതരണ അനുമതി റദ്ദാക്കിയത്. എന്നാൽ, വിവിധ പരിശോധനകളിൽ ഹോട്ടലുകൾക്ക് ത്രീ സ്റ്റാർ പദവിയുണ്ടെന്ന് കണ്ടെത്തിയതിനെ തുടർന്ന് എക്സൈസ് ഡെപ്യൂട്ടി കമ്മിഷണർമാർ ലൈസൻസ് പുതുക്കി നൽകുകയായിരുന്നു.
അന്വേഷണ റിപ്പോർട്ടിൽ ഉദ്യോഗസ്ഥരുടെ ഭാഗത്ത് പിഴവില്ലെന്ന് വ്യക്തമാക്കിയിട്ടും അവർക്കെതിരെ അതിവേഗത്തിൽ അച്ചടക്ക നടപടി സ്വീകരിച്ചതാണ് വിവാദത്തിന് വഴിവെച്ചത്. എക്സൈസ് മന്ത്രി നേരിട്ട് നടപടിക്ക് നിർദേശം നൽകിയെന്ന വിവരവും ചർച്ചയായിട്ടുണ്ട്.