ഹാഷ്ടാഗില്‍ ആര്‍ഭാടം വേണ്ട; പരിഷ്കാരവുമായി ഇന്‍സ്റ്റഗ്രാം

ഇന്‍സ്റ്റഗ്രാമില്‍ പോസ്റ്റ് വൈറലാകാന്‍  ഹാഷ് ടാഗുകള്‍ വാരിവിതറാറുണ്ടോ? ഇൻസ്റ്റാഗ്രാം ഉപഭോക്താക്കളെയും കണ്ടന്‍റ് ക്രിയേറ്റർമാരെയും ഒരുപോലെ ബാധിക്കുന്ന പുതിയ പരിഷ്കാരവുമായി മെറ്റ രംഗത്തെത്തിയിരിക്കുകയാണ്. ഇനി മുതൽ ഇൻസ്റ്റാഗ്രാം പോസ്റ്റുകളിലും റീൽസിലും പരമാവധി അഞ്ച് ഹാഷ്‌ടാഗുകൾ മാത്രമേ ഉപയോഗിക്കാൻ സാധിക്കൂ എന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. നേരത്തെ മുപ്പതോളം ഹാഷ്‌ടാഗുകൾ വരെ ഉപയോഗിക്കാൻ അനുവാദമുണ്ടായിരുന്ന സ്ഥാനത്താണ് ഈ വലിയ മാറ്റം കൊണ്ടുവരുന്നത്. പ്ലാറ്റ്‌ഫോമിലെ സ്പാം അക്കൗണ്ടുകളെ നിയന്ത്രിക്കാനും കണ്ടെന്‍റിന്‍റെ ഗുണനിലവാരം വർദ്ധിപ്പിക്കാനുമാണ് ഈ നീക്കത്തിലൂടെ ഇൻസ്റ്റാഗ്രാം ലക്ഷ്യമിടുന്നത്.

ഹാഷ്‌ടാഗുകളുടെ എണ്ണം കുറയ്ക്കുന്നതിലൂടെ അനാവശ്യമായ ടാഗുകൾ കുത്തിനിറച്ച് റീച്ച് വർദ്ധിപ്പിക്കുന്ന രീതിക്ക് അന്ത്യമുണ്ടാകും. ഓരോ പോസ്റ്റും ഏത് വിഭാഗത്തിൽപ്പെട്ടതാണെന്ന് കൂടുതൽ കൃത്യമായി മനസ്സിലാക്കാൻ അൽഗോരിതത്തെ ഇത് സഹായിക്കും. ഇതോടെ ക്രിയേറ്റർമാർ തങ്ങളുടെ കണ്ടെന്‍റിന് ഏറ്റവും അനുയോജ്യമായ അഞ്ച് ഹാഷ്‌ടാഗുകൾ മാത്രം തിരഞ്ഞെടുക്കാൻ നിർബന്ധിതരാകും. ഇത് ഇൻസ്റ്റാഗ്രാം ഫീഡിലെ തിരക്ക് കുറയ്ക്കാനും ഉപഭോക്താക്കൾക്ക് കൂടുതൽ വ്യക്തതയുള്ള വിവരങ്ങൾ നൽകാനും സഹായിക്കുമെന്നാണ് ഇൻസ്റ്റാഗ്രാം മേധാവി ആദം മൊസേരിയുടെ അഭിപ്രായം.

ഈ മാറ്റം കണ്ടന്‍റ് ക്രിയേറ്റർമാരുടെ റീച്ചിനെ എങ്ങനെയൊക്കെ ബാധിക്കുമെന്ന ആശങ്ക സോഷ്യൽ മീഡിയയിൽ സജീവമാണ്. നിലവിൽ പോസ്റ്റുകൾക്ക് കൂടുതൽ പ്രചാരം ലഭിക്കാൻ ഹാഷ്‌ടാഗുകളെ അമിതമായി ആശ്രയിക്കുന്നവർക്ക് പുതിയ നിയമം വെല്ലുവിളിയായേക്കാം. എന്നാൽ മികച്ച ക്വാളിറ്റിയുള്ള വീഡിയോകൾക്കും ചിത്രങ്ങൾക്കും ഹാഷ്‌ടാഗുകൾ കുറവാണെങ്കിലും അൽഗോരിതം മുൻഗണന നൽകുമെന്നാണ് വിദഗ്ധർ വിലയിരുത്തുന്നത്.