'ചൂര ലോകത്തിലെ സമ്പന്നരായ ആളുകളും ഏറെ ഇഷ്ടപ്പെടുന്ന മീന്‍, പക്ഷേ ചിലര്‍ക്ക് ഇതിന്‍റെ രുചി ഇഷ്ടമല്ല'

മുഖ്യമന്ത്രി പിണറായി വിജയന്‍റെ 'എ ക്ലാസ് മീന്‍' പ്രണയത്തെക്കുറിച്ചുള്ള സി ദിവാകരന്‍റെ പരാമര്‍ശം ചര്‍ച്ചയായതിന് പിന്നാലെ ചൂരയെക്കുറിച്ച് ഫെയ്സ്ബുക്ക് കുറിപ്പുമായി ഡോ. എസ്എസ് ലാല്‍. വിലകൂടിയ മീനുകളാണ് പിണറായിക്ക് ഇഷ്ടമെന്നും ചൂര മീനായതിനാല്‍, സിപിഎം നേതാവ് ആനത്തലവട്ടം ആനന്ദന്‍റെ വീട്ടില്‍ നിന്ന് ഭക്ഷണം കഴിക്കാതെ പിണറായി വിജയന്‍ മടങ്ങിയെന്നുമാണ് ഒരു മാധ്യമത്തിന് നല്കിയ അഭിമുഖത്തില്‍ മുന്‍ മന്ത്രിയായിരുന്ന സി.ദിവാകരന്‍ പറഞ്ഞത്.

എന്നാല്‍ ചൂര ഒരു ചെറിയ മീനല്ലെന്നും, വളരെ പോഷകസമൃദ്ധമായ ഒരു കടൽമീനാണെന്നും ഡോ. എസ്എസ് ലാല്‍ ഫെയ്സ്ബുക്കില്‍ കുറിച്ചു. സുഷി പോലുള്ള വിലകൂടിയ വിഭവങ്ങളിൽ ഉപയോഗിക്കുന്ന ഉയർന്ന നിലവാരത്തിലുള്ള ചൂര ലോകത്തിലെ സമ്പന്നരായ ആളുകളും ഏറെ ഇഷ്ടപ്പെടുന്ന ഭക്ഷണങ്ങളിലൊന്നാണ്. അതിനാൽ ചൂര സമ്പന്നർ വെറുക്കുന്ന ഭക്ഷണമല്ല. ചിലർക്ക് ഇതിന്റെ രുചിയോ മണിയോ ഇഷ്ടമാകാതിരിക്കാം, എന്നാൽ അതിന്‍റെ ആരോഗ്യഗുണങ്ങളും പോഷകമൂല്യവും പരിഗണിക്കുമ്പോൾ ചൂരയെ വെറുക്കേണ്ടതില്ല. ശരിയായ രീതിയിൽ പാചകം ചെയ്താൽ ഇത് രുചികരവും ആരോഗ്യകരവുമായ ഒരു ഭക്ഷണമായി മാറുമെന്നും അദ്ദേഹം വിശദീകരിക്കുന്നു.

'Tuna എന്നാണ് ഇംഗ്ലീഷിൽ ചൂര അറിയപ്പെടുന്നത്. ഇതിൽ ശരീരത്തിന് ആവശ്യമായ പ്രോട്ടീൻ, ഒമേഗ-3 ഫാറ്റി ആസിഡുകൾ, വിറ്റാമിൻ ഡി, വിറ്റാമിൻ ബി12 എന്നിവ ധാരാളമായി അടങ്ങിയിട്ടുണ്ട്. ഹൃദയാരോഗ്യം മെച്ചപ്പെടുത്താനും മസ്തിഷ്‌കത്തിന്റെ പ്രവർത്തനം പിന്തുണയ്ക്കാനും ട്യൂണ സഹായിക്കുന്നു. കേരളത്തിലെ തീരപ്രദേശങ്ങളിൽ ഇത് സാധാരണയായി ലഭിക്കുന്നതിനാൽ, ആരോഗ്യകരമായ ഭക്ഷണക്രമത്തിന്റെ ഭാഗമാക്കാൻ എളുപ്പവുമാണ്.

ജപ്പാൻ, മാലിദ്വീപ്, ശ്രീലങ്ക, ഇന്തോനേഷ്യ, ഫിലിപ്പീൻസ്, സ്പെയിൻ, ഇറ്റലി തുടങ്ങിയ രാജ്യങ്ങളിൽ ചൂര വളരെ ജനപ്രിയമായ ഭക്ഷണമാണ്. അതുപോലെ തന്നെ അമേരിക്കയിലും യൂറോപ്പിലുമുള്ള പല രാജ്യങ്ങളിലും ടിന്നിൽ ലഭിക്കുന്ന ട്യൂണ സാധാരണമായി ഉപയോഗിക്കുന്ന ഒരു ഭക്ഷണമാണ്. സാലഡുകൾ, സാൻഡ്‌വിചുകൾ, പാസ്ത തുടങ്ങിയ വിഭവങ്ങളിൽ ചൂര വ്യാപകമായി ഉപയോഗിക്കപ്പെടുന്നു. കേരളത്തിലും പുറത്തും ജീവിച്ചപ്പോൾ ചൂര ധാരാളം കഴിച്ചിട്ടുണ്ട്.

യൂറോപ്പിലും അമേരിക്കയിലും ജീവിച്ചപ്പോൾ ഞാനൊരു ചൂര (ട്യൂണ) ഫാനായി. ഇപ്പോഴും ചൂര കഴിക്കുന്നു. '– അദ്ദേഹം പരിഹാസ രൂപേണ കുറിച്ചു. ആഹാരത്തിനും ഒരു രാഷ്ട്രീയമുണ്ട് എന്ന പരാമര്‍ശത്തോടെയാണ് ഡോ. എസ്എസ് ലാല്‍ കുറിപ്പ് അവസാനിപ്പിക്കുന്നത്.