പരീക്ഷാ തട്ടിപ്പ്; ചോദ്യം ചെയ്യലിന് വരില്ലെന്ന പിഎസ്​സിയുടെ കത്ത് തള്ളി

പരീക്ഷാ തട്ടിപ്പിലെ ചോദ്യം ചെയ്യലിന് ക്രൈംബ്രാഞ്ച് ആസ്ഥാനത്തേക്ക് വരില്ലെന്ന പിഎസ്​സിയുടെ കത്ത് തള്ളി ക്രൈംബ്രാ‍ഞ്ച്. പിഎസ്​സി അംഗങ്ങള്‍ക്ക് പ്രത്യേക പരിരക്ഷയില്ലെന്ന് ഐ.ജി അജിതാ ബീഗം മറുപടി കത്ത് നല്‍കി. ഹാജരാകണോയെന്നതില്‍ നിയമോപദേശം അനുസരിച്ച് പിഎസ്​സി നാളെ തീരുമാനമെടുക്കും. 

ചോദ്യം ചെയ്യലിന് ക്രൈംബ്രാഞ്ച് ആസ്ഥാനത്തേക്ക് വരില്ലെന്നാണ് പിഎസ്​സി ചെയര്‍മാന്‍റെയും അംഗങ്ങളുടെയും നിലപാട്. പിഎസ്​സിക്ക് പ്രത്യേക പരിരക്ഷയുള്ളതിനാല്‍പിഎസ്​സി ആസ്ഥനത്ത് അംഗങ്ങളുടെ മുറിയിലെത്തി ചോദ്യം ചെയ്യാമെന്നും കാണിച്ച് എസ്ഐടിക്ക് കത്തും നല്‍കിയിരുന്നു. ആ കത്തും ആവശ്യവുമാണ് ക്രൈംബ്രാഞ്ച് തള്ളിയത്. പിഎസ്​സി അംഗങ്ങള്‍ക്ക് പ്രത്യേക പരിരക്ഷയൊന്നുമില്ലെന്നും ചോദ്യം ചെയ്യലിന് പറഞ്ഞ സമയത്ത് ക്രൈംബ്രാഞ്ച് ആസ്ഥാനത്തേക്ക് തന്നെ വരണമെന്നും കാണിച്ച് എസ്ഐടിക്ക് നേതൃത്വം കൊടുക്കുന്ന കത്ത് നല്‍കി. 

ക്രൈംബ്രാഞ്ച് വിട്ടുവീഴ്ചക്കില്ലെന്ന് വ്യക്തമാക്കിയതോടെ പിഎസ്​സി തുടര്‍നടപടിക്ക് നിയമോപദേശത്തെ ആശ്രയിക്കുകയാണ്. പരിരക്ഷയുണ്ടോയെന്നും ചോദ്യം ചെയ്യലിന് പോകണോയെന്നുമാണ് ഹൈക്കോടതിയിലെ അഭിഭാഷകനോട് ഉപദേശം തേടിയിരിക്കുന്നത്. നിയമോപദേശത്തിന്‍റെ അടിസ്ഥാനത്തില്‍ നാളെ ചേരുന്ന പിഎസ്​സി യോഗം തീരുമാനമെടുക്കും. ബുധനാഴ്ച മുതലാണ് ചോദ്യം ചെയ്യല്‍.