നടന്‍ ഷൈന്‍ ടോം ചാക്കോ അറസ്റ്റില്‍; ലഹരിക്കേസില്‍ പ്രതി; ഷൈനിന്‍റെ മൊഴി പൊളിച്ച് പൊലീസ്

ലഹരിക്കേസില്‍ ഷൈന്‍ ടോം ചാക്കോയെ കൊച്ചി പൊലീസ് അറസ്റ്റ് ചെയ്തു .  ലഹരിഉപയോഗിച്ചതിനും ഗൂഢാലോനചയ്ക്കുമാണ് കേസെടുത്തത് . എന്‍.ഡി.പി.എസ് ആക്ട് 27, 29 വകുപ്പുകള്‍ ചുമത്തി. എറണാകുളം നോര്‍ത്ത് പൊലീസ് സ്റ്റേഷനില്‍ നാലുമണിക്കൂര്‍ പിന്നിട്ട ചോദ്യം ചെയ്യലിനൊടുവിലാണ് അറസ്റ്റ് രേഖപ്പെടുത്തിയത് . സ്റ്റേഷന്‍ ജാമ്യം ലഭിക്കുന്ന വകുപ്പുകളാണ് ഷൈനെതിരെ ചുമത്തിയത്.  നഖവും മുടിയുമടക്കം സാംപിളുകള്‍ പരിശോധിക്കും.  ലഹരി ഇടപാടുകാരന്‍ സജീറിനെ അറിയാമെന്നും   ഷൈനിന് ചോദ്യം ചെയ്യലില്‍ സമ്മതിക്കേണ്ടിവന്നു. സജീറിനെ തേടി  ഹോട്ടലില്‍ പൊലീസെത്തിയപ്പോഴാണ്  ഷൈന്‍ ജനല്‍ വഴി ചാടി രക്ഷപ്പെട്ടത് .

ലഹരി ഇടപാടുകാരന്‍ സജീറുമായി ഷൈനിന് സാമ്പത്തിക ഇടപാടും കണ്ടെത്തി. ഇറങ്ങിയോടിയ ദിവസം സജീറുമായി 20,000 രൂപയുടെ ഇടപാട് നടത്തി. ആ ദിവസം ലഹരി ഉപയോഗിച്ചില്ലെന്ന് ഷൈന്‍ മൊഴി നല്‍കി. അന്ന് ലഹരി കൈവശം വച്ചിട്ടില്ലെന്നും ഷൈന്‍ ടോം ചാക്കോ പൊലീസിനോട് പറഞ്ഞു. ഈ മൊഴിയുടെ അടിസ്ഥാനത്തിലാണ് ഷൈനിന് ലഹരി പരിശോധന നടത്തുന്നത്.

ഡാന്‍സാഫ് സംഘം  ഗുണ്ടകളാണെന്ന് തെറ്റിധരിച്ച് ഇറങ്ങിയോടുകയായിരുന്നെന്നാണ്  ഷൈന്‍ പൊലീസിനു നല്‍കിയ മൊഴി . എന്നാല്‍ നിരന്തരമായ ചോദ്യങ്ങള്‍ക്കുമുന്നില്‍ ഷൈന്‍ പതറി . ഒടുവില്‍ സജീറുമായുള്ള ബന്ധം സമ്മതിക്കേണ്ടിയും വന്നു.  ഷൈനിന്‍റെ വാട്സാപ് ചാറ്റും കോളുകളും  ഗൂഗിള്‍പേ  അക്കൗണ്ടും  പരിശോധിച്ചാണ്  പൊലീസ് വഴിവിട്ട  ഇടപെടലുകള്‍  ഉറപ്പിച്ചത് .

ഇതിനെ അടിസ്ഥാനപ്പെടുത്തിയുള്ള ചോദ്യം ചെയ്യലിനു മുന്നില്‍ നടന് പിടിച്ചു നില്‍ക്കാനായില്ല . ഇതേ തുടര്‍ന്നാണ്  അറസ്റ്റ് രേഖപ്പെടുത്തിയത് .