കിടപ്പറയില്‍ താല്‍പ്പര്യം കുറയുന്നോ?; തൈറോയിഡ് ആകാം വില്ലന്‍

പങ്കാളിയോടൊപ്പം സന്തോഷത്തോടെ ചിലവഴിക്കേണ്ട നിമിഷങ്ങളിൽ പെട്ടെന്ന് താല്പര്യമില്ലായ്മ അനുഭവപ്പെടാറുണ്ടോ? അല്ലെങ്കിൽ ലൈംഗിക ജീവിതത്തിൽ മുൻപില്ലാത്തവിധം തണുപ്പൻ പ്രതികരണമാണോ ഉള്ളത്? പലപ്പോഴും പങ്കാളിയുടെ തെറ്റായ ധാരണകൾക്കും ദാമ്പത്യത്തിലെ അകൽച്ചയ്ക്കും വരെ ഇത് കാരണമാകാറുണ്ട്. എന്നാൽ ഇതിന് പിന്നിൽ മാനസികമായ പ്രശ്നങ്ങളോ പ്രണയക്കുറവോ മാത്രമല്ല ചിലപ്പോള്‍ തൈറോയിഡ് ഗ്രന്ഥിയുടെ തകരാറുകളും വില്ലനായേക്കാം! ശരീരത്തിന്റെ ഹോർമോൺ ബാലൻസ് മുഴുവൻ നിയന്ത്രിക്കുന്നത് തൈറോയിഡ് ആണ്. ഇതിന്റെ അളവ് മാറുമ്പോൾ അത് നേരിട്ട് ബാധിക്കുന്നത് നമ്മുടെ ലൈംഗിക ഹോർമോണുകളെയും  കിടപ്പറയിലെ ഊർജ്ജത്തെയുമാണ്.

ലൈംഗിക ജീവിതവും തൈറോയ്ഡും തമ്മിലെന്ത്?

ഹോർമോൺ വ്യതിയാനങ്ങൾ സ്ത്രീകളിലും പുരുഷന്മാരിലും ലൈംഗിക കാര്യങ്ങളെയും താൽപ്പര്യങ്ങളെയും വിവിധ രീതികളിലാണ് ബാധിക്കുന്നത്:

1. സ്ത്രീകളിൽ കാണുന്ന ലൈംഗിക പ്രശ്നങ്ങൾ

തൈറോയിഡ് തകരാറുകൾ സ്ത്രീകളിൽ പ്രധാന ലൈംഗിക ഹോർമോണായ ഈസ്ട്രജന്റെ ഉത്പാദനത്തെ താളം തെറ്റിക്കുന്നു. ഇത് ലൈംഗികതയോടുള്ള ആകർഷണം പൂർണമായി ഇല്ലാതാക്കാം. ഹോർമോൺ അസന്തുലിതാവസ്ഥ കാരണം ഈ പ്രശ്നം ഉണ്ടാകുമ്പോൾ ലൈംഗിക ബന്ധം വേദനാജനകമായി മാറുന്നു. ഇത് പിന്നീട് ബന്ധപ്പെടാനുള്ള ഭയത്തിലേക്കും താൽപ്പര്യമില്ലായ്മയിലേക്കും നയിക്കുന്നു. മാത്രമല്ല ഉത്തേജനം കുറയുന്നത് മൂലം പൂർണ്ണമായ സംതൃപ്തി ലഭിക്കാതെയും വരുന്നു.

2. പുരുഷന്മാരിലെ ലൈംഗിക പ്രശ്നങ്ങൾ

പുരുഷ ഹോർമോണായ ടെസ്റ്റോസ്റ്റിറോണിന്റെ അളവ് കുറയ്ക്കാൻ ഹൈപ്പോതൈറോയിഡിസം കാരണമാകുന്നു. ഇത് ലൈംഗിക ചോദനയെ കുറയ്ക്കുന്നു. ശാരീരികമായ ഊർജ്ജക്കുറവും ഹോർമോൺ വ്യതിയാനങ്ങളും ഉദ്ധാരണവുമായി ബന്ധപ്പെട്ട പ്രശ്നങ്ങൾക്കും കാരണമാകാം. താൽപ്പര്യക്കുറവും പെട്ടെന്നുള്ള ക്ഷീണവും കാരണം പങ്കാളിയോടൊപ്പം പൂർണ്ണമായി സംതൃപ്തമായ രീതിയിൽ ഇടപെടാൻ കഴിയാതെ വരുന്നു. തൈറോയിഡ് പ്രശ്നങ്ങൾ ഉള്ളവരിൽ കാണുന്ന അമിത ക്ഷീണം, വിഷാദം, ശരീരഭാരം വർധിക്കൽ എന്നിവ വ്യക്തിയുടെ ആത്മവിശ്വാസത്തെയും സാരമായി ബാധിച്ചേക്കാം. സ്വന്തം ശരീരത്തോടുള്ള ആത്മവിശ്വാസം കുറയുമ്പോൾ അത് സ്വാഭാവികമായും പങ്കാളിയുമായുള്ള ലൈംഗിക താൽപ്പര്യത്തെയും ബാധിക്കും.

സെക്സ് ലൈഫ് വീണ്ടെടുക്കാൻ

ലൈംഗിക താൽപ്പര്യക്കുറവ് വെറുമൊരു മാനസിക പ്രശ്നമല്ല, മറിച്ച് ശരീരത്തിലെ ഹോർമോൺ തകരാറാണ് എന്ന് തിരിച്ചറിയുകയാണ് ആദ്യം വേണ്ടത്. ലളിതമായ ഒരു രക്തപരിശോധനയിലൂടെ തൈറോയിഡ് നില കൃത്യമായി മനസ്സിലാക്കാം. ഡോക്ടറുടെ നിർദ്ദേശപ്രകാരം തൈറോയിഡിനുള്ള മരുന്നുകൾ കഴിച്ചുതുടങ്ങിയാൽ ഹോർമോൺ ബാലൻസ് വീണ്ടെടുക്കാനും ലൈംഗിക ഹോർമോണുകളുടെ ഉത്പാദനം സാധാരണ നിലയിലാക്കാനും സാധിക്കും. ശരിയായ വ്യായാമം, ആരോഗ്യകരമായ ഭക്ഷണം, പങ്കാളിയുമായി മനസ്സുതുറന്നുള്ള സംസാരം എന്നിവയിലൂടെ കിടപ്പറയിലെ ആ സന്തോഷവും ഊർജ്ജവും വീണ്ടെടുക്കാവുന്നതേ ഉള്ളൂ.