ജീവനക്കാര്‍ക്ക് സ്വമേധയാ പിരിഞ്ഞുപോകാന്‍ പാക്കേജുകള്‍; മൈക്രോസോഫ്റ്റിനും ഗൂഗിളിനുമൊപ്പം മെറ്റയും

ലോകമെമ്പാടും സാങ്കേതിക മേഖലയിലുണ്ടാകുന്ന മാറ്റങ്ങളുടെ പശ്ചാത്തലത്തില്‍ മൈക്രോസോഫ്റ്റ്, ഗൂഗിൾ തുടങ്ങിയ പ്രമുഖ സാങ്കേതിക കമ്പനികളെപ്പോലെ മെറ്റയും തങ്ങളുടെ ജീവനക്കാർക്കായി സ്വമേധയാ പിരിഞ്ഞുപോകുന്നതിനുള്ള ഒരു പദ്ധതി (voluntary redundancy programme) ആവിഷ്കരിക്കുന്നതായി റിപ്പോർട്ട്. ഫ്രഞ്ച് പ്രസിദ്ധീകരണമായ 'ലാ ലെട്രെ' നൽകുന്ന വിവരമനുസരിച്ച് ഏകദേശം 300 ജീവനക്കാരുള്ള ഫ്രാൻസിലെ മെറ്റയുടെ ഉപസ്ഥാപനത്തിൽ നിന്ന് 100-ഓളം പേർക്ക് പുറത്തുപോകാൻ അവസരമൊരുക്കുന്നതിനെക്കുറിച്ചാണ് കമ്പനി ആലോചിക്കുന്നത്. 'കലക്ടീവ് നെഗോഷിയേറ്റഡ് ടെർമിനേഷൻ എഗ്രിമെന്റ്' ‌എന്ന ഫ്രഞ്ച് തൊഴിൽ വ്യവസ്ഥയിലൂടെയാകും ഈ പിരിച്ചുവിടലുകൾ നടപ്പിലാക്കുക. കമ്പനികൾക്കും ജീവനക്കാർക്കും പരസ്പര ധാരണയോടെ സ്വമേധയാ പിരിഞ്ഞുപോകാൻ അനുവദിക്കുന്ന ഒരു സംവിധാനമാണിത്.

വാഗ്ദാനം ചെയ്യുന്നത് ആകര്‍ഷകമായ പിരിഞ്ഞുപോവല്‍ പാക്കേജുകള്‍

ഇത്തരമൊരു പിരിഞ്ഞുപോവല്‍ കരാറിനെക്കുറിച്ച് ജൂലൈയില്‍ തന്നെ ചര്‍ച്ചകള്‍ ആരംഭിച്ചതായാണ് റിപ്പോര്‍ട്ട് സൂചിപ്പിക്കുന്നത്.നവംബര്‍ 5 ആയിരുന്നു ജീവനക്കാര്‍ക്ക് അപേക്ഷ സമര്‍പ്പിക്കാനുള്ള അവസാന തീയതിയായി നിശ്ചയിച്ചത്. നിര്‍ബന്ധിതമായല്ലാതെ ജീവനക്കാര്‍ സ്വമേധയാ ജോലിയില്‍ നിന്ന് വിരമിക്കാന്‍ പ്രോല്‍സാഹിപ്പിക്കാനായാണ് ഈ ‘പിരിച്ചുവിടല്‍ ആനുകൂല്യ പദ്ധതി’ രൂപകല്‍പ്പന ചെയ്തിരിക്കുന്നതെന്നാണ് ലഭിക്കുന്ന വിവരങ്ങള്‍.  ഇതിൽ സേവനമനുഷ്ഠിച്ച ഓരോ വർഷത്തിനും 2.15 മാസത്തെ ശമ്പളത്തിന് തുല്യമായ നഷ്ടപരിഹാരം ഉൾപ്പെടുന്നു. കൂടാതെ തൊഴിൽ മാറ്റത്തിന്‍റെ കാലയളവിൽ 10 മാസം വരെ ശമ്പളത്തോടുകൂടിയ അവധിയും ജീവനക്കാർക്ക് ലഭിച്ചേക്കാം.  ഈ സമയത്ത് അവർക്ക് അവരുടെ മൊത്ത ശമ്പളത്തിന്റെ 80 ശതമാനം ലഭിക്കും. പുനർപരിശീലനത്തിനുള്ള അവസരങ്ങൾ, സ്വന്തമായി ബിസിനസ്സ് തുടങ്ങുന്നതിനുള്ള സഹായം തുടങ്ങിയ അധിക പിന്തുണകളും പരിഗണനയിലുണ്ടെന്ന് റിപ്പോർട്ടുകൾ സൂചിപ്പിക്കുന്നു. എന്നാല്‍ ഇത്തരമൊരു പദ്ധതിയെക്കുറിച്ച് പ്രതികരിക്കാനായി ഫ്രഞ്ച് ബിസിനസ് പത്രമായ ‘ലെ എക്കോസ്’ മെറ്റയുടെ ഉപസ്ഥാപനവുമായി ബന്ധപ്പെട്ടെങ്കിലും അവര്‍ അതിന് വിസമ്മതിക്കുകയായിരുന്നു എന്നാണ് സൂചന. 

