ലൈംഗിക ഫാന്‍റസികളെല്ലാം വൈകൃതങ്ങളാണോ?; എങ്ങനെ ആരോഗ്യകരമാക്കാം...

ലൈംഗികശാസ്ത്രത്തിൽ ഏറ്റവും കൂടുതൽ ചർച്ച ചെയ്യപ്പെടുന്ന രണ്ട് തലങ്ങളാണ് ആരോഗ്യകരമായ ലൈംഗിക ഭാവനകളും ലൈംഗിക വൈകൃതങ്ങളും. ഇവ രണ്ടും ഒന്നുതന്നെയാണെന്ന് പലരും തെറ്റിദ്ധരിക്കാറുണ്ട്. എന്നാൽ മനഃശാസ്ത്രപരമായി ഇവ രണ്ടും തികച്ചും വ്യത്യസ്തമായ തലങ്ങളിലാണ് സ്ഥിതി ചെയ്യുന്നത്. ലൈംഗികതയില്‍ ഓരോരുത്തര്‍ക്കും അവരുടേതായ താല്‍പ്പര്യങ്ങളും ഭാവനയും സ്വാഭാവികമാണ്. പങ്കാളികള്‍ക്കിടയില്‍ പരസ്പര സമ്മതത്തോടെയുള്ള ഏത് ലൈംഗിക താര്യപര്യവും സ്വാഭാവികവുമാണ്. എന്നാൽ എന്തിനും പങ്കാളിയുടെ 'സമ്മതം' (Consent) അത്യന്താപേക്ഷിതമാണ്. ഒരു കാരണവശാലും തങ്ങളുടെ ഇഷ്ടങ്ങൾ പങ്കാളിയുടെ മേൽ അടിച്ചേൽപ്പിക്കാന്‍ പാടില്ല.

ആരോഗ്യകരമായ ലൈംഗിക ഫാന്‍റസികള്‍

വ്യക്തിപരമായ ലൈംഗികാസ്വാദനം പൂര്‍ണമായും വ്യക്തിയുടെ സ്വന്തം മനസ്സില്‍ നടക്കുന്ന മാനസിക വ്യാപാരമാണ്. ഇതിന് ആരുടെയും ഇടപെടലോ അനുവാദമോ ആവശ്യമില്ല. മനസ്സിന്‍റെ ഭാവനയിലൂടെ ഉണരുന്ന ഇത്തരം ചിന്തകൾ തികച്ചും സ്വാഭാവികവും മാനസികാരോഗ്യത്തിന് ഗുണകരവുമാണ്. ദമ്പതികൾക്കിടയിൽ പരസ്പരമുള്ള അടുപ്പവും ലൈംഗിക ജീവിതത്തിലെ സംതൃപ്തിയും വർദ്ധിപ്പിക്കാൻ ഇത്തരം ഫാന്‍റസികള്‍ ആരോഗ്യകരമായി പങ്കുവയ്ക്കുന്നത് സഹായിക്കും. ഇതിൽ ആർക്കും യാതൊരുവിധ ശാരീരികമോ മാനസികമോ ആയ ഉപദ്രവവും ഉണ്ടാകുന്നില്ല. മറ്റുള്ളവരുടെ അവകാശങ്ങളിലേക്ക് കടന്നുകയറാത്ത രീതിയിലുള്ള മാനസിക ആസ്വാദനം മാത്രമാണിത്.

