നാലാം പ്രസവമെന്ന് ഡോക്ടറോട് നുണ പറഞ്ഞ് 55കാരി; പ്രസവിച്ചത് പതിനേഴാമത്തെ കുഞ്ഞിനെ

രാജസ്ഥാനിലെ ലിലവാസ് ​ഗ്രാമത്തിൽ അമ്പത്തിയഞ്ചുകാരി തന്‍റെ പതിനേഴാമത്തെ കുഞ്ഞിന് ജന്മം നല്‍കി . കവരാറാം കൽബെലിയയുടെ ഭാര്യ രേഖ ഉദയ്പൂരിലെ കമ്മ്യൂണിറ്റി ആരോ​ഗ്യ കേന്ദ്രത്തിലാണ് പ്രസവിച്ചത് . രേഖ ജന്മം നൽകിയ 17 മക്കളിൽ 4 ആൺകുഞ്ഞും ഒരു പെൺകുഞ്ഞും ജനിച്ച ഉടനെ മരിച്ചിരുന്നു.

7 ആൺമക്കളും 5 പെൺമക്കളുമാണ് നിലവിൽ ഈ ദമ്പതികൾക്കുള്ളത്. രേഖയുടെ പതിനേഴാമത്തെ പ്രസവമല്ല വാര്‍ത്ത . കുട്ടികളുടെ എണ്ണം സംബന്ധിച്ച് ആശുപത്രി അധികൃതരോട് പറഞ്ഞ നുണയാണ് ഏവരെയും അമ്പരിപ്പിച്ചത്. ഇത് തന്‍റെ നാലാമത്തെ പ്രസവമാണെന്നാണ് ഡോക്ടർമാരോടുള്‍പ്പടെ അവർ പറഞ്ഞത്.

ആരോ​ഗ്യപരമായ വിഷയങ്ങളിൽ ഡോക്ടർമാരെ വരെ തെറ്റിദ്ധരിപ്പിക്കാൻ ശ്രമിക്കുന്നത് കുറ്റകരമാണെന്ന് കമ്മ്യൂണിറ്റി ഹെൽത്ത് സെന്‍ററിലെ ​ഗൈനക്കോളജിസ്റ്റായ റോഷൻ ദാരം​ഗി പറഞ്ഞു. മുൻപ് 16 തവണ ​പ്രസവിച്ചിട്ടുള്ളതിനാൽ, ​ഗർഭപാത്രം ദുർബലമായി, രക്തസ്രാവം കൂടാനുള്ള സാധ്യത വളരെ കൂടുതലാണെന്ന് ‍ഡോ. റോഷൻ ദാരം​ഗി പറഞ്ഞു. രോ​ഗി ആരോ​ഗ്യ സംബന്ധമായ കാര്യത്തിൽ കള്ളം പറയുന്നത് പ്രസവം സങ്കീർണമാക്കുമെന്നും, അമ്മയുടെ ജീവൻ അപകടത്തിലാവാനുള്ള സാധ്യത ഏറെ കൂടുതലാണെന്നും ഡോക്ടർമാർ മുന്നറിയിപ്പ് നൽകുന്നു. രേഖയുടെ 17-ാം പ്രവസത്തിൽ ഉദയ്പൂരിലെ ആരോ​ഗ്യവിഭാ​ഗം ആശങ്ക അറിയിച്ചിട്ടുണ്ട്.

തെക്കൻ രാജസ്ഥാനിലെ ​ഗോത്ര വിഭാ​ഗക്കാർക്കിടയിൽ തുടർച്ചയായി പ്രസവമുണ്ടാകുന്നത് അമ്മയുടെയും കുഞ്ഞിന്റെയും ആരോ​ഗ്യാം അപകടത്തിലാക്കുമെന്ന് അധികൃതർ മുന്നറിയിപ്പ് നൽകുന്നു.