എഐ യിലേക്കുള്ള ചുവടുവയ്പ്പും തൊഴിലവസരം വെട്ടിക്കുറയ്ക്കലും

പ്രമുഖ സാങ്കേതിക സ്ഥാപനങ്ങളെല്ലാം തങ്ങളുടെ ജീവനക്കാരുടെ തൊഴില്‍ സംവിധാനത്തില്‍ മാറ്റം വരുത്തുകയും കൃത്രിമ ബുദ്ധിയുടെ കൂടുതല്‍ഉപയോഗത്തിലേക്ക് ശ്രദ്ധ കേന്ദ്രീകരിക്കുകയും ചെയ്തുകൊണ്ടിരിക്കുന്ന സാഹചര്യത്തിലാണ് മെറ്റയുടെയും പുതിയ നീക്കം. ജോലികള്‍ പുനഃക്രമീകരിക്കുന്നതിനും കൃത്രിമ ബുദ്ധിയില്‍ ശ്രദ്ധ കേന്ദ്രീകരിക്കുന്നതിനുമായി ആഗോളതലത്തിലുള്ള തങ്ങളുടെ ജീവനക്കാരില്‍ 10 ശതമാനത്തോളം പേരെ ഒഴിവാക്കാന്‍ പോവുകയാണെന്ന് മെറ്റ ഏപ്രിലില്‍ തന്നെ പ്രഖ്യാപിച്ചിരുന്നു. അതിനായി നിർബന്ധിത പിരിച്ചുവിടലുകളെ മാത്രം ആശ്രയിക്കുന്നതിന് പകരം സ്വമേധയാ ജോലിയിൽ നിന്ന് വിരമിക്കാനുള്ള അവസരങ്ങൾ നൽകിക്കൊണ്ട് ജീവനക്കാരുടെ എണ്ണത്തിൽ മാറ്റങ്ങൾ വരുത്താൻ കമ്പനി ആലോചിക്കുന്നുണ്ടെന്നാണ് ഫ്രാൻസിൽ നിന്നുള്ള ഈ പുതിയ റിപ്പോർട്ട് സൂചിപ്പിക്കുന്നത്.

മൈക്രോസോഫ്റ്റും ഗൂഗിളും

മറ്റ് പ്രമുഖ സാങ്കേതിക കമ്പനികളിലും സമാനമായ രീതിയിൽ ജീവനക്കാരുടെ ഘടനയിൽ മാറ്റങ്ങൾ വരുത്തുന്നതിനിടയിലാണ് മെറ്റയുടെ ഈ പദ്ധതിയെക്കുറിച്ചുള്ള റിപ്പോർട്ടുകൾ പുറത്തുവരുന്നത്. മൈക്രോസോഫ്റ്റ് തങ്ങളുടെ ജീവനക്കാരുടെ ഘടനയിൽ മാറ്റങ്ങൾ വരുത്തുന്നതിന്റെ ഭാഗമായി അർഹരായവർക്ക് വോളന്‍ററി റിട്ടയര്‍മെന്‍റിന് അവസരം നല്‍കിയിട്ടുണ്ട്. ഗൂഗിളും തങ്ങളുടെ പ്രവർത്തനങ്ങളിലും മുൻഗണനകളിലും മാറ്റങ്ങൾ വരുത്തുന്നതിന്റെ ഭാഗമായി ചില വിഭാഗങ്ങളിൽ ജീവനക്കാർക്ക് സ്വമേധയാ പിരിഞ്ഞുപോകാനുള്ള അവസരങ്ങളും പ്രത്യേക പാക്കേജുകളും നൽകിയിരുന്നു.ചെലവുകൾ നിയന്ത്രിക്കുന്നതിനും, പ്രവർത്തനങ്ങൾ കാര്യക്ഷമമാക്കുന്നതിനും ആർട്ടിഫിഷ്യൽ ഇന്റലിജൻസ് പോലുള്ള നൂതന സാങ്കേതികവിദ്യകളിലേക്ക് നിക്ഷേപം തിരിച്ചുവിടുന്നതിനുമായി ലോകത്തിലെ ഏറ്റവും വലിയ സാങ്കേതിക കമ്പനികൾ ജീവനക്കാരുടെ സ്വമേധയാ ഉള്ള പിരിച്ചുവിടലുകളെയും തൊഴിൽ ഘടനയിലെ പുനഃക്രമീകരണങ്ങളെയും എങ്ങനെ ഉപയോഗപ്പെടുത്തുന്നുവെന്ന് വ്യക്മാക്കുന്നതാണ് അപകടകരമായ ഈ പുതിയ പ്രവണത.