'യെസ് യുവര്‍ ഓണര്‍, അയാം ദി വിറ്റ്നസ്'; മമിതയുടെ കമന്‍റ്; പരിഹസിച്ചവര്‍ക്ക് ഉണ്ണിക്കണ്ണന്‍റെ മറുപടി

വിജയ്​യോടുള്ള കടുത്ത ആരാധന കൊണ്ട് പ്രശസ്തനായ വ്യക്തിയാണ് ഉണ്ണിക്കണ്ണന്‍ മംഗലംഡാം. വിജയ്​യെ കാണാനായി താരത്തിന്‍റെ ചിത്രവും കഴുത്തില്‍ തൂക്കി തമിഴ്​നാട് വരെ ഉണ്ണിക്കണ്ണന്‍ പോയിരുന്നു. ഒടുവില്‍ തന്‍റെ ആഗ്രഹം സഫലമായെന്നും ചിത്രങ്ങള്‍ ഉടന്‍ തന്നെ പുറത്തുവരുമെന്നും അറിയിച്ച് ഉണ്ണിക്കണ്ണന്‍ രംഗത്തെത്തിയിരുന്നു. എന്നാല്‍ ഫോട്ടോകളൊന്നും പുറത്തുവരാതായതോടെ ഉണ്ണിക്കണ്ണനെ പരിഹസിച്ചും ഒരു വിഭാഗം എത്തിയിരുന്നു. 

എന്നാല്‍ പരിഹസിച്ചവര്‍ക്ക് മറുപടിയുമായി രംഗത്തെത്തിയിരിക്കുയാണ് ഉണ്ണിക്കണ്ണന്‍. വിജയ്​യെ ഉണ്ണിക്കണ്ണന്‍ കണ്ടതിന് താന്‍ ദൃക്സാക്ഷിയാണെന്ന നടി മമിത ബൈജുവിന്‍റെ കമന്‍റിന്‍റെ സ്ക്രീന്‍ ഷോട്ട് ഉണ്ണിക്കണ്ണന്‍ തന്നെയാണ് പങ്കുവച്ചിരിക്കുന്നത്. ഈ തിരക്കിനിടിയിലും മമിത വന്ന് പറഞ്ഞതില്‍ തനിക്ക് സന്തോഷമുണ്ടെന്ന് സമൂഹമാധ്യമങ്ങളില്‍ പങ്കുവച്ച വിഡിയോയില്‍ ഉണ്ണിക്കണ്ണന്‍ പറഞ്ഞു. 

'ഈ ലോകത്ത് ഒരു സത്യമുണ്ട്. ആ സത്യം ദൈവമാണ്. വിജയ് അണ്ണനെ കണ്ടില്ലെന്ന് പറഞ്ഞ് എന്നെ ഒരുപാട് നിങ്ങൾ വേദനിപ്പിച്ചു. അതിന് ഈ തിരക്കിനിടയിലും ദൈവത്തെ പോലെ വന്ന് മമിത ബൈജു, അനിയത്തിക്കുട്ടി വന്ന് പറഞ്ഞു. അനിയത്തിക്കുട്ടി അവിടെ ഉണ്ടായിരുന്നു. ഒരുപാട് സന്തോഷം. ഉണ്ണിക്കണ്ണൻ നുണ പറയില്ല. ഞാൻ കാണാൻ പോയത് അപ്പുറത്തുള്ള ആളെയല്ല. ലോകം അറിയുന്ന വിജയ് അണ്ണനെയാണ്', എന്നാണ് ഉണ്ണിക്കണ്ണന്‍ വിഡിയോയില്‍ പറഞ്ഞത്.