ലോകകപ്പ് മോഷണം പോയപ്പോൾ..; ഫുട്ബോളിലെ ഏറ്റവും വലിയ ദുരൂഹതയുടെ കഥ

ലോകകപ്പ് ഫൈനൽ. ലോകത്തിലെ ഏറ്റവും വലിയ കായിക വേദി. കോടിക്കണക്കിന് കണ്ണുകൾ ഒരു സ്വർണ ട്രോഫിയിലേക്കാണ്. ആ ട്രോഫി ഉയർത്തിപ്പിടിക്കുക എന്നത് ഓരോ ഫുട്ബോൾ താരത്തിന്റെയും ഏറ്റവും വലിയ സ്വപ്നമാണ്. എന്നാൽ ഒരുകാലത്ത് ലോകത്തെ വിറപ്പിച്ച ആ ട്രോഫി രണ്ടുതവണ മോഷണം പോയിട്ടുണ്ടെന്ന് എത്രപേർക്കറിയാം? അതിൽ ഒരു മോഷണത്തിന്റെ രഹസ്യം ഇന്നും ചുരുളഴിയാതെ തുടരുകയാണ്.

ഇന്ന് വിജയികൾക്ക് സമ്മാനിക്കുന്ന FIFA World Cup Trophy അല്ല, അതിന് മുമ്പ് 1930 മുതൽ 1970 വരെ ലോകകപ്പ് ജേതാക്കൾക്ക് നൽകിയിരുന്നത് Jules Rimet Trophy ആയിരുന്നു. ഫ്രാൻസിലെ മുൻ ഫുട്ബോൾ ഭരണാധികാരിയായ ജൂൾസ് റിമെയുടെ പേരിലാണ് ഈ ട്രോഫിക്ക് പേര് നൽകിയത്. വിജയത്തിന്റെ പ്രതീകമായ ഈ ട്രോഫി ചരിത്രത്തിലേക്ക് കടന്നത് അതിന്റെ സൗന്ദര്യം കൊണ്ടുമാത്രമല്ല, അതിനെ ചുറ്റിപ്പറ്റിയ ദുരൂഹ സംഭവങ്ങളാലുമാണ്.

1966-ൽ ഇംഗ്ലണ്ടിൽ ലോകകപ്പ് നടക്കാനിരിക്കെ ട്രോഫി ഒരു പ്രദർശനത്തിനായി വെസ്റ്റ്മിൻസ്റ്ററിലെ ഒരു ഹാളിൽ പൊതുജനങ്ങൾക്കായി പ്രദർശിപ്പിച്ചിരുന്നു. കർശന സുരക്ഷ ഉണ്ടായിരുന്നെങ്കിലും ഒരു ദിവസം ട്രോഫി അപ്രത്യക്ഷമായി. ബ്രിട്ടനിലെ ഏറ്റവും വലിയ അന്വേഷണങ്ങളിലൊന്നായി അത് മാറി. പൊലീസ് രാജ്യമെമ്പാടും തിരച്ചിൽ തുടങ്ങി. മാധ്യമങ്ങൾ ഓരോ മണിക്കൂറിലും വാർത്തകൾ പുറത്തുവിട്ടു. ലോകകപ്പ് തന്നെ പ്രതിസന്ധിയിലാകുമോ എന്ന ആശങ്ക ഉയർന്നു.

എന്നാൽ ഏതാനും ദിവസങ്ങൾക്ക് ശേഷം സംഭവിച്ചത് സിനിമയെ പോലും വെല്ലുന്ന തരത്തിലായിരുന്നു. ലണ്ടനിലെ ഒരു വീട്ടുമുറ്റത്ത് നടക്കാനിറങ്ങിയ Pickles എന്ന വളർത്തുനായ പത്രത്തിൽ പൊതിഞ്ഞുകിടന്ന ഒരു പൊതിയിലേക്ക് ശ്രദ്ധിച്ചു. ഉടമ അത് തുറന്ന് നോക്കിയപ്പോൾ കാണുന്നത് ലോകം മുഴുവൻ അന്വേഷിച്ചിരുന്ന Jules Rimet Trophy.

അങ്ങനെ ഒരു നായയാണ് ലോകകപ്പ് ട്രോഫിയെ കണ്ടെത്തിയത്. Pickles ദേശീയ ഹീറോയായി. സമ്മാനങ്ങളും പ്രശസ്തിയും അതിനെ തേടിയെത്തി. എന്നാൽ യഥാർഥ ദുരൂഹത തുടങ്ങിയത് അതിന് 17 വർഷങ്ങൾക്ക് ശേഷമാണ്.

1970-ൽ മൂന്നാം തവണ ലോകകപ്പ് നേടിയ ബ്രസീലിന് Jules Rimet Trophy സ്ഥിരമായി സ്വന്തമാക്കാൻ ഫിഫ അനുമതി നൽകി. റിയോ ഡി ജനീറോയിലെ ബ്രസീലിയൻ ഫുട്ബോൾ ഫെഡറേഷന്റെ ആസ്ഥാനത്താണ് ട്രോഫി സൂക്ഷിച്ചിരുന്നത്. ബുള്ളറ്റ് പ്രൂഫ് ഗ്ലാസ് കാബിനറ്റിലും സുരക്ഷാ സംവിധാനങ്ങളോടെയുമായിരുന്നു സൂക്ഷിപ്പ്.