ലൈംഗിക വൈകൃതങ്ങൾ അഥവാ പാരാഫീലിയ 

വെറുമൊരു ചിന്തയിൽ നിന്നും മാറി, പ്രവൃത്തികളിലേക്കും മറ്റുള്ളവരെ ദോഷകരമായി ബാധിക്കുന്ന തലത്തിലേക്കും കാര്യങ്ങൾ എത്തുമ്പോഴാണ് അതിനെ ക്ലിനിക്കൽ വൈകൃതമായി കണക്കാക്കുന്നത്. മറ്റുള്ളവരുടെ അനുവാദമില്ലാതെ അവരെ നിരീക്ഷിക്കുകയോ, ഉപദ്രവിക്കുകയോ, അല്ലെങ്കിൽ കുട്ടികളെ ലക്ഷ്യം വെക്കുകയോ ചെയ്യുന്ന സ്വഭാവങ്ങള്‍ ഇതിൽ പെടുന്നു. പീഡോഫീലിയ: കുട്ടികളോടുള്ള ലൈംഗിക ആകർഷണം ഒരിക്കലും ഒരു ഫാന്‍റസിയല്ല മറിച്ച് ഒരു കുറ്റകൃത്യവും മാനസിക വൈകൃതവുമാണ്. എക്സിബിഷനിസം : സമ്മതമില്ലാത്ത ഒരാളുടെ മുന്നിൽ സ്വന്തം നഗ്നത പ്രദർശിപ്പിച്ച് ഉത്തേജനം കണ്ടെത്തല്‍. വോയറിസം : മറ്റുള്ളവർ വസ്ത്രം മാറുന്നതോ സ്വകാര്യ നിമിഷങ്ങളിലേർപ്പെടുന്നതോ ഒളിഞ്ഞുനോക്കി ആനന്ദം കണ്ടെത്തല്‍. ഫ്രോട്ടിയറിസം: പൊതുസ്ഥലങ്ങളിൽ അപരിചിതരായ ആളുകളുടെ ശരീരത്തിൽ അവരുടെ സമ്മതമില്ലാതെ ഉരസി ഉത്തേജനം നേടുക. സെക്ഷ്വൽ സാഡിസം : മറ്റൊരാളെ മാനസികമായോ ശാരീരികമായോ വേദനിപ്പിച്ച് ലൈംഗിക സംതൃപ്തി കണ്ടെത്തല്‍. സെക്ഷ്വൽ മാസോക്കിസം : സ്വയം അപമാനിക്കപ്പെടുകയോ വേദന സഹിക്കുകയോ ചെയ്യുന്നതിലൂടെ ഉത്തേജനം നേടല്‍.  ഫെറ്റിഷിസം : ജീവനില്ലാത്ത വസ്തുക്കളോടോ ശരീരത്തിലെ ലൈംഗികേതര അവയവങ്ങളോടോ തോന്നുന്ന അമിതമായ ലൈംഗിക ആകർഷണം –  ഇത്തരം ആഗ്രഹങ്ങൾക്ക് മേൽ വ്യക്തിക്ക് മാനസിക നിയന്ത്രണം നഷ്ടപ്പെടുകയും അത് നിയമവിരുദ്ധമോ സമൂഹത്തിന് ദോഷകരമോ ആയ പ്രവൃത്തികളിലേക്ക് നയിക്കുകയോ ചെയ്യാം.സാധാരണമായ പരസ്പര സമ്മതത്തോടുള്ള ബന്ധങ്ങളിലൂടെ സംതൃപ്തി നേടാൻ കഴിയാതെ, ഏതെങ്കിലും അസ്വാഭാവികമായ വസ്തുക്കളെയോ സാഹചര്യങ്ങളെയോ മാത്രം അമിതമായി ആശ്രയിക്കുന്ന അവസ്ഥയാണിത്.

ഫാന്‍റസി എന്നത് ഒരു വ്യക്തിയുടെ സ്വകാര്യമായ ചിന്ത മാത്രമാണ്. എന്നാല്‍ വൈകൃതം പലപ്പോഴും മറ്റുള്ളവരെ ദോഷകരമായി ബാധിക്കുന്ന പ്രവൃത്തിയാണ്. ആരോഗ്യകരമായ ഫാന്‍റസികള്‍ക്ക് മറ്റുള്ളവരുടെ സമ്മതം ആവശ്യമില്ല. എന്നാൽ വൈകൃതങ്ങൾ പലപ്പോഴും മറ്റുള്ളവരുടെ സമ്മതമില്ലാതെയാണ് നടപ്പിലാക്കുന്നത്. ഫാന്‍റസികൾ ആർക്കും ദോഷം വരുത്തുന്നില്ല, എന്നാൽ വൈകൃതങ്ങൾ വ്യക്തിക്കും സമൂഹത്തിനും നിയമപരമായ പ്രശ്നങ്ങൾ സൃഷ്ടിക്കുന്നു. ചുരുക്കിപ്പറഞ്ഞാല്‍ 

 സ്വന്തം മനസ്സിനുള്ളിലെ ഭാവനകളെയും ഫാന്‍റസികളെയും ഭയപ്പെടേണ്ടതില്ല. അവ തികച്ചും സാധാരണമാണ്. എന്നാൽ ആ ചിന്തകൾ മറ്റുള്ളവർക്ക് ബുദ്ധിമുട്ടോ നിയമവിരുദ്ധമോ ആയ തലങ്ങളിലേക്ക് കടന്നുകയറുമ്പോഴാണ് വൈദ്യശാസ്ത്രപരമായും നിയമപരമായും അതൊരു പ്രശ്നമായി മാറുന്നത്.