പൊന്മുടിയിൽ വിനോദസഞ്ചാരികൾക്ക് നേരെ മുഖംമൂടി ആക്രമണം; വാഹനം തകർത്തു, ഡ്രൈവർക്ക് മർദനം

പൊന്മുടി സന്ദർശിച്ച് മടങ്ങുകയായിരുന്ന സഞ്ചാരികളുടെ വാഹനത്തിന് നേരെ വിതുരയിൽ വെച്ച് മുഖംമൂടി ധരിച്ച അഞ്ചംഗ സംഘത്തിന്റെ ക്രൂരമായ ആക്രമണം. വിനോദസഞ്ചാരികൾ സഞ്ചരിച്ച ട്രാവലർ വാഹനം തടഞ്ഞുനിർത്തി ചില്ലുകൾ തകർക്കുകയും ഡ്രൈവറെ ക്രൂരമായി മർദ്ദിക്കുകയും ചെയ്തു. സന്ധ്യാസമയത്തോടെയാണ്  സംഭവം നടന്നത്. തിരുവനന്തപുരം ബാലരാമപുരത്ത് നിന്ന് പൊന്മുടി സന്ദർശനത്തിനായി എത്തിയ സ്ത്രീകളും കുട്ടികളും അടങ്ങുന്ന മുപ്പതംഗ സംഘത്തിന് നേരെയാണ് ആക്രമണമുണ്ടായത്.

പൊന്മുടിയിൽ വെച്ച് വിനോദസഞ്ചാരികൾ വന്ന ട്രാവലറും മറ്റൊരു ട്രാവലറും തമ്മിൽ തർക്കമുണ്ടായിരുന്നു. വാഹനത്തിൽ ഉച്ചത്തിൽ പാട്ട് വെച്ചതുമായി ബന്ധപ്പെട്ടായിരുന്നു ഈ തർക്കം. എന്നാൽ, ഈ തർക്കത്തിൽ ഏർപ്പെട്ട വാഹനത്തിലുള്ളവരല്ല നേരിട്ട് ആക്രമണം നടത്തിയത്. പകരം, മറ്റൊരു കാറിലായി ഇവരെ പിന്തുടർന്നെത്തിയ അഞ്ചംഗ സംഘമാണ് വിതുരയിൽ വെച്ച് ട്രാവലർ തടഞ്ഞത്.

മുഖംമൂടി ധരിച്ചെത്തിയ സംഘം വടികളും ആയുധങ്ങളുമായി ട്രാവലറിന്റെ ചില്ലുകൾ അടിച്ച് തകർത്തു. തടയാൻ ശ്രമിച്ച ഡ്രൈവറെ ക്രൂരമായി മർദ്ദിച്ച ശേഷം ഇവർ വന്ന കാറിൽ തന്നെ അതിവേഗം രക്ഷപ്പെടുകയായിരുന്നു.

ആക്രമണത്തെ തുടർന്ന് ട്രാവലറിലുണ്ടായിരുന്ന സ്ത്രീകളും കുട്ടികളും അടക്കമുള്ള സഞ്ചാരികൾ പൂർണ്ണമായും പരിഭ്രാന്തരായി. പിന്നീട് ഇവരെ മറ്റൊരു വാഹനത്തിലാണ് സുരക്ഷിതമായി ബാലരാമപുരത്തെ വീടുകളിലേക്ക് മടക്കി അയച്ചത്. പ്രതികളെക്കുറിച്ച് നിലവിൽ വിതുര പൊലീസിന് സൂചനയൊന്നും ലഭിച്ചിട്ടില്ല.

എന്നാൽ, പൊന്മുടി ചെക്ക്പോസ്റ്റിൽ എത്തുന്ന മുഴുവൻ വാഹനങ്ങളുടെയും വിവരങ്ങളും നമ്പറുകളും കൃത്യമായി ശേഖരിക്കാറുണ്ട്. ഇന്ന് പൊന്മുടിയിലെത്തിയ കാറുകളുടെയും ട്രാവലറുകളുടെയും ലിസ്റ്റ് കേന്ദ്രീകരിച്ച് അന്വേഷണം ഊർജ്ജിതമാക്കിയിട്ടുണ്ട്. പ്രതികളെ ഉടൻ തന്നെ കണ്ടെത്താനാകുമെന്നാണ് പൊലീസ് നൽകുന്ന വിവരം.

അതേസമയം, ഇന്ന് പൊന്മുടിയിൽ വിനോദസഞ്ചാരികളുടെ വൻ തിരക്കായിരുന്നു അനുഭവപ്പെട്ടിരുന്നത്. എന്നാൽ കനത്ത മഴയെയും മണ്ണിടിച്ചിൽ സാധ്യതയെയും തുടർന്ന് നിലവിൽ പൊന്മുടിയിലേക്കുള്ള പ്രവേശനം അധികൃതർ താൽക്കാലികമായി അടച്ചിരിക്കുകയാണ്.