File image
കിഫ്ബിക്ക് പൂട്ടിടണമെന്ന് വിദഗ്ധ സമിതി. കിഫ്ബി പുനഃസംഘടനയുമായി ബന്ധപ്പെട്ട വിദഗ്ധസമിതി റിപ്പോര്‍ട്ട് നിയമസഭയില്‍ വച്ചു. പൊതുവിപണിയില്‍ നിന്ന് കടമെടുക്കാന്‍ അനുവദിക്കരുതെന്നും വിദഗ്ധസമിതി. 10 വര്‍ഷത്തെ പ്രവര്‍‍ത്തനം ഓഡിറ്റിന് വിധേയമാക്കണമെന്നും നിലവിലെ പദ്ധതികള്‍ മുന്‍ഗണനാപ്രകാരം പൂര്‍ത്തിയാക്കണമെന്നും റിപ്പോര്‍ട്ട്.
കിഫ്ബി പ്രവർത്തനം അവലോകനം ചെയ്യുന്ന റിപ്പോർട്ട് മന്ത്രിസഭ അംഗീകരിച്ചിരുന്നു. റിപ്പോർട്ടിന്റെ അടിസ്ഥാനത്തിൽ കിഫ്ബി പ്രവർത്തനം സംബന്ധിച്ച് സർക്കാർ തീരുമാനിക്കും. മുൻ കേന്ദ്ര ധനകാര്യ സെക്രട്ടറി സുധാപിള്ള അധ്യക്ഷയായ സമിതിയാണ് റിപ്പോർട്ട് തയാറാക്കിയത്. എല്‍ഡിഎഫ് സർക്കാർ കിഫ്‌ബിയെ സർക്കാരിന് സമാന്തര സംവിധാനമാക്കി എന്ന വിമർശനമാണ് യുഡിഎഫ് ഉയർത്തിയിരുന്നത്.
അതേസമയം, കിഫ്ബി റിപ്പോര്‍ട്ട് രാഷ്ട്രീയ ആയുധമെന്ന് മുന്‍ധനമന്ത്രി കെ.എന്‍. ബാലഗോപാല്‍ അഭിപ്രായപ്പെട്ടു. കിഫ്ബി പൂട്ടരുത്. കിഫ്ബി മൂലമുണ്ടായ നേട്ടം കണ്ടില്ലെന്ന് നടിക്കരുതെന്നും ബാലഗോപാല്‍ പറഞ്ഞു. കിഫ്ബി നിര്‍ത്തുന്നത് ആഘാതമാകുമെന്ന് മുന്‍മന്ത്രിയും സിപിഎം നേതാവുമായ തോമസ് ഐസകും പറഞ്ഞു. ബജറ്റുവഴി വികസനപദ്ധതി നടപ്പാകില്ല. പ്രഖ്യാപിച്ച പദ്ധതികള്‍ പ്രതിസന്ധിയിലാകും. കിഫ്ബിയുടെ 30000 കോടി ക്യാഷ് ഡെപ്പോസിറ്റായി ഉണ്ട്. അതാണ് മുഖ്യമന്ത്രി വി.ഡി.സതീശന്‍ ലക്ഷ്യമിടുന്നതെന്നും ഐസക് ആരോപിച്ചു.