2,000 കിലോമീറ്റര്‍ താണ്ടിയെത്തി പിതാവിനെ കൊന്ന് മടങ്ങി; ‘ദൃശ്യം’ മോഡലെന്ന് പൊലീസ്

2,000 കിലോമീറ്ററോളം സഞ്ചരിച്ചെത്തി, ഉറങ്ങിക്കിടന്ന പിതാവിനെ വെട്ടിക്കൊലപ്പെടുത്തി മകന്‍. ബിഹാറിലെ സമസ്തിപൂർ ജില്ലയിലുള്ള ദർവ ഗ്രാമത്തിലാണ് സംഭവം. അന്‍പതുകാരനായ രഘുവീർ സാഹ്നിയെയാണ് മകൻ ശിവശങ്കർ ക്രൂരമായി കൊലപ്പെടുത്തിയത്. സൂപ്പര്‍ഹിറ്റ് മലയാള ചിത്രം ദൃശ്യത്തിന്‍റെ ബോളിവുഡ് റീമേക്കില്‍ നിന്ന് പ്രചോദനം ഉൾക്കൊണ്ട്, തെളിവുകൾ അവശേഷിപ്പിക്കാതെ കൃത്യമായി ആസൂത്രണം ചെയ്താണ് യുവാവ് കൊല നടത്തിയതെന്ന് പൊലീസ് പറയുന്നു. എന്നാൽ കൊലപാതകത്തിന് ശേഷം ഭാര്യയെ വിളിച്ച ഒറ്റ ഫോൺ കോളാണ് പ്രതിയെ കുടുക്കിയത്.

ജൂലൈ 26-ന് രാത്രി വൈകിയാണ് കേസിനാസ്പദമായ സംഭവം നടന്നത്. ജോലിക്കായി ഭാര്യയ്ക്കൊപ്പം സൂറത്തില്‍ താമസിക്കുന്ന ശിവശങ്കര്‍ അവിടെവച്ച് സ്വന്തം മൊബൈൽ ഫോൺ സ്വിച്ച് ഓഫ് ചെയ്ത് 2,000 കിലോമീറ്ററോളം താണ്ടി പട്നയിലെത്തിയായിരുന്നു കൊല നടത്തിയത്. 'ദൃശ്യം' സിനിമ കണ്ട ശിവശങ്കർ, കൃത്യം നടക്കുന്ന സമയത്ത് താൻ മറ്റൊരു സ്ഥലത്തായിരുന്നു എന്ന് വരുത്തിതീര്‍ക്കാനായിരുന്നു ഇതിലൂടെ ശ്രമിച്ചതെന്ന് പൊലീസ് പറയുന്നു. ഹാജിപൂർ വഴി ട്രെയിൻ മാർഗ്ഗം പതോരി റെയിൽവേ സ്റ്റേഷനിലിറങ്ങിയ പ്രതി അവിടെനിന്ന് ഓട്ടോറിക്ഷയിലും പിന്നീട് നാല് കിലോമീറ്ററോളം നടന്നും അർദ്ധരാത്രിയോടെ വീട്ടിലെത്തി.. വീടിന് മുന്നിൽ ഉറങ്ങിക്കിടന്ന പിതാവിനെ വീട്ടിലുണ്ടായിരുന്ന കോടാലിയെടുത്ത് വെട്ടിക്കൊലപ്പെടുത്തിയ ശേഷം കോടാലി അവിടെ ഉപേക്ഷിച്ച് തിരികെ പതോരി റെയിൽവേ സ്റ്റേഷനിലേക്ക് മടങ്ങുകയായിരുന്നു.

