പ്രൊപ്പോസ് ചെയ്യാന്‍ എത്രകാലം കാത്തിരിക്കണം? തിടുക്കത്തിലാണോ നിങ്ങള്‍? എങ്കില്‍ ഇത് വായിക്കൂ

നിങ്ങള്‍ പ്രണയത്തിലാണോ? ഇഷ്ടപ്പെട്ടയാളെ ഉടന്‍ വിവാഹം കഴിക്കണമെന്നാണോ ചിന്ത? എന്നാല്‍ അധികം ആവേശം വേണ്ടെന്നാണ് ശാസ്ത്രവും ഗവേഷണകരും പറയുന്നത്. പ്രണയവും പ്രൊപ്പോസലും വിവാഹവുമെല്ലാം ജീവിതത്തിലെ ഏറ്റവും മനോഹരമായ നിമിഷങ്ങളാണ്. എന്നാല്‍ ആവേശത്തില്‍ എടുക്കുന്ന തീരുമാനങ്ങള്‍ പലപ്പോഴും ദുരനുഭവങ്ങളായി മാറിയേക്കാം. നിങ്ങള്‍ ശരിക്കും വിവാഹത്തിന് തയാറാണ് എന്ന് എങ്ങനെ തിരിച്ചറിയാം? പ്രണയിക്കുന്നവര്‍ ‘പ്രോപ്പോസ്’ ചെയ്യാന്‍ എത്രകാലം കാത്തിരിക്കണം? തീരുമാനം തികച്ചും വ്യക്തിപരമായതിനാല്‍ എല്ലാവര്‍ക്കും ഒരുപോലെ സ്വീകാര്യമായ ഒരു ഉത്തരം കിട്ടിയെന്നുവരില്ല. പക്ഷേ എല്ലാവരും തീര്‍ച്ചയായും ചിന്തിക്കേണ്ട, പരിഗണിക്കേണ്ട ചില ഘടകങ്ങളുണ്ട്.

നിങ്ങൾക്ക് ഒരാളോട് ഇഷ്ടം തോന്നുന്നു. അയാളെ പരിചയപ്പെടുന്നു. പരസ്പരം ഇഷ്ടം പങ്കുവയ്ക്കുന്നു. പിന്നെ വളരെ വേഗം നിങ്ങളുടെ തലച്ചോറില്‍ ഡോപമൈൻ, ഓക്സിടോസിൻ, സെറോടോണിൻ തുടങ്ങിയ സന്തോഷത്തിന്‍റെ ഹോര്‍മോണുകള്‍ പ്രവഹിക്കാന്‍ തുടങ്ങും. അവർ പറയുന്ന ഓരോ തമാശയും നിങ്ങൾക്ക് അതിമനോഹരമായി തോന്നും. സാധാരണഗതിയില്‍ അലോസരമുണ്ടാക്കുന്ന അവരുടെ ശീലങ്ങൾ പോലും ആകർഷകമായ സവിശേഷതകളായി മാറും. ഏതാണ്ട് മൂന്ന് മാസമാകുമ്പോഴേക്കും നിങ്ങൾ കണ്ടെത്തിയത് ശരിയായ പങ്കാളിയെത്തന്നെയാണെന്ന വിശ്വാസം ഉറച്ചുതുടങ്ങും. പ്രൊപ്പോസലിനെക്കുറിച്ചുള്ള ചിന്തകളും ഈ ഘട്ടത്തില്‍ സജീവമാകും.

ഈ ഘട്ടത്തിലാണ് നിങ്ങള്‍ മനസ്സിരുത്തി ആലോചിക്കേണ്ടത്. നല്ലൊരു ബന്ധം എത്രയും വേഗം സുരക്ഷിതമാക്കണമെന്ന ആഗ്രഹം സ്വാഭാവികമാണെങ്കിലും, റിലേഷൻഷിപ്പ് ഗവേഷകരും തെറപ്പിസ്റ്റുകളും ചൂണ്ടിക്കാണിക്കുന്ന ഒരു സത്യമുണ്ട്. ആവേശത്തിന്റെ തുടക്കകാലം കഴിഞ്ഞശേഷം വിവാഹത്തെക്കുറിച്ച് ചിന്തിക്കുന്നത് ദാമ്പത്യം വിജയകരമാകാനുള്ള സാധ്യത വർദ്ധിപ്പിക്കുന്നു. അങ്ങനെയെങ്കില്‍ എത്രകാലം കാത്തിരിക്കണം?

