50തിലും 20ന്‍റെ ചുറുചുറുക്ക്; ഷക്കീറയുടെ ലോകകപ്പ് ഗാനം 'ദായ് ദായ്' പുറത്ത്

2026 ഫിഫ ലോകകപ്പ് ഫുട്ബോൾ മത്സരത്തിന്റെ ഔദ്യോഗിക ഗാനത്തിന്റെ വിഡിയോ പുറത്ത്. കൊളംബിയൻ ഗായിക ഷക്കീറ  പാടിയ ‘ദായ് ദായ്’ ആണ് പുറത്തുവിട്ടിരിക്കുന്നത്. നൈജീരിയൻ ആഫ്രോബീറ്റ്സ് താരം ബേർണാ ബോയ്‌യുമായി ചേർന്നാണ് ഷക്കീറ ഈ ഗാനം ഒരുക്കിയിരിക്കുന്നത്.

ലയണൽ മെസ്സി, കിലിയൻ എംബാപ്പെ, എർലിങ് ഹാലാൻഡ്, വിനീഷ്യസ് ജൂനിയർ തുടങ്ങിയ പ്രമുഖ ഫുട്ബോൾ താരങ്ങളെ അണിനിരത്തിക്കൊണ്ടാണ് 4 മിനിറ്റ് ദൈർഘ്യമുള്ള ഇതിന്റെ ഔദ്യോഗിക മ്യൂസിക് വിഡിയോ ഒരുക്കിയിരിക്കുന്നത്.

ലാറ്റിൻ പോപ്പും ആഫ്രോബീറ്റ്സും സമന്വയിപ്പിച്ചാണ് ഗാനം ചിട്ടപ്പെടുത്തിയിരിക്കുന്നത്. ഇംഗ്ലീഷ്, സ്പാനിഷ്, ഫ്രഞ്ച്, ജാപ്പനീസ് എന്നീ ഭാഷകളിലെ വരികളും ഉൾപ്പെടുത്തിയിട്ടുണ്ട്. ഇറ്റാലിയന്‍ വാക്കാണ് 'ദായ്'. 'വരൂ' അല്ലെങ്കിൽ 'മുന്നോട്ട് പോകൂ' എന്നാണ് ഈ വാക്കിന്‍റെ അര്‍ഥം. 

പാട്ട് ഫുട്ബോള്‍ ലോകകപ്പിനെ കുറിച്ചാണെങ്കിലും ഷക്കീറയുടെ പ്രായത്തെ വെല്ലുന്ന സൗന്ദര്യമാണ് കമന്‍റില്‍ ചര്‍ച്ചാവിഷയം. 50ലേക്ക് കടക്കുന്ന ഷക്കൂറക്ക് ഇന്നും 20കളുടെ ചുറുചുറുക്കും ലുക്കുമാണ് ഗാനരംഗങ്ങളില്‍ കാണാനാവുന്നത്. 'വക്കാ വക്കാ' പാടിയ അതേ ഊർജ്ജത്തോടെയും മെയ്​വഴക്കത്തോടെയുമാണ് ഷക്കീറ മ്യൂസിക് വീഡിയോയിൽ നൃത്തം ചെയ്യുന്നത്. 2010 ദക്ഷിണാഫ്രിക്ക ലോകകപ്പില്‍ ഷക്കീറ ഒരുക്കിയ 'വക്കാ വക്കാ' ഒരു കള്‍ട്ടായി മാറിയിരുന്നു. 2014 ബ്രസീൽ ലോകകപ്പിലെ 'ലാ ലാ ലാ'യും സൂപ്പര്‍ ഹിറ്റായി. ഇതിനുശേഷം ലോകകപ്പ് സംഗീതവേദിയിലേക്കുള്ള ഷക്കീറയുടെ ഗംഭീര തിരിച്ചുവരവാണിത്.