‘നിർണ്ണായക നിമിഷത്തിൽ ഞാൻ ടീമിനെ കൈവിട്ടു എന്ന് തോന്നി; പക്ഷേ...’; വികാരധീനനായി മെസി

ഫിഫ ലോകകപ്പ് പ്രീക്വാർട്ടറിൽ ഈജിപ്തിനെതിരെ അർജന്റീന നടത്തിയ അവിശ്വസനീയമായ തിരിച്ചുവരവിന് ശേഷം മനസ്സ് തുറന്ന് ലയണൽ മെസ്സി. മത്സരത്തിന്റെ ആദ്യ പകുതിയിൽ താൻ നഷ്ടപ്പെടുത്തിയ പെനാൽറ്റി ടീമിനെ വലിയ പ്രതിസന്ധിയിലാക്കിയെന്നും, ആ നിമിഷം താൻ വല്ലാതെ തകർന്നുപോയെന്നും മെസ്സി പറഞ്ഞു. എന്നാൽ, ദൈവത്തിന്റെ അനുഗ്രഹം കൊണ്ട് തനിക്ക് തിരിച്ചുവരാൻ സാധിച്ചുവെന്നും മെസ്സി കൂട്ടിച്ചേർത്തു.

മത്സരത്തിന്‍റെ 15-ാം മിനിറ്റിൽ യാസർ ഇബ്രാഹിമിലൂടെ ഈജിപ്ത് ലീഡ് നേടിയിരുന്നു. എന്നാല്‍ പിന്നാലെ നിക്കോളാസ് ടാഗ്ലിയാഫിക്കോയെ ബോക്സിൽ വീഴ്ത്തിയതിന് അർജന്‍റീനയ്ക്ക് അനുകൂലമായി പെനാൽറ്റി ലഭിച്ചു. എന്നാല്‍ മെസിയുടെ ഷോട്ട് ഈജിപ്തിന്‍റെ ഗോൾകീപ്പർ മൊസ്തഫ ഷൊബീർ തട്ടിയകറ്റി. ഈ ലോകകപ്പിലെ മെസിയുടെ നാലാമത്തെ പെനാൽറ്റി മിസ്സായിരുന്നു അത്. പിന്നാലെ ലോകകപ്പ് ചരിത്രത്തിൽ ഏറ്റവും കൂടുതൽ പെനാൽറ്റികൾ (ഷൂട്ടൗട്ട് ഒഴികെ) നഷ്ടപ്പെടുത്തുന്ന താരം (4 എണ്ണം) എന്ന നാണക്കേടും മെസ്സിയെ തേടിയെത്തി.

മെസ്സിയുടെ വാക്കുകൾ:

‘ഞാൻ ആ പെനാൽറ്റി നഷ്ടപ്പെടുത്തിയതിൽ എനിക്ക് എന്നോടു തന്നെ ദേഷ്യം തോന്നിയിരുന്നു. നിർണ്ണായക നിമിഷത്തിൽ ഞാൻ ടീമിനെ കൈവിട്ടു എന്ന് തോന്നി. എന്നാൽ ഭാഗ്യവശാൽ, ദൈവം എനിക്ക് വേണ്ടി മറ്റൊന്ന് കരുതിവെച്ചിട്ടുണ്ടായിരുന്നു. ആ സമനില ഗോൾ നേടാൻ എനിക്ക് സാധിച്ചു. അത് എനിക്കും ടീമിനും വലിയ ആശ്വാസമാണ് നൽകിയത്’ മെസ്സി മത്സരശേഷം മാധ്യമങ്ങളോട് പറഞ്ഞു. ഒരിക്കൽ കൂടി അർജന്റീനക്കാർ എന്താണെന്ന് ഞങ്ങള്‍ തെളിയിച്ചുവെന്നും മെസി കൂട്ടിച്ചേര്‍ത്തു. ‘ഞാൻ ഇത് പലതവണ പറഞ്ഞിട്ടുണ്ട്, ഇപ്പോഴും ആവർത്തിക്കുന്നു. ഒരിക്കലും തളരാത്ത, ഒരിക്കലും ആയുധം താഴെവയ്ക്കാത്ത ടീമാണ് അര്‍ജന്‍റീന, അവസാന നിമിഷം വരെ പൊരുതുന്നവരാണ്’– മെസി പറഞ്ഞു. 

67-ാം മിനിറ്റിൽ ഈജിപ്ത് 2-0 എന്ന നിലയിൽ മുന്നിട്ടുനിന്നപ്പോൾ അർജന്റീന പുറത്താവുമെന്ന് ഏവരും ഉറപ്പിച്ചിരുന്നു. എന്നാല്‍ കളി അവസാനിക്കാൻ മിനിറ്റുകൾ മാത്രം ബാക്കിനിൽക്കെ അർജന്റീന നടത്തിയ ഗംഭീരമായ തിരിച്ചുവരവ് ഫുട്ബോൾ ലോകത്തെ അമ്പരപ്പിച്ചു. 79-ാം മിനിറ്റിൽ ക്രിസ്റ്റ്യൻ റൊമേറോയിലൂടെ അർജന്റീന തിരിച്ചുവരവിന് തുടക്കമിട്ടു. 83-ാം മിനിറ്റിൽ മെസ്സി സമനില ഗോളും, ഇഞ്ചുറി ടൈമിൽ എൻസോ ഫെർണാണ്ടസ് വിജയഗോളും നേടിയതോടെ അർജന്റീന ക്വാർട്ടർ ഫൈനലിലേക്കെത്തുകയായിരുന്നു.