എക്‌സ്‌പ്രസ് ഹൈവേയിൽ റിവേഴ്‌സ് എടുക്കരുത്; ഈ അഞ്ച് കാര്യങ്ങൾ ഓർത്തില്ലെങ്കില്‍ പണി!

ഡൽഹി–ഡെറാഡൂൺ എക്‌സ്‌പ്രസ് വേയിൽ കഴിഞ്ഞ ദിവസം നടന്ന അപകടത്തിന്റെ നടുക്കുന്ന ദൃശ്യങ്ങൾ നമ്മൾ കണ്ടതാണ്. കുഞ്ഞടക്കം ഒരു കുടുംബത്തിലെ നാല് പേർക്കാണ് അപകടത്തിൽ ജീവൻ നഷ്ടമായത്. ഇത്തരം അപകടങ്ങൾ ഒരു വാർത്ത മാത്രമല്ല, റോഡ് ഉപയോഗിക്കുന്ന ഓരോരുത്തർക്കും വലിയൊരു മുന്നറിയിപ്പാണ്.

എക്‌സ്‌പ്രസ് വേയിൽ റിവേഴ്‌സ് എടുക്കുന്നത്  അപകടകരമാകുന്നത് എന്തുകൊണ്ട്?

എക്‌സ്‌പ്രസ് വേകൾ ഉയർന്ന വേഗതയിൽ വാഹനങ്ങൾ സഞ്ചരിക്കാൻ രൂപകൽപ്പന ചെയ്തവയാണ്. മണിക്കൂറിൽ 100–120 കിലോമീറ്റർ, ഒരുപക്ഷെ അതിനേക്കാൾ വേഗത്തിൽ വരുന്ന വാഹനങ്ങൾക്ക് മുന്നിൽ പെട്ടെന്ന് റിവേഴ്‌സിൽ വരുന്ന വാഹനം പ്രത്യക്ഷപ്പെട്ടാൽ, ഡ്രൈവർക്ക് പ്രതികരിക്കാനുള്ള സമയം വളരെ കുറവായിരിക്കും. അതിനാൽ വാഹനത്തിന് നിയന്ത്രണം നഷ്ടപ്പെടാം, പിന്നിലുള്ള വാഹനങ്ങൾ പരസ്പരം ഇടിച്ചുകയറാം, ഒരാളുടെ ചെറിയ തെറ്റ് നിരവധി നിരപരാധികളുടെ ജീവൻ കവർന്നേക്കാം.

ഒരു എക്സിറ്റ് നഷ്ടപ്പെട്ടാൽ എന്ത് ചെയ്യണം ?

പലരും ഗൂഗിൾ മാപ്പ് പറഞ്ഞ വഴിയോ, ലക്ഷ്യസ്ഥാനമോ നഷ്ടപ്പെടാതിരിക്കാൻ റിവേഴ്‌സിൽ വാഹനം എടുക്കാറുണ്ട്. എന്നാൽ അത് ഒരിക്കലും ശരിയായ തീരുമാനമല്ല.

ശരിയായ മാർഗം:

1. അടുത്ത എക്സിറ്റ് വരെ മുന്നോട്ട് പോകുക.

2. അവിടെ നിന്ന് സുരക്ഷിതമായി തിരിഞ്ഞ് തിരിച്ചുവരുക.

3. കുറച്ച് കിലോമീറ്റർ അധികം യാത്ര ചെയ്യേണ്ടിവന്നാലും അത് ജീവന് വില കൊടുക്കുന്നതിനെക്കാൾ നല്ലതാണ്.

ഓർമ്മിക്കേണ്ട അഞ്ച് കാര്യങ്ങൾ

1. എക്‌സ്‌പ്രസ് ഹൈവേയിൽ ഒരിക്കലും റിവേഴ്‌സ് എടുക്കരുത്.

2. യു-ടേൺ അനുവദിക്കാത്ത സ്ഥലങ്ങളിൽ തിരിയാൻ ശ്രമിക്കരുത്.

3. എക്സിറ്റ് നഷ്ടപ്പെട്ടാൽ അടുത്ത എക്സിറ്റിലേക്ക് പോകുക.

4. ഹസാർഡ് ലൈറ്റ് ഓൺ ചെയ്താലും അപകടസാധ്യത ഇല്ലാതാകില്ല.

5. ഡ്രൈവറുടെ ഒരു തെറ്റായ തീരുമാനം നിരവധി കുടുംബങ്ങളുടെ ജീവിതം മാറ്റിമറിച്ചേക്കാം.

ഓരോ ഡ്രൈവറും ഓർക്കണം, റോഡിലെ നിയമങ്ങൾ പിഴ ഒഴിവാക്കാനല്ല, ജീവൻ രക്ഷിക്കാനാണ്.ഒരു എക്സിറ്റ് നഷ്ടപ്പെട്ടാൽ കുറച്ച് സമയം മാത്രമേ നഷ്ടമാകൂ. എന്നാൽ ഒരു തെറ്റായ റിവേഴ്‌സ് ഒരുപാട് ജീവനുകൾ അപകടത്തിലാക്കും.