ന്യൂഡല്ഹി ദയാല്പുരില് ഒന്പതുവയസ്സുകാരിയെ ക്രൂരമായി പീഡിപ്പിച്ചു കൊലപ്പെടുത്തിയ കേസിലെ പ്രതി അറസ്റ്റില്. നൗഷാദാണ് അറസ്റ്റിലായത്. ഡല്ഹി പൊലീസിന്റെ പ്രത്യേക സംഘമാണ് പ്രതിയെ സാഹസികമായി പിടികൂടിയത്. പൊലീസിനെ കണ്ടതോടെ ഓടി രക്ഷപ്പെടാന് ശ്രമിക്കുന്നതിനിടെ ഇയാളുടെ കാലിന് വെടിവെച്ചാണ് പൊലീസ് കീഴ്പ്പെടുത്തിയത്.
ജൂണ് ഏഴിനാണ് കേസിന് ആസ്പദമായ സംഭവം. പ്രായപൂര്ത്തിയാകാത്ത പെണ്കുട്ടിയെ പ്രതി അതിക്രൂരമായി ബലാത്സംഗം ചെയ്ത് കൊലപ്പെടുത്തുകയായിരുന്നു. ദയാല്പൂര് പൊലീസ് സ്റ്റേഷന് പരിധിയിലാണ് സംഭവം നടന്നത്. കുട്ടിയുടെ സ്വകാര്യഭാഗങ്ങളില് അടക്കം ഗുരുതരമായ പരിക്കുകള് കണ്ടെത്തിയിരുന്നു. പിന്നാലെ സംഭവ സ്ഥലത്തെത്തിയ പൊലീസ് കുട്ടിയെ ഉടന് ആശുപത്രിയിലേക്ക് കൊണ്ടുപോയെങ്കിലും രക്ഷപ്പെടുത്താനായില്ല. കുട്ടി പീഡനത്തിനിരയായിട്ടുണ്ടെന്നും ഇതിന് പിന്നാലെയാണ് കൊലപാതകം നടന്നതെന്നും പൊലീസ് വ്യക്തമാക്കിയിരുന്നു.