‘സുഖമാണോ?’; ഒമാനില്‍ മലയാളം സംസാരിച്ച് പ്രധാനമന്ത്രി

ഒമാനില്‍ മലയാളത്തില്‍ സംസാരിച്ച് പ്രധാനമന്ത്രി നരേന്ദ്ര മോദി. സുഖമാണോ എന്നായിരുന്നു പ്രധാനമന്ത്രിയുടെ മലയാളത്തിലുള്ള ചോദ്യം. ഇന്ത്യന്‍ സമൂഹത്തെ അഭിസംബോധന ചെയ്യുമ്പോഴാണ് അദ്ദേഹം മലയാളം പറഞ്ഞത്. 

പുതിയ ചരിത്രം 

ഇന്ത്യയും ഒമാനും തമ്മിലുള്ള നയതന്ത്ര ബന്ധത്തിൽ പുതിയ ചരിത്രം കുറിച്ച് ഇരുരാജ്യങ്ങളും സമഗ്ര സാമ്പത്തിക പങ്കാളിത്ത കരാറിൽ ഒപ്പുവെച്ചു.  മസ്‌കറ്റിലെ അൽ ആലം കൊട്ടാരത്തിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദിയും ഒമാൻ ഭരണാധികാരി സുൽത്താൻ ഹൈതം ബിൻ താരിഖും പങ്കെടുത്തു. കേന്ദ്ര വാണിജ്യ മന്ത്രി പീയൂഷ് ഗോയലും ഒമാൻ വാണിജ്യ മന്ത്രി ഖ്വയ്‌സ് ബിൻ മുഹമ്മദ് അൽ യൂസഫുമാണ് കരാറിൽ ഒപ്പുവെച്ചത്. 

പുതിയ കരാർ നിലവിൽ വരുന്നതോടെ ഇന്ത്യയിൽ നിന്നുള്ള തൊണ്ണൂറ്റിയെട്ട് ശതമാനം ഉൽപ്പന്നങ്ങൾക്കും ഒമാനിലേക്ക് നികുതിയില്ലാതെ കയറ്റുമതി ചെയ്യാനാകും. തുണിത്തരങ്ങൾ, ആഭരണങ്ങൾ, പാദരക്ഷകൾ, ഫാർമസ്യൂട്ടിക്കൽസ് തുടങ്ങിയ മേഖലകൾക്ക് ഈ നികുതി ഇളവ് വലിയ ആശ്വാസമാകും. ഇന്ത്യയിലെ ആയുർവേദ മേഖലയ്ക്കും മരുന്നുകൾക്കും ഒമാൻ വിപണിയിൽ ഇനി കൂടുതൽ സ്വീകാര്യത ലഭിക്കും. ഒമാനിലെ പ്രധാന സേവന മേഖലകളിൽ ഇന്ത്യൻ കമ്പനികൾക്ക് നൂറ് ശതമാനം നേരിട്ടുള്ള വിദേശ നിക്ഷേപത്തിനും കരാർ അനുമതി നൽകുന്നുണ്ട്. കഴിഞ്ഞ രണ്ട് വർഷത്തിനിടെ ഒമാനിലേക്കുള്ള ഇന്ത്യൻ നിക്ഷേപം മൂന്നിരട്ടിയായി വർധിച്ചത് ഈ പങ്കാളിത്തത്തിന്റെ ആഴം വ്യക്തമാക്കുന്നു. ചെറുകിട സംരംഭങ്ങൾക്കും വനിതാ സംരംഭകർക്കും ഒമാൻ വിപണിയിൽ മികച്ച അവസരങ്ങൾ ഉറപ്പാക്കാൻ കരാറിലെ വ്യവസ്ഥകൾ സഹായിക്കും. 

ഇന്ത്യയിൽ നിന്നുള്ള പ്രൊഫഷണലുകൾക്ക് ഒമാനിൽ കൂടുതൽ തൊഴിൽ സുരക്ഷയും എളുപ്പത്തിലുള്ള പ്രവേശനവും കരാർ വാഗ്ദാനം ചെയ്യുന്നു. ഉഭയകക്ഷി വ്യാപാരം നിലവിലെ പതിനായിരം കോടി ഡോളറിൽ നിന്നും വരും വർഷങ്ങളിൽ ഇരട്ടിയായി വർധിക്കുമെന്നാണ് പ്രതീക്ഷിക്കുന്നത്. പെട്രോളിയം ഉൽപ്പന്നങ്ങൾക്കും വളം നിർമ്മാണത്തിനും ആവശ്യമായ അസംസ്‌കൃത വസ്തുക്കൾ കുറഞ്ഞ ചിലവിൽ ഇന്ത്യയിലേക്ക് ഇറക്കുമതി ചെയ്യാൻ ഇതിലൂടെ സാധിക്കും. സന്ദർശന വേളയിൽ ഒമാന്റെ പരമോന്നത ബഹുമതിയായ 'ഓർഡർ ഓഫ് ഒമാൻ' പുരസ്‌കാരം നൽകി സുൽത്താൻ പ്രധാനമന്ത്രിയെ ആദരിച്ചു. എഴുപത് വർഷത്തെ നയതന്ത്ര ബന്ധത്തിന്റെ ആഴം വെളിപ്പെടുത്തുന്നതായിരുന്നു പ്രധാനമന്ത്രിക്ക് ലഭിച്ച ഈ ആദരം. ഇരുരാജ്യങ്ങളിലെയും ജനങ്ങൾ തമ്മിലുള്ള സാംസ്‌കാരികവും ചരിത്രപരവുമായ ബന്ധം ഈ കരാറിലൂടെ കൂടുതൽ ശക്തമാകും.