ബാബ് അല് മന്ദിബ് അടയ്ക്കുമെന്ന യെമനിലെ ഹൂതി വിമതരുടെ ഭീഷണിയില് ആശങ്കയിലാണ് ലോകം. ബാബ് അല് മന്ദിബ് മറ്റൊരു ഹോര്മുസ് കടലിടുക്കാകുമോ? ലോകത്തിലെ ഏറ്റവും തന്ത്രപ്രധാനമായ സമുദ്രപാതകളിലൊന്നാണ് ബാബ് അല് മന്ദിബ്. ചെങ്കടലിനെ ഏദൻ ഉൾക്കടലുമായും അറബിക്കടലുമായും ബന്ധിപ്പിക്കുന്ന ഈ ഇടുങ്ങിയ പാതയിലൂടെയാണ് ആഗോള എണ്ണവ്യാപാരത്തിന്റെ വലിയൊരു ഭാഗം കടന്നുപോകുന്നത്. ഇറാന്റെ പിന്തുണയുള്ള ഹൂതി വിമതരുടെ ശക്തികേന്ദ്രമായ യെമന്റെ പടിഞ്ഞാറന് മേഖലയ്ക്ക് സമീപമാണ് ബാബ് അല് മന്ദിബ് എന്നതിനാല് ലോകം ആശങ്കയിലാണ്.
എന്താണ് ബാബ് അല് മന്ദിബ് ?
അറബിക് ഭാഷയിൽ "കണ്ണീരിന്റെ വാതിൽ" (Gate of Tears) എന്നാണര്ഥം. യെമനും (അറേബ്യൻ ഉപദ്വീപ്) ജിബൂട്ടി, എറിട്രിയ എന്നിവയ്ക്കിടയിലാണ് സ്ഥാനം. കേവലം 29 കിലോമീറ്റർ മാത്രം വീതിയുള്ള പ്രദേശം. ചെങ്കടലിന്റെ തെക്കന് പ്രവേശനകവാടമായ ഈ കടലിടുക്ക് വഴിയാണ് ചരക്കുകപ്പലുകള് സൂയസ് കനാലിലേക്ക് പ്രവേശിക്കുന്നത്.
എന്തുകൊണ്ടാണ് "ഹോർമുസ് 2.0" എന്ന് വിളിക്കുന്നത്?
ഹോര്മുസും ബാബ് അല് മന്ദിബും അടച്ചാല് അതിനര്ഥം ലോകത്ത് വിതരണം ചെയ്യപ്പെടുന്ന മൂന്നില് ഒരു ബാരല് എണ്ണ വിതരണം തടസപ്പെടുന്നുവെന്നാണ്. പേർഷ്യൻ ഗൾഫിൽ നിന്നുള്ള എണ്ണയും പ്രകൃതിവാതകവും യൂറോപ്പിലേക്കും അമേരിക്കയിലേക്കും എത്തുന്നതിനുള്ള പ്രധാന പാതയാണ് ബാബ് അല് മന്ദിബ്. ഹോർമുസിനെപ്പോലെ തന്നെ, ഇവിടെയുണ്ടാകുന്ന ചെറിയൊരു തടസം പോലും രാജ്യാന്തര വിപണിയിലെ ഇന്ധനവില കുതിച്ചുയരാൻ കാരണമാകും. സമീപകാലത്ത് ഈ പ്രദേശം വാർത്തകളിൽ നിറയാൻ പ്രധാനമായും രണ്ട് കാരണങ്ങളാണുള്ളത്. ഗാസയിലെ ഇസ്രയേൽ ആക്രമണത്തിന് ബദലായി ഈ മേഖല വഴി കടന്നുപോയിരുന്ന യുഎസ്, ഇസ്രയേൽ കപ്പലുകൾക്ക് നേരെ ഹൂതി വിമതർ തുടർച്ചയായ ആക്രമണങ്ങൾ നടത്തിയിരുന്നു. ഇറാൻ മണ്ണിൽ യുഎസ് കരസേന കാലുകുത്തിയാൽ ബാബ് അൽ മൻദിബ് അടക്കുമെന്ന ഭീഷണിയുമായി ഹൂതികൾ രംഗത്തെത്തിയിട്ടുണ്ട്.
ആഗോള സമ്പദ്വ്യവസ്ഥയെ എങ്ങനെ ബാധിക്കും?