‘ഹണിമൂണ്‍’ കെണി: ബന്ധത്തിന്റെ തുടക്കത്തിലെ മൂന്ന് മുതൽ പന്ത്രണ്ട് മാസം വരെ നീളുന്ന കാലയളവിൽ നമ്മൾ പങ്കാളിയെ ഒരു സാങ്കൽപ്പിക രൂപമായാണ് കാണുന്നത്. അവരുടെ സ്വഭാവത്തിലെ അപായസൂചനകള്‍ (Red Flags) പോലും ഈ കാലയളവില്‍ നിസ്സാരമായി തോന്നും. ഈ 'ഹണിമൂൺ ഘട്ടത്തിൽ' തലച്ചോറിലെ രാസമാറ്റങ്ങൾ നിങ്ങളുടെ യുക്തിസഹമായ തീരുമാനമെടുക്കാനുള്ള കഴിവിനെ തടസ്സപ്പെടുത്തുന്നു. അതുകൊണ്ടുതന്നെ, ഈ ഘട്ടത്തിൽ പ്രൊപ്പോസ് ചെയ്യരുതെന്ന് മനശാസ്ത്രജ്ഞര്‍ ഉപദേശിക്കുന്നു. തലച്ചോറിലെ ഈ രാസമാറ്റങ്ങൾ കുറച്ചെങ്കിലും ശാന്തമാകുന്നത് വരെ കാത്തിരിക്കണം. ചുരുങ്ങിയത് ഒരു വർഷമെങ്കിലും ഒരുമിച്ച് ചെലവഴിച്ചാൽ മാത്രമേ പങ്കാളിയുടെ യഥാർത്ഥ സ്വഭാവം മനസ്സിലാക്കാൻ സാധിക്കൂ.

കാത്തിരുന്നാല്‍ ഗുണമെന്ത്?: വിവാഹമോചന സാധ്യത കുറയും എന്നതുതന്നെയാണ് വിദഗ്ധര്‍ ചൂണ്ടിക്കാട്ടുന്ന ഏറ്റവും വലിയ ഗുണം. ഇത് തെളിയിക്കുന്ന ഒട്ടേറെ സര്‍വേകള്‍ പുറത്തുവന്നിട്ടുണ്ട്. 2015 മുതല്‍ നടന്നിട്ടുള്ള പല പ്രധാന സര്‍വേകളുടെയും ഫലം പരിശോധിച്ചാല്‍ രണ്ടുവര്‍ഷത്തിലേറെ നീണ്ട ‘ഡേറ്റിങ്ങി’നുശേഷം വിവാഹിതരായവരാണ് കൂടുതല്‍. മൂന്നുവര്‍ഷമോ അതിലേറെയോ കാത്തിരുന്നശേഷം വിവാഹം കഴിച്ചവരില്‍ വിവാഹമോചന സാധ്യത രണ്ടുവര്‍ഷത്തിന് മുന്‍പ് വിവാഹിതരായവരെക്കാള്‍ 39 ശതമാനം വരെ കുറവാണെന്നാണ് കണ്ടെത്തല്‍. പ്രണയം ആരംഭിച്ച് ഒരു വർഷത്തിനുള്ളിൽ വിവാഹിതരായവരേക്കാൾ, ഒന്ന് മുതൽ രണ്ട് വർഷം വരെ ഡേറ്റിംഗ് നടത്തിയവർക്ക് വിവാഹമോചന സാധ്യത 20 ശതമാനം കുറവാണെന്നും സര്‍വേകള്‍ ചൂണ്ടിക്കാട്ടുന്നു.

