Image Credit: AFP
ഈ ലോകകപ്പ് കോച്ചിങ് രംഗത്തെ ആഗോളവൽക്കരണത്തിന്റെ നിർണായക വേദിയായിക്കൂടി മാറുകയാണ്. മത്സരിക്കുന്ന 48 ടീമുകളിൽ 28 എണ്ണത്തെയും നയിക്കുന്നത് വിദേശ പരിശീലകരാവുമ്പോൾ 20 ടീമുകൾ സ്വദേശികളായ മാനേജർമാരെയാണ് ആശ്രയിക്കുന്നത്. ഇതാദ്യമായി ലോകകപ്പില് പരിശീലകര്ക്ക് മൂന്ന് മിനിറ്റിന്റെ ഇടവേളയില് ലാപ്ടോപ് ഉപയോഗിക്കാന് അനുമതി നല്കിയിട്ടുണ്ട്.
വിവിധ കളിരീതികളിലും ലീഗുകളിലും ടൂർണമെന്റ് സാഹചര്യങ്ങളിലും കഴിവു തെളിയിച്ച പരിചയസമ്പന്നരായ തന്ത്രജ്ഞർക്ക് ടീമിന്റെ നേതൃത്വം കൈമാറുന്ന പ്രവണത ഫെഡറേഷനുകൾക്കിടയിൽ വർധിച്ചുവരികയാണ്. പന്ത് കൈവശമുള്ളപ്പോഴും ഇല്ലാത്തപ്പോഴും, പ്രതിരോധത്തിലെ കളിക്കാരുടെ എണ്ണത്തിൽ ടീമുകൾ തുടർച്ചയായി മാറ്റം വരുത്തുന്നുണ്ട്. മൂന്നോ നാലോ പ്രതിരോധ താരങ്ങളുള്ള ശൈലികളിലേക്ക് അതിവേഗം മാറുന്ന ഈ രീതി, ഫുൾബാക്കുകൾക്ക് മധ്യനിരയിലേക്ക് കയറാനും വിങ്ങർമാരായി ഓവർലാപ് ചെയ്യാനും അവസരമൊരുക്കുന്നു.
ആധുനിക ക്ലബ് ടീമുകളുടെ ശൈലിക്ക് സമാനമായി, രാജ്യാന്തര ടീമുകളും ഇപ്പോൾ പ്രതിരോധനിരയിൽ നിന്ന് ആത്മവിശ്വാസത്തോടെ ആക്രമണങ്ങൾ മെനഞ്ഞെടുക്കുകയാണ്. മുന്നോട്ടുകയറി പ്രസ്സ് ചെയ്യാൻ എതിരാളികളെ പ്രേരിപ്പിക്കും. അതിലൂടെ, എതിർ മധ്യനിരയ്ക്ക് പിന്നിൽ വിടവുകൾ കണ്ടെത്തും. ഇതാണ് ഈ തന്ത്രത്തിന്റെ ലക്ഷ്യം.
എതിരാളികളുടെ കളിയിലെ നീക്കങ്ങളുടെ ശൈലികളും മനസ്സിലാക്കാൻ, പരിശീലക സംഘങ്ങൾ പരമ്പരാഗത വിഡിയോ വിശകലനത്തിന് ഒപ്പം കളിക്കാരുടെ ചലനങ്ങൾ രേഖപ്പെടുത്തുന്ന നൂതന ഡേറ്റാ സംവിധാനങ്ങളും ഉപയോഗപ്പെടുത്തുന്നു. ഗോള്കീപ്പര്മാര്ക്ക് പെനല്റ്റി ഷൂട്ടൗട്ട് പരിശീലിക്കാനായി എഐ സംവിധാനത്തെയും പ്രയോജപ്പെടുത്തുന്നു പരിശീലകര്. ഫീല്ഡിലെ തന്ത്രങ്ങളൊരുക്കാന് വിര്ച്വല് റിയാല്റ്റി ഉപയോഗിക്കുന്നവരും കുറവല്ല.
പരിശീലക ലോകത്ത് അർജന്റീനയോളം സ്വാധീനം ചെലുത്തുന്ന മറ്റൊരു രാജ്യമില്ല. ലോകചാംപ്യൻ പരിശീലകൻ ലയണൽ സ്കലോനി സ്വന്തം രാജ്യത്തെ നയിക്കുമ്പോൾ, അർജന്റീനയുടെ സ്വാധീനം അതിരുകൾക്കപ്പുറത്തേക്ക് വ്യാപിക്കുകയാണ്. മാർസലോ ബിയേൽസ തന്റെ അതിതീവ്ര ശൈലി യുറഗ്വായ്ക്കായി പകരുമ്പോൾ, കൊളംബിയയുടെ ഘടനാപരമായ പുനർനിർമാണത്തിന് മേൽനോട്ടം വഹിക്കുന്നത് നെസ്റ്റർ ലോറെൻസോയാണ്. ഇക്വഡോറിന്റെ തന്ത്രപരമായ മുന്നേറ്റത്തിന് സെബാസ്റ്റ്യൻ ബെക്കാസെസെ വഴികാട്ടുന്നു. ഗുസ്താവോ അൽഫാരോ പരാഗ്വെയുടെയും മൗറീസിയോ പൊച്ചെറ്റീനോ അമേരിക്കയുടെയും അമരത്തുണ്ട്.
മുപ്പത്തിയെട്ടുകാരനായ ജർമനിയുടെ യൂലിയൻ നഗൽസ്മാനാണ് ടൂർണമെന്റിലെ ഏറ്റവും പ്രായം കുറഞ്ഞ പരിശീലകൻ. തന്ത്രങ്ങളിലെ വേഗത്തിലുള്ള മാറ്റങ്ങൾ, ആക്രമണോത്സുകമായ പ്രസ്സിങ്, കളിയിലെ പെട്ടെന്നുള്ള നീക്കങ്ങൾ എന്നിവ അടങ്ങുന്ന പുതിയ കാലഘട്ടത്തെയാണ് അദ്ദേഹം പ്രതിനിധീകരിക്കുന്നത്. , 78 വയസ്സുള്ള കുറസാവോ പരിശീലകൻ ഡിക് അഡ്വൊകാറ്റാണ് പ്രായംകൂടിയ പരിശീലകന്. പതിറ്റാണ്ടുകളുടെ അനുഭവസമ്പത്തുമായാണ് അഡ്വെക്കാറ്റ് എത്തുന്നത്. ടൂർണമെന്റിലെ ഏറ്റവും പാരമ്പര്യ ശൈലിയുള്ള പരിശീലകരിൽ ഒരാളാണ് അഡ്വെക്കാറ്റ് . നഗല്സ്മാനും അഡ്വെക്കാറ്റും ഒരേ ഗ്രൂപ്പിലാണ് ഉൾപ്പെട്ടിരിക്കുന്നത്. ഇത് ആധുനിക ഫുട്ബോളിന്റെ പുത്തൻ തന്ത്രങ്ങളും പതിറ്റാണ്ടുകളുടെ അനുഭവസമ്പത്തും തമ്മിലുള്ള നേർക്കുനേർ മത്സരം ഫുട്ബോള് പ്രേമികള്ക്ക് നല്കും.
ENGLISH SUMMARY:
