'പൊതുജനം എസി ബസിൽ യാത്ര ചെയ്‌താൽ മതി; ഇനി മുതൽ എസി ബസുകൾ മാത്രമേ വാങ്ങുകയുള്ളൂ'

തമിഴ്നാട് സർക്കാർ ഇനി മുതൽ എസി ബസുകൾ മാത്രമേ വാങ്ങുകയുള്ളൂവെന്ന് മുഖ്യമന്ത്രി വിജയ് അറിയിച്ചതായി ഗതാഗത മന്ത്രി വിജയ് തമിഴൻ പാർത്ഥിപൻ. പൊതുജനങ്ങൾ എയർ കണ്ടീഷൻ ചെയ്ത വാഹനങ്ങളിൽ വിപുലമായും സുഖമായും യാത്ര ചെയ്യണമെന്ന് മുഖ്യമന്ത്രി ആഗ്രഹിക്കുന്നുവെന്ന് ഗതാഗത മന്ത്രി  മാധ്യമപ്രവർത്തകരോട് പറഞ്ഞു. 

തമിഴ്‌നാട്ടിലെ എല്ലാ വിദൂര പ്രദേശങ്ങളെയും ബസ് സർവീസുകൾ വഴി ബന്ധിപ്പിക്കണമെന്ന് വിജയ് ആഗ്രഹിക്കുന്നുവെന്നും ഗതാഗത മന്ത്രി പറഞ്ഞു. എല്ലാ സാധാരണക്കാർക്കും സുഖമായി സഞ്ചരിക്കാൻ ആവശ്യമായ സൗകര്യങ്ങൾ എല്ലാ ബസുകളിലും ഉണ്ടായിരിക്കണമെന്നും മുഖ്യമന്ത്രി പറഞ്ഞു.

അടുത്തിടെ ഒരു സർക്കാർ ബസിൽ യാത്ര ചെയ്തപ്പോഴാണ് മുഖ്യമന്ത്രി, എല്ലാ പുതിയ വാഹനങ്ങൾക്കും എയർ കണ്ടീഷനിംഗ് സൗകര്യങ്ങൾ ഉണ്ടായിരിക്കണമെന്ന് ആഗ്രഹം പ്രകടിപ്പിച്ചതെന്നും മന്ത്രി പറഞ്ഞു. കഴിഞ്ഞ ദിവസം സംസ്ഥാനത്തെ 300 പുതിയ ബസുകൾ വിജയ് ഫ്ലാഗ് ഓഫ് ചെയ്തിരുന്നു. തമിഴ്‌നാട്ടിലെ നിലവിലുള്ള പൊതുഗതാഗത ശൃംഖലയും സൗകര്യങ്ങളും ആധുനികവൽക്കരിക്കുന്നതിനും സംസ്ഥാനത്തുടനീളമുള്ള കണക്റ്റിവിറ്റി മെച്ചപ്പെടുത്തുന്നതും ടിവികെയുടെ ലക്ഷ്യമാണ്.