മരിച്ച പിഹു (Image Credit: X)

  • മരണകാരണം സ്ഥിരീകരിക്കാന്‍ പോസ്റ്റുമോര്‍ട്ടം റിപ്പോര്‍ട്ട് വരണമെന്നും ഇവര്‍ കഴിച്ച ന്യൂഡില്‍സിന്റെ സാംപിള്‍ പരിശോധനയ്ക്കായി ലാബിലേക്ക് അയച്ചിട്ടുണ്ടെന്നും പൊലീസ്

രാജസ്ഥാനിലെ ജയ്പുരില്‍ നൂഡില്‍സ് കഴിച്ചതിന് പിന്നാലെ ഏഴുവയസുകാരി മരിച്ചു. ഭക്ഷ്യവിഷബാധയേറ്റതാണെന്നാണ് സംശയം. കുട്ടിയുടെ മൂത്ത സഹോദരിയും ആശുപത്രിയില്‍ ചികില്‍സയിലാണ്. പിഹു കുമാവത്  എന്ന കുട്ടിയാണ് മരിച്ചത്. സഹോദരി ദിവ്യാംശിയാണ് ചികില്‍സയിലുള്ളത്. 

വ്യാഴാഴ്ച ഉച്ചയ്ക്ക് ദിവ്യാംശിയും പിഹുവും കൂടി നൂഡില്‍സുണ്ടാക്കി കഴിച്ചു. ക്ഷീണം തോന്നിയതോടെ രണ്ടുപേരും കിടന്നുറങ്ങി. മൂന്ന് മണിയോടെ ഇവരുടെ അമ്മ ജോലി കഴിഞ്ഞ് വീട്ടിലെത്തിയപ്പോഴാണ് മക്കളിലൊരാള്‍ ഉറക്കമെഴുന്നേറ്റിട്ടും ക്ഷീണിതയായിരിക്കുന്നതും ഇളയ മകള്‍ ബോധംകെട്ട് ഉറങ്ങുന്നതും കണ്ടത്. ഉടന്‍ തന്നെ ഇരുവരെയും ആശുപത്രിയില്‍ എത്തിച്ചു. പരിശോധിച്ച ഡോക്ടര്‍മാരാണ് പിഹു മരിച്ചതായി സ്ഥിരീകരിച്ചത്. 

കുട്ടിയുടെ മരണകാരണം സ്ഥിരീകരിക്കാന്‍ പോസ്റ്റുമോര്‍ട്ടം റിപ്പോര്‍ട്ട് വരണമെന്നും ഇവര്‍ കഴിച്ച നൂഡില്‍സിന്റെ സാംപിള്‍ പരിശോധനയ്ക്കായി ലാബിലേക്ക് അയച്ചിട്ടുണ്ടെന്നും പൊലീസ് അറിയിച്ചു. ഇവരുടെ സഹോദരനും അസുഖ ബാധിതനായി രണ്ടുമാസമായി ചികില്‍സയിലാണെന്ന് പൊലീസ് പറയുന്നു.

 കഴിഞ്ഞയാഴ്ച മഹാരാഷ്ട്രയിലെ താനെയിലെ ബേക്കറിയില്‍ നിന്ന് മധുരപലഹാരം വാങ്ങിക്കഴിച്ച യുവാവും ഭക്ഷ്യവിഷബാധയേറ്റ് മരിച്ചിരുന്നു. ഇയാള്‍ക്കൊപ്പം മധുരം കഴിച്ച അഞ്ചു പേരും കടുത്ത ഛര്‍ദിയെയും വയളിറക്കത്തെയും തുടര്‍ന്ന് ആശുപത്രിയിലായി. ഇവരിലൊരാള്‍ക്ക് പിന്നീട് ടൈഫോയ്ഡും സ്ഥിരീകരിച്ചിരുന്നു. 

ENGLISH SUMMARY:

A seven-year-old girl died in Jaipur, Rajasthan, after reportedly eating noodles, with suspected food poisoning believed to be the cause. The victim, identified as Pihu Kumawat, fell ill along with her elder sister Divyanshi after the two prepared and ate noodles at home on Thursday. Their mother found them unwell when she returned from work and rushed both children to hospital, where doctors confirmed Pihu's death while her sister was admitted for treatment. Police said the exact cause of death will be established through the post-mortem report, while samples of the noodles have been sent to a laboratory for testing.