ബാബ് അൽ മൻദിബ് കടക്കാതെ കപ്പലുകൾക്ക് സൂയസ് കനാലിലേക്ക് പ്രവേശിക്കാനാകില്ല. ലോകഎണ്ണ വ്യാപാരത്തിന്റെ 10 മുതൽ 12 ശതമാനം വരെ ഈ പാതയിലൂടെയാണ് കടന്നുപോകുന്നത്. പ്രതിദിനം ഏകദേശം 8.8 ദശലക്ഷം ബാരൽ ക്രൂഡ് ഓയിലും പെട്രോളിയം ഉൽപ്പന്നങ്ങളും ഈ വഴി കടന്നുപോകാറുണ്ടായിരുന്നു. ആക്രമണങ്ങൾക്ക് ശേഷം അത് നിലവിൽ 4.5 ദശലക്ഷമായി കുറഞ്ഞിട്ടുണ്ട്. ഈ കടലിടുക്ക് അടച്ചുപൂട്ടിയാൽ ചരക്കുനീക്കത്തിന് വലിയ സമയനഷ്ടമുണ്ടാകും. കപ്പലുകൾ ചെങ്കടൽ പാത ഒഴിവാക്കി ആഫ്രിക്കയെ ചുറ്റി (Cape of Good Hope വഴി) തിരിച്ചുവിടാൻ നിർബന്ധിതരാകും. അതായാത് ആറായിരം കിലോമീറ്ററോളം അധികദൂരം. അതിന് 10 മുതൽ 14 ദിവസംവരെ അധികസമയം വേണ്ടിവന്നേക്കും. അത് ചരക്കുകൂലി വർദ്ധിക്കാനും വിതരണ ശൃംഖല തകരാനും കാരണമാകും. ഉൽപ്പന്നങ്ങളുടെ വില വർധിക്കാനും കാരണമാകും. സൗദി അറേബ്യ യാൻബു തുറമുഖം വഴി എണ്ണക്കയറ്റുമതി ചെയ്യാറുണ്ട്. ബാബ് അൽ മൻദിബ് അടച്ചാൽ അവിടെയും കയറ്റുമതി തടസപ്പെടും. ഒപ്പം ഫലത്തിൽ സൂയസ് കനാൽ ഉപയോഗശൂന്യമാകേണ്ട അവസ്ഥവരുമെന്നതും ആശങ്കയാണ്. ഇതുമാത്രമല്ല, ലോകത്തെ പ്രധാനപ്പെട്ട ഡേറ്റാ കേബിളുകളും ഇന്റർനെറ്റ് ലൈനുകളും ഈ കടലിടുക്കിന് അടിയിലൂടെയാണ് കടന്നുപോകുന്നത്. അതിനാൽ ഇവിടെയുണ്ടാകുന്ന തകർ komplex ആഗോള ആശയവിനിമയത്തേയും ബാധിച്ചേക്കാം.
TOPSHOT - Israeli Prime Minister Benjamin Netanyahu gives a press conference in Jerusalem on March 19, 2026. (Photo by Ronen Zvulun / POOL / AFP) /
ലോകരാജ്യങ്ങളുടെ ഇടപെടൽ
അമേരിക്കയുടെ നേതൃത്വത്തിൽ 'ഓപ്പറേഷൻ പ്രോസ്പിരിറ്റി ഗാർഡിയൻ' (Operation Prosperity Guardian) എന്ന പേരിൽ ഒരു ബഹുരാഷ്ട്ര ടാസ്ക് ഫോഴ്സ് ഈ മേഖലയിൽ രൂപീകരിച്ചിട്ടുണ്ട്. കപ്പലുകൾക്ക് സംരക്ഷണം നൽകുക എന്നതാണതിന്റെ ലക്ഷ്യം. എങ്കിലും, ഡ്രോൺ ആക്രമണങ്ങൾ തടയുക എന്നത് ഇപ്പോഴും വലിയൊരു വെല്ലുവിളിയായി തുടരുന്നു. ഇന്ത്യൻ നാവികസേനയും ഇന്ത്യൻ കപ്പലുകൾക്ക് ഈ മേഖലയിൽ സംരക്ഷണമൊരുക്കാറുണ്ട്. യുഎസ്, യുകെ, ഫ്രാൻസ്, ഇറ്റലി തുടങ്ങി ലോകരാജ്യങ്ങൾക്ക് ജിബൂട്ടിയിൽ സൈനികതാവളങ്ങളുണ്ട്. എങ്കിലും തൊട്ടടുത്തുകിടക്കുന്ന ഹൂതികളുടെ ആക്രമണം രൂക്ഷമാവുകയോ ബാബ് അൽ മൻദിബ് അടച്ചുപൂട്ടുകയോ ചെയ്താൽ മേഖലയെയും അതുവഴി ലോകസാമ്പത്തിക വ്യവസ്ഥയേയും അസ്ഥിരമാക്കുമെന്നുറപ്പാണ്.