പണമടങ്ങിയ ബാഗുമായി മരത്തിനു മുകളിലേക്ക് കയറിപോകുന്ന കുരങ്ങിന്റെ വിഡിയോ സോഷ്യല്മീഡിയയില് വൈറലാകുന്നു. ഉത്തർപ്രദേശിലെ പ്രയാഗ്രാജിലാണ് സംഭവം. ഒരുമാസം മുന്പ് പങ്കുവച്ച വിഡിയോ ഇപ്പോള് വീണ്ടും സജീവചര്ച്ചയായി.
ഒരു വഴിയാത്രക്കാരന്റെ ബാഗ് തട്ടിപറിച്ച് കുരങ്ങ് മരത്തിന് മുകളിലേക്ക് ഓടി കയറുന്നതാണ് വിഡിയോ. ബാഗ് തുറക്കാന് കുരങ്ങന് കടിച്ചു പറിക്കുന്നതും ബാഗിനുള്ളില് എന്തെങ്കിലുമുണ്ടോയെന്ന് പരിശോധിക്കുന്നതും വിഡിയോയിലുണ്ട്. ബാഗിനുള്ളില് നിന്ന് 500 രൂപയുടെ ഒരു കെട്ട് എടുക്കുന്ന കുരങ്ങന് കഴിക്കാനുള്ള എന്തോ ആണെന്ന് തെറ്റിധരിച്ച് നോട്ടുകെട്ട് കടിക്കുന്നതും ദൃശ്യങ്ങളില് വ്യക്തമാണ്.
ഇതിനിടെ താഴെ നിന്നും ആളുകൾ ബഹളം വച്ചതോടെ കടിച്ച് പിടിച്ച നോട്ടുകെട്ടുമായി കുരങ്ങന് മരത്തിന് മുകളിലേക്ക് കയറുന്നു, പിന്നാലെ ഇലകൾക്കിടയില് മറയുന്നു. പിന്നാലെ നോട്ടുകെട്ടുകളില് നിന്ന് 500 രൂപ താഴേക്ക് വീണുകൊണ്ടിരുന്നുവെന്നും പറയുന്നു. താഴേക്ക് നോട്ടുകള് വീഴുന്നത് ശ്രദ്ധിച്ച നാട്ടുകാര് വലിയ ശബ്ദം ഉണ്ടാക്കിയതോടെ കുരങ്ങന് കൈയില് നിന്നും നോട്ട് താഴെക്കിട്ടു. വിഡിയോ വൈറലായതിന് പിന്നാലെ രസകരമായ നിരവധി പ്രതികരണങ്ങളാണ് ലഭിക്കുന്നത്.