പശ്ചാത്തലവും പ്രായവും: എല്ലാ ദമ്പതികൾക്കും ഒരേ ടൈംലൈൻ ബാധകമല്ല. ഇരുപതുകളിൽ നിൽക്കുന്നവർ കരിയറും വ്യക്തിത്വവും രൂപപ്പെടുത്തുന്ന ഘട്ടത്തിലായതിനാൽ കൂടുതൽ സമയം കാത്തിരിക്കുന്നത് നല്ലതാണ്. എന്നാൽ മുപ്പതുകളിൽ എത്തിയവർക്ക് ജീവിതലക്ഷ്യങ്ങളെക്കുറിച്ച് വ്യക്തമായ ധാരണയുള്ളതിനാൽ 12 മുതൽ 18 മാസം വരെയുള്ള കാലയളവിൽ തീരുമാനമെടുക്കാം. കൂടാതെ ഓരോരുത്തരുടെയും സാമൂഹികവും സാംസ്കാരികവും മതപരവുമായ പശ്ചാത്തലങ്ങളും ഈ കാലയളവിനെ സ്വാധീനിക്കാറുണ്ട്. 

വഴക്കുകൾ പ്രധാനമാണ്: വെറുതെ സമയം കളയുകയല്ല വേണ്ടത്, മറിച്ച് ചില നിർണ്ണായക ഘട്ടങ്ങൾ കടന്നിട്ടുണ്ടോ എന്ന് പരിശോധിക്കണം. ഇതിൽ ഏറ്റവും പ്രധാനം നിങ്ങൾക്കിടയിലുണ്ടാകുന്ന വഴക്കുകളാണ്. ഒരു പ്രശ്നമുണ്ടാകുമ്പോൾ അത് എത്രത്തോളം പക്വതയോടെ പരിഹരിക്കാൻ നിങ്ങൾക്ക് കഴിയുന്നു എന്നത് വിവാഹജീവിതത്തിന്റെ ഭാവിയെ സൂചിപ്പിക്കുന്നു. വിഷലിപ്തമായ രീതിയിലല്ലാതെ തർക്കങ്ങൾ പരിഹരിക്കാൻ സാധിക്കുന്നുണ്ടെങ്കിൽ അത് ശുഭലക്ഷണമാണ്.

ഗൗരവമേറിയ ചർച്ചകൾ: സാമ്പത്തിക ശീലങ്ങൾ, കരിയർ ലക്ഷ്യങ്ങൾ, കുട്ടികൾ വേണോ വേണ്ടയോ എന്ന തീരുമാനം, എവിടെ താമസിക്കണം തുടങ്ങിയ കാര്യങ്ങളിൽ വിവാഹത്തിന് മുൻപ് തന്നെ വ്യക്തമായ ചർച്ചകൾ നടന്നിരിക്കണം. ഇത്തരം ഗൗരവമേറിയ വിഷയങ്ങളിൽ സമാനമായ കാഴ്ചപ്പാടുകൾ ഉണ്ടോ എന്ന് പരിശോധിക്കുന്നത് ഭാവിയിലെ കലഹങ്ങൾ ഒഴിവാക്കാൻ സഹായിക്കും.

പ്രതിസന്ധികളിലെ പെരുമാറ്റം:

ജീവിതം എപ്പോഴും മധുരമുള്ളതാകില്ല. സങ്കടകരമായ സാഹചര്യങ്ങളോ അമിതമായ സമ്മർദ്ദമോ ഉണ്ടാകുമ്പോൾ നിങ്ങളുടെ പങ്കാളി എങ്ങനെ പ്രതികരിക്കുന്നു എന്ന് നോക്കുക. പ്രിയപ്പെട്ടവരുടെ മരണം, രോഗാവസ്ഥ, അല്ലെങ്കിൽ ജോലിയിലെ പ്രശ്നങ്ങൾ എന്നിവ കൈകാര്യം ചെയ്യുന്ന രീതി നോക്കി അവരുടെ മാനസിക കരുത്ത് മനസ്സിലാക്കാം. ഇത്തരത്തിലുള്ള തിരിച്ചറിവുകൾക്ക് ശേഷമാണ് നിങ്ങൾ ഒരുമിച്ച് ജീവിക്കാൻ തീരുമാനിക്കേണ്ടത്.

ത്രീ-ഫോർ റൂൾ

ആഗോളതലത്തില്‍ത്തന്നെ ഡേറ്റിങ് എക്സ്പര്‍ട്സ് മുന്നോട്ടുവയ്ക്കുന്ന ഒരു രീതിയാണിത്. ഇതനുസരിച്ച് മൂന്നാമത്തെ ഡേറ്റിനുള്ളിലോ അല്ലെങ്കിൽ ബന്ധത്തിന്റെ ആദ്യ മൂന്ന് മാസത്തിനുള്ളിലോ പ്രണയികള്‍ നാല് പ്രധാനപ്പെട്ട ചോദ്യങ്ങൾ ചോദിച്ചിരിക്കണം.

1. നമുക്കിടയില്‍ കെമിസ്ട്രി/കണക്ഷന്‍ ഉണ്ടോ?: ഇത് ലളിതമായി തോന്നാം, പക്ഷേ ആഴത്തിൽ ചിന്തിക്കുമ്പോൾ പലപ്പോഴും നിങ്ങൾ ആഗ്രഹിക്കുന്നത്ര ശക്തമായ ബന്ധം അവിടെ കാണില്ല. ഇത് ബോധ്യപ്പെട്ടാല്‍ തീരുമാനം എളുപ്പമാകും.

2. അടിസ്ഥാന മൂല്യങ്ങൾ (Core Values) ഒത്തുപോകുന്നുണ്ടോ?: പ്രണയം, തമാശകള്‍, കുടുംബത്തോടുള്ള സമീപനം, സത്യസന്ധത, അനുകമ്പ, ആത്മാര്‍ഥത നിങ്ങളുടെ മൂല്യങ്ങളെക്കുറിച്ച് ചിന്തിക്കുക. പങ്കാളി അത്തരം മൂല്യങ്ങളില്‍ വിശ്വസിക്കുന്നുണ്ടോ എന്ന ചോദ്യവും അതിന്‍റെ ഉത്തരവും അതിപ്രധാനമാണ്. 

3. പങ്കാളി വൈകാരികമായി പക്വതയുള്ളയാളാണോ (Emotional Maturity)?: അവരുടെ മുന്‍കാല ബന്ധങ്ങളെക്കുറിച്ചും, വേർപിരിയലിന് അവരുടെ ഭാഗത്തുണ്ടായ കാരണത്തെക്കുറിച്ചും, അവർ അതിൽ നിന്ന് എങ്ങനെ മുക്തരായി എന്നും ചോദിച്ചറിയണം.

4. ബന്ധത്തെ അടുത്ത ഘട്ടത്തിലേക്ക് കൊണ്ടുപോകാൻ പങ്കാളി തയ്യാറാണോ?: തീര്‍ച്ചയായും ഇക്കാര്യം മുഖാമുഖം സംസാരിക്കണം. ഇത്തരം ചോദ്യങ്ങൾ പങ്കാളിയെ ഭയപ്പെടുത്തുമോ എന്ന് ചിലർ ആശങ്കപ്പെടാറുണ്ട്. അങ്ങനെ സംഭവിക്കുകയാണെങ്കിൽ അതൊരു മറുപടിയായി തന്നെ കാണണം.

ചുരുക്കത്തിൽ, വെറുമൊരു കലണ്ടർ നോക്കിയല്ല വിവാഹത്തിന് ഒരുങ്ങേണ്ടത്. ഹൃദയവും തലച്ചോറും ഒരുപോലെ സമ്മതം മൂളുന്ന, പരസ്പര ധാരണയുള്ള ഒരു ഘട്ടത്തിലേക്ക് നിങ്ങൾ എത്തിയോ എന്ന് സ്വയം ചോദിക്കുക. ശാസ്ത്രീയമായി പറഞ്ഞാൽ, ചുരുങ്ങിയത് ഒരു വർഷമെങ്കിലും കാത്തിരിക്കുന്നത് നിങ്ങളുടെ ദാമ്പത്യത്തിന്റെ ആയുസ്സ് വർദ്ധിപ്പിക്കാൻ സഹായിക്കും.