വൈഭവസ്ഥാൻ; സൂര്യവംശിയും ജൂറലും ആറാടി; 202 റൺസ് വിജയലക്ഷ്യം ആനായാസം മറികടന്നു

ഗുവാഹത്തിയിലെ ബർസപാര സ്റ്റേഡിയത്തിൽ നടന്ന ആവേശകരമായ പോരാട്ടത്തിൽ റോയൽ ചലഞ്ചേഴ്സ് ബെംഗളൂരുവിനെ ആറ് വിക്കറ്റിന് തകർത്ത് രാജസ്ഥാൻ റോയൽസ്. ആർസിബി ഉയർത്തിയ 202 റൺസ് എന്ന കൂറ്റൻ വിജയലക്ഷ്യം രണ്ട് ഓവറുകൾ ബാക്കിനിൽക്കെ വെറും നാല് വിക്കറ്റ് നഷ്ടത്തിൽ രാജസ്ഥാൻ മറികടന്നു. വൈഭവ് സൂര്യവംശിയുടെ തകർപ്പൻ വെടിക്കെട്ടും ധ്രുവ് ജൂറലിന്റെ പക്വതയാർന്ന ബാറ്റിംങുമാണ് രാജസ്ഥാന് അനായാസ വിജയം സമ്മാനിച്ചത്.

ആദ്യം ബാറ്റ് ചെയ്ത ആർസിബി നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 201 റൺസാണ് നേടിയത്. നായകൻ രജത് പട്ടീദറിന്റെ അർദ്ധ സെഞ്ച്വറിയാണ് (40 പന്തിൽ 63) അവർക്ക് മികച്ച സ്കോർ നൽകിയത്. വിരാട് കോഹ്‌ലി (32), വെങ്കിടേഷ് അയ്യർ (29*), റൊമാരിയോ ഷെപ്പേർഡ് (22) എന്നിവരും ഭേദപ്പെട്ട സംഭാവനകൾ നൽകി. എന്നാൽ കൃത്യമായ ഇടവേളകളിൽ വിക്കറ്റുകൾ വീഴ്ത്തി രാജസ്ഥാൻ ബൗളർമാർ ആർസിബിയെ കൂറ്റൻ സ്കോറിൽ നിന്ന് ഒരു പരിധിവരെ തടയുകയായിരുന്നു.

മറുപടി ബാറ്റിംഗിൽ രാജസ്ഥാന് വേണ്ടി വൈഭവ് സൂര്യവംശി തകർത്താടി. വെറും 26 പന്തിൽ നിന്ന് എട്ട് ഫോറുകളും ഏഴ് സിക്സറുകളും സഹിതം 78 റൺസാണ് താരം അടിച്ചുകൂട്ടിയത്. രണ്ടാം വിക്കറ്റിൽ ധ്രുവ് ജൂറലുമായി ചേർന്ന് 37 പന്തിൽ 108 റൺസിന്റെ കൂട്ടുകെട്ടുണ്ടാക്കി സൂര്യവംശി കളി രാജസ്ഥാന്റെ കൈപ്പിടിയിലാക്കി. യശസ്വി ജയ്‌സ്വാൾ (13) നേരത്തെ പുറത്തായെങ്കിലും സൂര്യവംശിയുടെ ആക്രമണം ആർസിബി ബൗളർമാരെ സമ്മർദ്ദത്തിലാക്കി.

സൂര്യവംശി പുറത്തായ ശേഷം 43 പന്തിൽ 81 റൺസുമായി പുറത്താകാതെ നിന്ന ധ്രുവ് ജൂറൽ ടീമിനെ വിജയത്തിലേക്ക് നയിച്ചു. രവീന്ദ്ര ജഡേജ (24*) ജൂറലിന് മികച്ച പിന്തുണ നൽകി. ആർസിബിക്ക് വേണ്ടി ക്രുണാൽ പാണ്ഡ്യ, ജോഷ് ഹേസിൽവുഡ്, ബ്രിജേഷ് ശർമ്മ എന്നിവർ രണ്ട് വിക്കറ്റ് വീതം വീഴ്ത്തിയെങ്കിലും രാജസ്ഥാന്റെ ബാറ്റിംഗ് കരുത്തിന് മുന്നിൽ അതൊന്നും ഫലം കണ്ടില്ല. ബാറ്റിംഗിലും ബൗളിംഗിലും ഒരുപോലെ മികച്ചുനിന്ന രാജസ്ഥാൻ റോയൽസിന്റെ ആധികാരിക വിജയമാണിത്.