1983 ഡിസംബർ 19-ന് രാവിലെ ജീവനക്കാർ ഓഫീസിലെത്തിയപ്പോൾ അവർ കണ്ടത് ഞെട്ടിക്കുന്ന കാഴ്ചയായിരുന്നു. ഗ്ലാസ് കാബിനറ്റ് തകർന്നുകിടക്കുന്നു. ട്രോഫി കാണാനില്ല. മോഷ്ടാക്കൾ രാത്രിയിൽ കെട്ടിടത്തിൽ കടന്ന് ട്രോഫി എടുത്ത് രക്ഷപ്പെട്ടിരുന്നു. ബ്രസീൽ പൊലീസ് വർഷങ്ങളോളം അന്വേഷണം നടത്തി. ചിലരെ അറസ്റ്റ് ചെയ്തു. അന്വേഷണത്തിനൊടുവിൽ ട്രോഫി ഉരുക്കി സ്വർണമായി വിറ്റുകളഞ്ഞുവെന്ന നിഗമനത്തിലാണ് അധികൃതർ എത്തിയത്. എന്നാൽ അതിന് വ്യക്തമായ തെളിവുകൾ ഒരിക്കലും ലഭിച്ചില്ല.

 ട്രോഫി ശരിക്കും ഉരുക്കിയോ? അതോ ഏതെങ്കിലും സ്വകാര്യ ശേഖരത്തിൽ ഇന്നും ഒളിപ്പിച്ചിരിക്കുകയാണോ? ഈ ചോദ്യങ്ങൾക്ക് ഇന്നുവരെ ഉറപ്പായ ഉത്തരമില്ല.ഇതോടെയാണ് Jules Rimet Trophy ചരിത്രത്തിന്റെ ഭാഗമായത്. പിന്നീട് FIFA ഇന്ന് നാം കാണുന്ന പുതിയ World Cup Trophy അവതരിപ്പിച്ചു. ഇറ്റാലിയൻ ശിൽപിയായ സിൽവിയോ ഗസാനിഗ രൂപകൽപന ചെയ്ത ഈ ട്രോഫി 18 കാരറ്റ് സ്വർണത്തിലാണ് നിർമ്മിച്ചിരിക്കുന്നത്. എന്നാൽ ഈ ട്രോഫി ഒരു രാജ്യത്തിനും സ്ഥിരമായി നൽകില്ല. ലോകകപ്പ് നേടിയ ടീം ആഘോഷങ്ങൾക്കുശേഷം അത് FIFA-യ്ക്ക് തിരികെ നൽകണം. വിജയികൾക്ക് പിന്നീട് ലഭിക്കുന്നത് സ്വർണം പൂശിയ ഔദ്യോഗിക റെപ്ലിക്കയാണ്. 1983-ലെ അനുഭവം വീണ്ടും ആവർത്തിക്കാതിരിക്കാനുള്ള സുരക്ഷാ നടപടികളിലൊന്നാണിത്. ലോകകപ്പിൽ അത്ഭുതഗോളുകളും ആവേശ മത്സരങ്ങളും ചരിത്ര നിമിഷങ്ങളും നാം എന്നും ഓർക്കും. പക്ഷേ ആ ചരിത്രത്തിന് പിന്നിൽ ഇന്നും ഉത്തരമില്ലാത്ത ഒരു ചോദ്യമുണ്ട്. ലോകത്തിലെ ഏറ്റവും പ്രശസ്തമായ ഫുട്ബോൾ ട്രോഫികളിലൊന്നായ Jules Rimet Trophy യഥാർത്ഥത്തിൽ എവിടെയാണ്?

ഒരുപക്ഷേ അത് എന്നെന്നേക്കുമായി നഷ്ടമായിരിക്കാം. അല്ലെങ്കിൽ ലോകത്തിന്റെ ഏതെങ്കിലും കോണിൽ ആരുടെയെങ്കിലും രഹസ്യ ശേഖരത്തിൽ ഇന്നും കിടക്കുന്നുണ്ടാകാം.

ലോകകപ്പിൽ ചാമ്പ്യന്മാരെ കണ്ടെത്താൻ 90 മിനിറ്റ് മതി. എന്നാൽ ലോകത്തെ വിസ്മയിപ്പിച്ച ആ ട്രോഫിയുടെ യഥാർത്ഥ വിധി കണ്ടെത്താൻ നാല് പതിറ്റാണ്ടിലേറെയായിട്ടും ലോകത്തിന് കഴിഞ്ഞിട്ടില്ല. അതുകൊണ്ടുതന്നെ Jules Rimet Trophyയുടെ മോഷണം ഇന്നും ഫുട്ബോളിലെ ഏറ്റവും വലിയ ദുരൂഹതയായി തുടരുന്നു.