ആര്‍ത്തവകാലത്ത് ചോക്ലേറ്റ് വേണോ? വേദനയെ അകറ്റി നിര്‍ത്താം; കഴിക്കേണ്ടത് എന്തൊക്കെ?

ആര്‍ത്തവമായാല്‍ മധുരമുള്‍പ്പെടെ ഇഷ്ടപ്പെട്ട ഭക്ഷണങ്ങള്‍ കഴിക്കുന്നവരാവും മിക്ക സ്ത്രീകളും. സ്ത്രീകള്‍ക്ക്  ആര്‍ത്തവമാവുമ്പോള്‍ ചോക്ലേറ്റ് മേടിച്ചുകൊടുക്കുന്ന കാമുകന്മാരും ഭര്‍ത്താക്കന്മാരുമുണ്ടാവും. എന്നാല്‍ ഇത് ഗുണത്തേക്കാളേറെ  ദോഷമായിരിക്കുമുണ്ടാക്കുക എന്ന് നിങ്ങള്‍ക്ക് അറിയാമോ? അതെ ആര്‍ത്തവ സമയത്ത് ഒഴിവാക്കേണ്ടതാണ് മധുരമുള്ള ഭക്ഷണ പദാര്‍ഥങ്ങള്‍. മധുരമുള്ളത് മാത്രമല്ല, കഴിക്കണമെന്ന് തോന്നുന്ന പലതും ഒഴിവാക്കേണ്ടിവരും. അത് ഏതൊക്കെയാണ്, ആര്‍ത്തവമാകുമ്പോള്‍ കഴിക്കേണ്ടത് ഏതൊക്കെയാണ്?

ആർത്തവസമയത്തുണ്ടാകുന്ന വയറുവേദന, തളർച്ച, മാനസികാവസ്ഥയിലുണ്ടാകുന്ന മാറ്റങ്ങൾ എന്നിവ കുറയ്ക്കുന്നതിൽ ഭക്ഷണക്രമത്തിന് വലിയ പങ്കുണ്ട്. ആർത്തവസമയത്ത് മധുരം നല്ലതല്ല. മിഠായികൾ, സോഡ, കേക്ക് എന്നിവയിലടങ്ങിയിരിക്കുന്ന ശുദ്ധീകരിച്ച പഞ്ചസാര വേദന വർദ്ധിപ്പിക്കും. ഇത് ശരീരത്തിൽ വീക്കമുണ്ടാക്കുന്ന പ്രോസ്റ്റാഗ്ലാൻഡിൻ (Prostaglandins) എന്ന ഘടകത്തിന്‍റെ അളവ് കൂട്ടുകയും അതുവഴി വയറുവേദന കഠിനമാക്കുകയും ചെയ്യും.

ആർത്തവകാലത്ത് കഴിക്കേണ്ടവ (വേദന കുറയ്ക്കാൻ സഹായിക്കുന്നവ)

ഡാർക്ക് ചോക്ലേറ്റ്: 70% എങ്കിലും കൊക്കോ അടങ്ങിയ ഡാർക്ക് ചോക്ലേറ്റ് വേദന കുറയ്ക്കാൻ സഹായിക്കുമെന്ന് പഠനങ്ങൾ വ്യക്തമാക്കുന്നു. ഇതിലടങ്ങിയിരിക്കുന്ന മഗ്നീഷ്യം ഗർഭാശയ പേശികളെ റിലാക്സ് ചെയ്യിക്കുന്നു.

ഒമേഗ-3 അടങ്ങിയ ഭക്ഷണങ്ങൾ: മത്തി, സാല്‍മൺ തുടങ്ങിയ മീനുകൾ, ചിയ വിത്തുകൾ എന്നിവ വേദനയുണ്ടാക്കുന്ന ഇൻഫ്ലമേഷൻ കുറയ്ക്കും.

ഇലക്കറികൾ: ചീര പോലുള്ള ഇലക്കറികൾ രക്തനഷ്ടത്തിലൂടെ കുറയുന്ന ഇരുമ്പിന്‍റെ (Iron) അളവ് നിലനിർത്താൻ സഹായിക്കുന്നു. ഇത് ക്ഷീണം കുറയ്ക്കും. 

പഴവർഗ്ഗങ്ങൾ: നേന്ത്രപ്പഴം മഗ്നീഷ്യം നൽകി പേശിവലിവ് കുറയ്ക്കുന്നു. തണ്ണിമത്തൻ ശരീരത്തിൽ ജലാംശം നിലനിർത്താൻ സഹായിക്കും.

ഇഞ്ചി, മഞ്ഞൾ: ഇഞ്ചി ചായ കുടിക്കുന്നത് വേദനയ്ക്കും ഛർദിക്കും ആശ്വാസം നൽകും. മഞ്ഞളിലെ കുർക്കുമിൻ ശരീരത്തിന് പ്രതിരോധശേഷി നൽകുന്നു.

ഒഴിവാക്കേണ്ടവ ഭക്ഷണങ്ങള്‍

ഉപ്പ് കൂടിയ ഭക്ഷണങ്ങൾ: ചിപ്‌സ്, സംസ്കരിച്ച ഭക്ഷണങ്ങൾ എന്നിവ ശരീരത്തിൽ വെള്ളം കെട്ടിനിൽക്കാനും വയർ വീർക്കുന്നതിനും (Bloating) കാരണമാകും. ഇൻസ്റ്റന്റ് നൂഡിൽസ്, ഫാസ്റ്റ് ഫുഡ്, ഫ്രോസൺ മീൽസ് എന്നിവയിൽ ട്രാൻസ് ഫാറ്റും സോഡിയവും കൂടുതലായിരിക്കും. ഇത്തരം ഭക്ഷണങ്ങൾ കഴിക്കുന്നത് ആർത്തവവേദനയുടെ കാഠിന്യം വർദ്ധിപ്പിക്കും. 

കഫീൻ: കാപ്പി, എനർജി ഡ്രിങ്കുകൾ എന്നിവ വേദന വര്‍ദ്ധിപ്പിക്കും. ഉറക്കക്കുറവിനും ഇവ കാരണമായേക്കാം.

റെഡ് മീറ്റ്: ബീഫ് പോലുള്ള ചുവന്ന മാംസങ്ങൾ വേദന വർദ്ധിപ്പിക്കുന്ന പ്രോസ്റ്റാഗ്ലാൻഡിന്റെ അളവ് കൂട്ടിയേക്കാം.