Image Credit: x/ANI
കാമുകിയുടെ സ്നേഹപ്രകടനത്തിന് 5,500 രൂപ പിഴയായി അടയ്ക്കേണ്ടി വന്ന ഞെട്ടലിലാണ് ഗ്വാളിയാർ സ്വദേശിയായ ആദിത്യ സികാർവാർ. ആദിത്യയുടെ വെള്ള കാറിന് ചുവപ്പൻ ചുംബനങ്ങളാൽ കാമുകി നൽകിയ മേക്കോവറാണ് ഒടുവിൽ വൻ സാമ്പത്തിക നഷ്ടം വരുത്തിയത്.
നീണ്ട നാല് മണിക്കൂർ കഷ്ടപ്പെട്ട് ചുവപ്പ് ലിപ്സ്റ്റിക്കിട്ട് ഉമ്മവച്ചാണ് കാറിനെ ബംപർ ടു ബംപർ യുവതി സ്റ്റൈലിഷാക്കിയത്. 3400 ചുംബനങ്ങളാണ് കാറിന്റെ മേക്കോവറിനായി വേണ്ടിവന്നത്. ഡോർ, ബോണറ്റ്, ബൂട്ട് എന്നുവേണ്ട, കാറിന്റെ എല്ലായിടവും ചുംബനപ്പാടുകളിൽ ചുവന്നു.
ഓൺലൈനിൽ ആദിത്യയും കാറും കാമുകിയുമെല്ലാം അതിവേഗം വൈറലായി. കാറുമായി റോഡിലിറങ്ങിയ ആദിത്യ പക്ഷേ പെട്ടു. ഗ്വാളിയാർ ട്രാഫിക് പൊലീസ് കാർ തടഞ്ഞു. ഇത്ര റൊമാന്റിക്കാകുന്നത് ഗതാഗത നിയമലംഘനമാണെന്ന് ആദിത്യയെ അറിയിച്ചു.
ഒറിജിനൽ നിറത്തിലല്ലാതെ വാഹനവുമായി നിരത്തിലിറങ്ങുന്നത് മോട്ടോർ വാഹന നിയമപ്രകാരം മോഡിഫിക്കേഷന്റെ പരിധിയിൽ വരുമെന്നായിരുന്നു പൊലീസിന്റെ വിശദീകരണം. തുടർന്ന് കാറുടമയായ ആദിത്യയ്ക്ക് 5,500 രൂപ പിഴ അടയ്ക്കാൻ നിർദേശം നൽകി. മാത്രമല്ല, ഓരോ ചുംബനപ്പാടുകളും ഉദ്യോഗസ്ഥരുടെ മുന്നിൽവച്ചുതന്നെ തുടച്ച് വൃത്തിയാക്കാനും ആവശ്യപ്പെട്ടു. കഷ്ടപ്പെട്ട് ലിപ്സ്റ്റിക് പാടുകൾ തുടച്ചുനീക്കുന്ന ആദിത്യയുടെ വിഡിയോ ഇപ്പോൾ സമൂഹമാധ്യമങ്ങളിൽ വൈറലാണ്. ഇതിന് പുറമെ, വാട്ടർ സർവീസിങ് നടത്തിയ ശേഷമാണ് പൊലീസ് കാർ വിട്ടുനൽകിയത്.