ഞാനല്ലാതെ പിന്നാര്....; ട്രാക്കില്‍ ദിവ്യ സാഷ; പുണര്‍ന്ന് സംഗീത

അത്ലറ്റിക് മത്സരത്തിനെത്തിയ തമിഴ്​നാട് മുഖ്യമന്ത്രി വിജയ്​യുടെ മകള്‍ ദിവ്യ സാഷയുടെ വിഡിയോ ആണ് സമൂഹമാധ്യമങ്ങളില്‍ ഇപ്പോള്‍ ട്രെന്‍ഡിങ്ങായിരിക്കുന്നത്. ദിവ്യക്ക് പിന്തുണയുമായി അമ്മ സംഗീതയും കാണികള്‍ക്കിടയിലുണ്ടായിരുന്നു. ഇരുവരും തമ്മില്‍ പുണരുന്ന വിഡിയോ ആണ് സമൂഹമാധ്യമങ്ങളില്‍ പ്രചരിക്കുന്നത്. 

കഴിഞ്ഞ ദിവസമായിരുന്നു വിജയ്​യുടെ 52–ാം പിറന്നാള്‍. ഇതിന് പിന്നാലെയാണ് ദിവ്യ സാഷയുടേയും സംഗീതയുടേയും വിഡിയോ സമൂഹമാധ്യമങ്ങളില്‍ പ്രചരിച്ചത്. വിജയ്​യും സംഗീതയും തമ്മിലുള്ള വിവാഹമോചനക്കേസ് നിലവിൽ ചെങ്കൽപ്പെട്ട് കുടുംബ കോടതിയുടെ പരിഗണനയിലാണ്.  

കഴിഞ്ഞ ജൂൺ 15-ന് കേസ് പരിഗണിച്ച കോടതി, അടുത്ത വാദം കേൾക്കുന്നത് ഓഗസ്റ്റ് 7-ലേക്ക് മാറ്റി വച്ചു. സുരക്ഷാ കാരണങ്ങളാൽ വിഡിയോ കോൺഫറൻസ് വഴി ഹാജരാകാൻ വിജയ്‌യും സംഗീതയും അനുമതി തേടിയിരുന്നു. എന്നാൽ ഈ അപേക്ഷ നിരസിച്ച കോടതി ഇരുവരും നേരിട്ട് ഹാജരാകണമെന്ന് കർശനമായി നിർദ്ദേശിക്കുകയായിരുന്നു. 

കോടതിയിൽ സമർപ്പിച്ച ഹർജിയിൽ  2021 മുതൽ വിജയ്‌ക്ക് ഒരു സഹനടിയുമായി ബന്ധമുണ്ടെന്നും, താൻ പലതവണ എതിർപ്പ് പ്രകടിപ്പിച്ചിട്ടും വിജയ് ആ ബന്ധം തുടർന്നു എന്നും സംഗീത ആരോപിച്ചിരുന്നു. ഈ നടി തൃഷയാണെന്ന അഭ്യൂഹങ്ങള്‍ പരക്കുന്നതിനിടെ വിജയ് തൃഷക്കൊപ്പം പൊതുവിടങ്ങളില്‍ പ്രത്യക്ഷപ്പെട്ടിരുന്നു. വിജയ്​യുടെ പിറന്നാളിനോടനുബന്ധിച്ച് ഇരുവരും ഒരുമിച്ച് കേക്കിന് മുന്നില്‍ നില്‍ക്കുന്ന ചിത്രവും തൃഷ പങ്കുവച്ചിരുന്നു. ഇതിന് പിന്നാലെയാണ് സംഗീതയുടേയും മകളുടേയും വിഡിയോ സമൂഹമാധ്യമങ്ങളില്‍ പ്രചരിച്ചത്.