ശ്രേയസ് അയ്യര് മടങ്ങിയെത്തുന്നു; വിജയ് ഹസാരെയില് കളിക്കും; ന്യൂസീലന്ഡ് ടീമിലും ഇടം?
- Sports
- Published on Dec 28, 2025, 07:24 PM IST
Bengaluru: Cricketer Shreyas Iyer watches a Vijay Hazare Trophy 2025-26 match between Delhi and Gujarat, at BCCI Centre of Excellence, in Bengaluru, Karnataka, Friday, Dec. 26, 2025. (PTI Photo/Shailendra Bhojak) (PTI12_26_2025_000430B)
പരുക്കിനെ തുടര്ന്ന് വിശ്രമത്തിലായിരുന്ന ഇന്ത്യന് താരം ശ്രേയസ് അയ്യര് വീണ്ടും കളിക്കളത്തിലേക്ക്. ഏകദിന വൈസ് ക്യാപ്റ്റന് കൂടിയായ താരം വിജയ് ഹസാരെ ട്രോഫിയില് കളിക്കാനിറങ്ങുമെന്ന് റിപ്പോര്ട്ട്. ജനുവരി മൂന്നിന് ജയ്പുരില് നടക്കുന്ന മല്സരത്തില് ശ്രേയസ് കളിക്കുമെന്ന് ടൈംസ് ഓഫ് ഇന്ത്യ റിപ്പോര്ട്ട് ചെയ്യുന്നു. നിലവില് ബിസിസിഐയുടെ ബെംഗളൂരുവിലെ സെന്റര് ഫോര് എക്സലന്സില് പരിശീലനത്തിലാണ് താരം. ചൊവ്വാഴ്ച വരെ താരം ബെംഗളൂരുവില് തുടരുമെന്നും പിന്നീട് ജനുവരി രണ്ടിന് ജയ്പുരിലെത്തി മുംബൈയ്ക്കൊപ്പം ചേരും. മൂന്നാം തീയതിയിലെയും ആറിലെയും മല്സരങ്ങളില് ശ്രേയസ് കളിക്കുമെന്നും റിപ്പോര്ട്ട് പറയുന്നു.
Sydney: India's Shreyas Iyer reacts after sustaining an injury while taking the catch of Australia's Alex Carey during the third ODI cricket match between India and Australia, in Sydney, Saturday, Oct. 25, 2025. (PTI Photo/Izhar Khan)(PTI10_27_2025_000296B)
ആഭ്യന്തര മല്സരങ്ങള്ക്ക് പിന്നാലെ ന്യൂസീലന്ഡിനെതിരായ ഏകദിന പരമ്പരയില് താരം കളിക്കുമെന്നാണ് സൂചന. ജനുവരി 11ന് വഡോദരയിലാണ് മല്സരം. ' ശുഭവാര്ത്തയാണ് ശ്രേയസിന്റെ കാര്യത്തില് പുറത്തുവരുന്നത്. മുംബൈയ്ക്കായി ജനുവരി മൂന്നിനും ആറിനും താരം കളിച്ചേക്കും. ഇക്കാര്യത്തില് അന്തിമ തീരുമാനം സെന്റര് ഓഫ് എക്സലന്സില് നിന്നുള്ള റിപ്പോര്ട്ടിനെ ആശ്രയിച്ച് കൈക്കൊള്ളും. എന്നിരുന്നാലും ഇതുവരെയുള്ള സൂചനകള് അനുസരിച്ച് താരം ജയ്പുരില് കളിക്കാനിറങ്ങും. നെറ്റ്സില് മികച്ചരീതിയിലാണ് ശ്രേയസ് ബാറ്റ് ചെയ്യുന്നത്'- എന്ന് മുംബൈ ക്രിക്കറ്റ് അസോസിയേഷന് ഭാരവാഹി പറഞ്ഞതായി റിപ്പോര്ട്ടിലുണ്ട്.
ഒക്ടോബറില് നടന്ന ഓസീസ് പര്യടനത്തിനിടെയാണ് ശ്രേയസ് അയ്യര്ക്ക് വയറിന് പരുക്കേറ്റത്. മൂന്നാം ഏകദിനത്തിനിടെ ഫീല്ഡ് ചെയ്യുമ്പോഴാണ് പന്ത് ശ്രേയസിന്റെ ഇടത്തേ വാരിയെല്ലിന് സമീപത്തുള്ള പേശികളില് അടിച്ച് കൊണ്ടത്. ആന്തരീക രക്തസ്രാവം സംഭവിച്ച താരത്തിന് യഥാസമയം ചികില്സ നല്കാനായതാണ് രക്ഷയായത്. പരുക്കേറ്റതോടെ ദക്ഷിണാഫ്രിക്കയ്ക്കെതിരായ ഏകദിന പരമ്പരയും സയീദ് മുഷ്താഖ് അലി ട്രോഫിയും താരത്തിന് നഷ്ടമായിരുന്നു.
Ranchi: India s Ruturaj Gaikwad during a training session on the eve of the first ODI cricket match of a series between India and South Africa, in Ranchi, Jharkhand, Saturday, Nov. 29, 2025. (PTI Photo/Kamal Kishore) (PTI11_29_2025_000163B)
ശ്രേയസിന് പകരം ഋതുരാജ് ഗെയ്ക്ക്വാദിനെയാണ് ടീമിലെടുത്തത്. സിലക്ടര്മാര് തന്നിലര്പ്പിച്ച വിശ്വാസം സെഞ്ചറി പ്രകടനത്തിലൂടെയാണ് ഗെയ്ക്ക്വാദ് കാത്തത്. ഇതോടെ ന്യൂസീലന്ഡ് പരമ്പരയില് ശ്രേയസ് അയ്യര് ടീമിലേക്കെത്തിയാല് ഗെയ്ക്ക്വാദിനെ എവിടെ കളിപ്പിക്കുമെന്ന ചോദ്യം ഉയര്ന്നിട്ടുണ്ട്. വര്ക് ലോഡ് മാനേജ്മെന്റിന്റെ ഭാഗമായി ന്യൂസീലന്ഡിനെതിരായ ഏകദിന പരമ്പരയില് ബുംറയ്ക്കും ഹാര്ദിക് പാണ്ഡ്യയ്ക്കും വിശ്രമം അനുവദിക്കും. ഇരുവരും ട്വന്റി20യില് മാത്രമാകും കളിക്കുക.
ENGLISH SUMMARY: