ഇനി ഞങ്ങളുടെ ഊഴം; അമേരിക്കയെ കാത്തിരിക്കുന്നത് സര്‍വനാശം; ഖമനയി

ഫോര്‍ഡോ ഉള്‍പ്പടെ മൂന്ന് ആണവകേന്ദ്രങ്ങള്‍ക്ക് നേരെ യുഎസ് ആക്രമണം ഉണ്ടായതായി സ്ഥിരീകരിച്ച് ഇറാന്‍. അന്യായമായ ആക്രമണത്തിന് തിരിച്ചടിക്കാനുള്ള ഇറാന്‍റെ സമയമാണ് ഇനിയെന്നും ഖമനയി മുന്നറിയിപ്പ് നല്‍കി. അമേരിക്ക ഇന്നുവരെ കണ്ടിട്ടില്ലാത്തത്ര വലിയ നാശം വിതയ്ക്കുമെന്നും ഖമനയി  പറഞ്ഞു. കാലതാമസമില്ലാതെ അമേരിക്കയ്ക്ക് മറുപടി നല്‍കാനുള്ള സമയമാണിതെന്നായിരുന്നു ഖമനയിയുടെ പ്രതിനിധിയായ ഹുസൈന്‍ ഷര്യത്​മദരിയുടെ പ്രതികരണം. Also Read: ‘സമാധാനം അല്ലെങ്കില്‍ നാശം’; ഇറാന് അമേരിക്കയുടെ അന്ത്യശാസനം

ആദ്യഘട്ടമെന്ന നിലയില്‍ ബഹ്​റൈനിലെ യുഎസ് നാവികസേനയ്ക്ക് നേരെ മിസൈല്‍ ആക്രമണം നടത്തുമെന്നും അമേരിക്ക, ബ്രിട്ടിഷ്, ജര്‍മന്‍,ഫ്രഞ്ച് കപ്പലുകള്‍ ഹോര്‍മൂസിലൂടെ കടത്തിവിടില്ലെന്നും ഷര്യത്​മദരി പ്രഖ്യാപിച്ചു. യുഎസ് ആക്രമണത്തില്‍ ഇറാനിലെ ജനങ്ങള്‍ക്ക് ഒരു അപകടവും സംഭവിച്ചിട്ടില്ലെന്നും ഫോര്‍ഡോ ഉള്‍പ്പടെ സുരക്ഷിതമാണെന്നും ഇറാന്‍ വ്യക്തമാക്കി.  Read More: ഫോര്‍ഡോയെ തകര്‍ക്കാന്‍ യുഎസ് ആയുധപുരയിലെ ഭീമന്‍; 13,600 കിലോ ഭാരം

അമേരിക്കന്‍ ആക്രമണത്തെ വകവയ്ക്കുന്നില്ലെന്നും ആണവ പദ്ധതികളുമായി ഇറാന്‍ മുന്നോട്ട് പോകുമെന്നും ഇറാന്‍റെ ആണവോര്‍ജ ഏജന്‍സി പ്രഖ്യാപിച്ചു. 'ശത്രുക്കളുടെ ആക്രമണത്തിന് മുന്നില്‍ പതറി, വികസന പ്രവര്‍ത്തനങ്ങള്‍ പാതിവഴിയില്‍ ഉപേക്ഷിക്കാന്‍ ഇറാന്‍റെ അറ്റോമിക് എനര്‍ജി ഓര്‍ഗനൈസേഷന്‍ ഉദ്ദേശിക്കുന്നില്ല. ധീര രക്തസാക്ഷികളുടെ ചോരയില്‍ പടുത്തുയര്‍ത്തിയതാണ് ആണവ പദ്ധതിയെന്നും അത് പരിപാലിക്കുമെന്നും' ഔദ്യോഗിക മാധ്യമങ്ങളിലൂടെ സംഘടന വ്യക്തമാക്കി.

അതേസമയം, ഇറാന്‍റെ ഭാഗത്ത് നിന്ന് ഏതെങ്കിലും തരത്തിലുള്ള പ്രത്യാക്രമണം ഉണ്ടായാല്‍ ഇപ്പോള്‍ ഉണ്ടായതിലും ഭീകരമായ പ്രത്യാഘാതം നേരിടേണ്ടി വരുമെന്ന് ട്രംപ് തിരിച്ചടിച്ചു. സമാധാനത്തിന്‍റെ സമയമാണിതെന്നും വഴങ്ങുന്നതാണ് ഇറാന് നല്ലതെന്നും ട്രംപ് കൂട്ടിച്ചേര്‍ത്തു. 'കഴിഞ്ഞ നാല് പതിറ്റാണ്ടായി അമേരിക്കയുടെ അന്ത്യം, ഇസ്രയേലിന്‍റെ അന്ത്യം എന്നാണ് ഇറാന്‍ ഉരുവിട്ട് പോന്നത്. ഞങ്ങളുടെ ജനങ്ങളെ അവര്‍ കൊന്നു, ആയിരക്കണക്കിന് പൗരന്‍മാരെ ഞങ്ങള്‍ക്ക് നഷ്ടമായി. ഇത് ഇങ്ങനെ തുടര്‍ന്ന് പോകാന്‍ അനുവദിക്കില്ലെന്ന് ഞാന്‍ ഉറപ്പിച്ചതാണ്. നെതന്യാഹുവിനെ അഭിനന്ദിക്കാനും നന്ദിപറയാനും ഞാന്‍ ഈ അവസരം വിനിയോഗിക്കുകയാണ്. ഒരു ടീമായാണ് ഞങ്ങള്‍ ഇത് ചെയ്തത്'. ഇസ്രയേലിന്‍റെ ഈ ഭീഷണിയെ തുടച്ച് നീക്കാന്‍ പ്രതിജ്ഞാബദ്ധമാണെന്നും ട്രംപ് പ്രതികരിച്ചു.