ചാറ്റ്ജിപിടി വീണ്ടും പണിമുടക്കി; നാല് ദിവസത്തിനിടെ രണ്ടാം തവണയും സാങ്കേതിക തടസമെന്ന് ഉപയോക്താക്കള്‍

ഓപ്പൺഎഐയുടെ ചാറ്റ്ബോട്ട് ചാറ്റ്ജിപിടി ഉപയോഗിക്കുന്നതിൽ വീണ്ടും സാങ്കേതിക തടസ്സങ്ങൾ നേരിടുന്നതായി ഇന്ത്യയിലെ ഉപയോക്താക്കൾ. നാല് ദിവസത്തിനിടെ ഇത് രണ്ടാം തവണയാണ് ഡൗൺ ഡിറ്റക്ടറിൽ (Downdetector) ഉപയോക്താക്കളുടെ പരാതികൾ ഉയർന്നുവന്നിരിക്കുന്നത്. തിങ്കളാഴ്ച ഉച്ചയോടെയാണ് പുതിയ പ്രശ്നങ്ങൾ റിപ്പോർട്ട് ചെയ്യപ്പെട്ടത്. മുൻപ് സെപ്റ്റംബർ 3-നായിരുന്നു ചാറ്റ്ജിപിടിയുടെയും പ്രോഗ്രാമിങ് ടൂളായ കോഡെക്സിന്റെയും (Codex) സേവനങ്ങൾ ആഗോളതലത്തിൽ സ്തംഭിച്ചത്. എന്നാൽ, കഴിഞ്ഞ ആഴ്ചയിലെ വലിയ തടസ്സത്തെ അപേക്ഷിച്ച് ഇപ്പോഴുണ്ടായിരിക്കുന്ന പ്രശ്നങ്ങൾ ഗുരുതരമല്ലെന്നാണ് കണക്കുകൾ സൂചിപ്പിക്കുന്നത്.

പരാതികളുടെ എണ്ണം ഉയരുന്നു

ഡൗൺ ഡിറ്റക്ടറിലെ ഏറ്റവും പുതിയ വിവരങ്ങൾ അനുസരിച്ച് ഇന്ത്യയിൽ നിന്നുള്ള പരാതികളുടെ എണ്ണം 300-ഓളമായി ഉയർന്നിട്ടുണ്ട്. മൊബൈൽ ആപ്പിലും വെബ് പതിപ്പിലും സന്ദേശങ്ങൾ അയയ്ക്കാൻ സാധിക്കാത്ത അവസ്ഥ, മറുപടികൾ ലഭിക്കുന്നതിലെ കാലതാമസം, പേജ് ലോഡ് ആകാത്തത് തുടങ്ങിയ പ്രശ്നങ്ങളാണ് ഉപയോക്താക്കൾ നേരിടുന്നത്. സാധാരണ നിലയേക്കാൾ കൂടുതൽ ഉപയോക്താക്കൾ പരാതിപ്പെടുമ്പോഴാണ് ഡൗൺ ഡിറ്റക്ടർ ഇത്തരം പ്രശ്നങ്ങൾ രേഖപ്പെടുത്തുന്നത്.

വില്ലനായത് ക്ലൗഡ് നെറ്റ്‌വർക്കുകളിലെ തകരാറുകളോ?

സെപ്റ്റംബർ 3-ന് ഉണ്ടായ മുൻ തടസ്സത്തിന് പിന്നിൽ പ്രമുഖ ക്ലൗഡ് സേവനദാതാവായ മൈക്രോസോഫ്റ്റ് അസൂറിന്റെ (Microsoft Azure) ഈസ്റ്റ് യുഎസ് റീജിയനിലുണ്ടായ സാങ്കേതിക തകരാറായിരുന്നു കാരണം. ചാറ്റ്ജിപിടിയെ മാത്രമല്ല, ക്ലൗഡ് സർവറുകളെ ആശ്രയിക്കുന്ന ആന്ത്രോപിക്കിന്റെ ക്ലോഡ് (Anthropic's Claude), എക്സ് എഐയുടെ ഗ്രോക്ക് (xAI's Grok) തുടങ്ങിയ മറ്റ് മുൻനിര എഐ സേവനങ്ങളെയും ഇത് ബാധിച്ചിരുന്നു.

ഉപയോക്താക്കൾ അറിയാൻ

ഡൗൺ ഡിറ്റക്ടറിൽ പരാതികൾ ഉയർന്നതുകൊണ്ടുമാത്രം ചാറ്റ്ജിപിടി എല്ലാ ഉപയോക്താക്കൾക്കും പൂർണമായി ലഭ്യമാകുന്നില്ലെന്ന് അർഥമില്ല. പലയിടങ്ങളിലും ഭാഗികമായ തടസ്സങ്ങളോ മന്ദഗതിയോ മാത്രമാണ് അനുഭവപ്പെടുന്നത്. പ്രശ്നത്തിന്റെ യഥാർഥ വ്യാപ്തി എത്രത്തോളമുണ്ടെന്നും ഇത് പരിഹരിക്കാൻ ഓപ്പൺഎഐ എന്ത് നടപടികളാണ് സ്വീകരിക്കുന്നതെന്നും കമ്പനിയുടെ ഔദ്യോഗിക സ്ഥിതിവിവരക്കണക്കുകൾ പുറത്തുവരുന്നതോടെ വരും മണിക്കൂറുകളിൽ മാത്രമേ കൂടുതൽ വ്യക്തമാകൂ.