കൊലപാതകത്തിന് ശേഷം പതോരി റെയിൽവേ സ്റ്റേഷനിൽ വച്ച് സ്വിച്ച് ഓഫ് ചെയ്തിരുന്ന ഫോൺ ഓൺ ചെയ്ത് ഭാര്യയെ വിളിച്ചതാണ് ശിവശങ്കറിന് തിരിച്ചടിയായത്. പിതാവിന്റെ സംസ്കാര ചടങ്ങുകളിൽ പങ്കെടുക്കാതിരുന്നതും ഫോൺ ലൊക്കേഷൻ കൊലപാതക ദിവസം പതോരിയിലും 36 മണിക്കൂറിന് ശേഷം സൂറത്തിലും കാണിച്ചതും പൊലീസിൽ സംശയം ജനിപ്പിച്ചു. ഫോറൻസിക് സംഘം നടത്തിയ പരിശോധനയിൽ കൊല്ലപ്പെട്ടയാളുമായി അടുത്ത ബന്ധമുള്ള ആരോ ആണ് കൊലപാതകത്തിന് പിന്നിലെന്ന് വ്യക്തമായിരുന്നു. തുടർന്ന് കോൾ റെക്കോർഡ് പരിശോധിച്ചപ്പോഴാണ് പതോരിയിൽ നിന്നുള്ള ഫോൺ കോൾ അന്വേഷണ സംഘം കണ്ടെത്തിയത്. സൂറത്തിൽ നിന്ന് കസ്റ്റഡിയിലെടുത്ത ശിവശങ്കർ കുറ്റം സമ്മതിച്ചതായും പൊലീസ് പറഞ്ഞു.

കുടുംബത്തില്‍ നിരന്തരം പ്രശ്നങ്ങൾ സൃഷ്ടിച്ചിരുന്ന തന്‍റെ പിതാവ് റഘുവീർ സാഹ്നി തന്നോടും ഭാര്യയോടും നിരന്തരം അധിക്ഷേപകരമായി പെരുമാറിയിരുന്നതായി ശിവശങ്കർ മൊഴി നൽകിയിട്ടുണ്ട്. കൂടാതെ കുടുംബ വസ്തു വിൽക്കുന്നതുമായി ബന്ധപ്പെട്ട് ഇരുവരും തമ്മിൽ കടുത്ത തർക്കവും നിലനിന്നിരുന്നു. സംഭവത്തിൽ തുടർ നടപടികൾ പുരോഗമിക്കുകയാണെന്ന് പൊലീസ് അറിയിച്ചു.

മലയാള ചിത്രം ദൃശ്യത്തിന്‍റെ ബോളീവു‍ഡ് റീമേക്കായ അജയ് ദേവ്ഗൺ നായകനായ 'ദൃശ്യ'ത്തിൽ നിന്ന് പ്രചോദനം ഉൾക്കൊണ്ടാണ് പ്രതി കൊലപാതകം ആസൂത്രണം ചെയ്തതെന്ന് പൊലീസ് വ്യക്തമാക്കി. ചിത്രത്തിലെ നായക കഥാപാത്രം കൊലപാതകത്തിന് ശേഷം കൃത്യമായ അലിബി (സംഭവസമയം മറ്റൊരിടത്തായിരുന്നു എന്നതിനുള്ള തെളിവ്) സൃഷ്ടിച്ചും സംഭവങ്ങളുടെ സമയക്രമത്തിൽ തിരിമറി നടത്തിയുമാണ് തന്റെ കുടുംബത്തെ രക്ഷിക്കാൻ ശ്രമിക്കുന്നത്. വ്യാജമായ ഒരു കഥ സങ്കൽപ്പിച്ച് പൊലീസിനേക്കാൾ ഒരുപടി മുന്നിൽ നിൽക്കാൻ നടത്തുന്ന ശ്രമങ്ങളാണ് സിനിമയുടെ ഇതിവൃത്തം. ഈ കേസിൽ, തെറ്റായ സമയക്രമം സൃഷ്ടിക്കുന്നതിനും ഡിജിറ്റൽ തെളിവുകൾ അവശേഷിപ്പിക്കാതിരിക്കുന്നതിനും പ്രതി സിനിമയിലെ തന്ത്രങ്ങളിൽ നിന്നാണ് പ്രചോദനം ഉൾക്കൊണ്ടതെന്ന് അന്വേഷണ സംഘം വെളിപ്പെടുത്തി.