എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനുമായി ബന്ധപ്പെട്ട രാഷ്ട്രീയ വിവാദങ്ങൾക്കിടെ, അദ്ദേഹത്തെ ചേർത്തുപിടിക്കാനുള്ള നീക്കവുമായി ബിജെപി നേതൃത്വം. കേരളത്തിന്റെ ചുമതലയുള്ള ബിജെപി നേതാവ് പ്രകാശ് ജാവഡേക്കർ വെള്ളാപ്പള്ളിയുടെ വസതിയായ കണിച്ചുകുളങ്ങരയിലെത്തി ചർച്ച നടത്തി. ബിജെപി സംസ്ഥാന-ജില്ലാ നേതാക്കൾക്കൊപ്പം എത്തിയ ജാവഡേക്കർ ഉച്ചവരെ വെള്ളാപ്പള്ളിയോടൊപ്പം സമയം ചിലവഴിക്കുകയും അടച്ചിട്ട മുറിയിൽ രഹസ്യ ചർച്ച നടത്തുകയും ചെയ്തു. വെള്ളാപ്പള്ളി നടേശൻ സ്വീകരിച്ച രാഷ്ട്രീയ നിലപാടുകൾക്ക് ബിജെപി പൂർണ്ണ പിന്തുണ പ്രഖ്യാപിച്ചതായാണ് വിവരം.
അതേസമയം, വെള്ളാപ്പള്ളിയുടെ വിവാദ പ്രസ്താവനകൾക്കെതിരെ സമസ്ത കാന്തപുരം വിഭാഗം ശക്തമായ ഭാഷയിൽ പ്രതികരിച്ചു. വർഗീയ പരാമർശങ്ങൾ നടത്തുന്ന വെള്ളാപ്പള്ളിയെ തിരുത്താൻ സർക്കാർ തയ്യാറാകണമെന്നും ക്രമസമാധാന പ്രശ്നമായി കണ്ട് ഇതിൽ അടിയന്തര തീരുമാനമെടുക്കണമെന്നും സമസ്ത ആവശ്യപ്പെട്ടു. വിഷയത്തിൽ മറുപടി നൽകേണ്ടത് സർക്കാരാണെന്നും അവർ കൂട്ടിച്ചേർത്തു.
കോൺഗ്രസ് നേതാവ് രമേശ് ചെന്നിത്തലയും സർക്കാരിനും വെള്ളാപ്പള്ളിക്കുമെതിരെ രംഗത്തെത്തി. വെള്ളാപ്പള്ളി പരാമർശം തിരുത്തിയില്ലെങ്കിൽ തിരുത്തേണ്ടതില്ലെന്നും, മുഖ്യമന്ത്രി പിണറായി വിജയൻ ഓരോ തിരഞ്ഞെടുപ്പിലും വർഗീയതയെ താലോലിക്കുകയാണെന്നും അദ്ദേഹം കുറ്റപ്പെടുത്തി. പാർലമെന്റ് തിരഞ്ഞെടുപ്പിൽ ന്യൂനപക്ഷ വർഗീയതയെ പ്രോത്സാഹിപ്പിച്ച സർക്കാർ, തദ്ദേശ തിരഞ്ഞെടുപ്പിൽ ഭൂരിപക്ഷ വർഗീയതയെ വളർത്താനാണ് ശ്രമിക്കുന്നത്. ഈ ഇരട്ടത്താപ്പ് മൂലമാണ് കഴിഞ്ഞ തിരഞ്ഞെടുപ്പുകളിൽ എൽഡിഎഫ് പരാജയപ്പെട്ടതെന്നും ചെന്നിത്തല ആരോപിച്ചു.